ஜில் ஜில் ஜிகிர்தண்டா – வீட்டிலே செய்யலாம் – ஆதி வெங்கட்.

என்னதான் மனைவியோட பதிவுன்னாலும், முன்னாடி நானும் கொஞ்சம் எழுதணுமே – அதுவும் என்னோட வலைப்பூவில் வெளியிடும்போது என் சார்பாவும் கொஞ்சம் எழுதித் தானே ஆகணும்.

சில நாட்களுக்கு முன்னர் தன்னுடைய முகநூல் பக்கத்தில் மேலே இருக்கும் படத்தினைச் சேர்த்து “இது என்ன என்று சொல்லுங்க பார்ப்போம்!! தெரிஞ்சவங்க எதுக்கு இது என்று சொல்லுங்க??” என்று எழுதி இருக்க, என்னவென்று தெரியாம வாயைக்கொடுத்து மாட்டிக்கக் கூடாது என சர்வ ஜாக்கிரதையா Like Button தட்டிட்டு சும்மா இருந்தேன்.  விதம் விதமான பதில்கள் வந்தன! அதுல ஒரு பதில் ரொம்ப ஸ்வாரஸ்யம்! ”வானவில் மனிதன்” மோஹன்ஜி அண்ணா என் மனசுல இருந்ததை அப்படியே சொல்லிவிட, ஒரு ஸ்மைலிய போட்டேன்! அதைப் பார்த்த நம்ம “காணாமல் போன கனவுகள்” ராஜி உடனே என்னை நல்லா கோர்த்து விட்டுட்டாங்க! பாருங்களேன்!

சரி இப்ப, இன்றைய பதிவுக்கு போகலாம் வாங்க! Over to Adhi!

நட்புடன்

வெங்கட்

புது தில்லி.

ஜில்ஜில் ஜிகிர்தண்டா!

மதுரைக்கு பெருமை சேர்க்கும் விஷயங்களில் ஒன்றான ஜிகிர்தண்டாவை நான் சுவைத்தது திருச்சியில் தான்! திருச்சியின் NSB ரோட்டில் உள்ள வசந்த பவன் வாசலில் இந்த ஸ்டால் இருந்தது. மகள் ஐஸ்க்ரீமை ருசிக்க நானும் என்னவரும் ஜிகிர்தண்டாவை முதன்முறையாக சுவைத்தோம்.

ஆராயாமல் வெளியில் எதையும் சாப்பிடும் பழக்கம் இல்லாததால் இதில் என்னென்ன போட்டிருப்பாங்க? என்று என்னவரை கேட்க, சாதம், பால் எல்லாம் சேர்த்திருப்பாங்க என்றார்! சாதமா!!!

அங்கிருந்து சற்றே தள்ளி "மதுரை ஃபேமஸ் ஜிகிர்தண்டா" என்ற பெயர்ப் பலகையுடன் ஒரு கடை இருக்கவே, அடுத்த முறையிலிருந்து அங்கே செல்லத் துவங்கினோம். ஒரு தம்ளர் 30 ரூபாய்.

உடலுக்கு குளிர்ச்சி தரும், வயிற்றுப்புண்களை ஆற்றும் எனவும் தெரிந்தது முதல் இணையத்தில் தேடி தகவல்களை சேகரிக்கத் துவங்கினேன். நாமே வீட்டில் செய்யலாமே!

தேவையான பொருட்கள்:-

பாதாம் பிசின், சப்ஜா விதை, சுண்டக்காய்ச்சிய பால், நன்னாரி சர்பத், ஐஸ்க்ரீம். இவ்வளவே.

நாட்டு மருந்து கடையிலிருந்து பாதாம் பிசினையும், சப்ஜா விதையும் வாங்கிக் கொண்டேன். ஊறவைத்து எல்லாவற்றையும் கலந்தால் சுவையான ஜிகிர்தண்டா தயார்.

சுண்டக்காய்ச்சிய பாலுக்கு பதில் கண்டென்ஸ்டு மில்க்கும் சேர்க்கலாம். நீங்களும் செய்து சுவைத்துப் பாருங்களேன்.

நட்புடன்

ஆதி வெங்கட்.

அலைபேசி மூலம் தமிழ்மண வாக்களிக்க....