சற்றே இடைவெளிக்குப் பிறகு….

அன்பின் நண்பர்களுக்கு,

வணக்கம். நலமா?

பதிவுகள் எழுதுவதில் அவ்வப்போது சுணக்கம் வருவதுண்டு. இரண்டு மூன்று தினங்கள் பதிவுகள் எழுதாமல் விட்டதுண்டு. சில சமயங்களில் 15-20 நாட்கள்! பதிவு எழுத ஆரம்பித்த பிறகு, ஒரு பதிவுக்கும் அடுத்த பதிவுக்கும், இவ்வளவு பெரிய இடைவெளி இதுவரை இருந்ததில்லை! 16 செப்டம்பர் எழுதிய பதிவுக்குப் பிறகு நேற்று வரை பதிவுகள் எழுதவில்லை! திங்கள் முதல் அடுத்த பயணத்தொடர் ஆரம்பிக்கும் எனச் சொல்லி, முன்னோட்டமாக படங்களும் வெளியிட்ட பிறகு, சொன்னபடிச் செய்யாமல் இத்தனை நாட்கள் இடைவெளி! பல சமயங்களில், செய்கிறேன் எனச் சொல்வதைச் செய்யமுடிவதில்லை! சொல்வதைச் சொல்லிவிட்டு அது போல செய்யமுடியாவிட்டால் கொஞ்சம் மனதுக்குக் கஷ்டமாகத்தான் இருக்கிறது! இருக்கட்டும்!

தமிழகப் பயணம், சில வேலைகள், முடிக்க வேண்டிய சில கடமைகள் என ஏதோ ஒன்று காரணமாக இருந்தாலும், பதிவு எழுத வேண்டும் என்ற எண்ணமும் வரவில்லை. தலைநகர் திரும்பிய பிறகும் பதிவுகள் ஒன்றும் எழுதப் போவதில்லை என்று கூட வீட்டில் சொல்லிக் கொண்டிருந்தேன்! [சொல்லி வாங்கிக் கட்டிக் கொண்டேன் என்பதையும் சொல்லி விடுகிறேன்! - உங்களுக்கு இருக்கும் ஒரே பொழுது போக்கு அது மட்டுமே, அதையும் விடப் போகிறீர்களா? அப்பப்ப இப்படி ஏதாவது முறுக்கிக்க வேண்டியது!] தலைநகர் திரும்பி சில நாட்களுக்குப் பிறகும் பதிவுகள் வெளியிடவில்லை. வீட்டைச் சுத்தம் செய்வது, அலுவலக வேலைகள், என கொஞ்சம் பிசி! சரி சொன்ன சொல்லை இப்போதாவது காப்பாற்ற வேண்டும் எனத் தோன்றியதால், அடுத்த பயணத் தொடருக்கான பதிவுகளை எழுதத் துவங்கி இருக்கிறேன். வரும் நாட்களில் வெளியிடுகிறேன்.

இந்த இடைப்பட்ட நாட்களில் சில ஸ்வாரஸ்யமான அனுபவங்கள், சில ஒரு நாள் பயணங்கள், சந்தித்த மனிதர்கள், நவராத்ரி/தீபாவளிக் கொண்டாட்டம், நீர் நிறைந்த அகண்ட காவிரியில் ஒரு உல்லாசக் குளியல் என நிறையவே பதிவு எழுத விஷயங்கள் கிடைத்தன. கூடவே நல்லதொரு ஓய்வு! இப்போதெல்லாம், இப்படி எந்த வேலையும் இல்லாமல் உண்பதும், உறங்குவதும், அரட்டை அடிப்பதுமாக இருப்பது பிடித்திருக்கிறது! கிடைத்த சில அனுபவங்களை, பயணப் பதிவுகளுக்கு நடுநடுவே அவ்வப்போது பகிர்ந்து கொள்கிறேன்.  சரி எழுதத் தான் இல்லை, மற்ற நண்பர்களின் பதிவுகளையாவது படித்து இருக்கலாம்! அதுவும் இல்லை! பதிவுலகம், முகநூல் என இரண்டிலுமே உலா வரவில்லை! அவ்வப்போது சில WhatsApp தகவல்களை பார்த்ததோடு சரி!

இந்த இடைவெளியில் பதிவுகளே வரவில்லையே என என்னைப் பற்றி நினைத்த, மின்னஞ்சல், WhatsApp, முகநூல் மூலம் விசாரித்த அனைத்து நட்புக்களுக்கும் மனம் நிறைந்த நன்றி. தொடர்ந்து நட்பில் இருப்போம்…

மீண்டும் ச[சி]ந்திப்போம்….

நட்புடன்

வெங்கட்

புது தில்லி. 

அலைபேசி மூலம் தமிழ்மண வாக்களிக்க....