போன மச்சான் திரும்பி வந்தான்

அன்பின் நண்பர்களுக்கு, இனிய காலை வணக்கம்.  இந்த ஞாயிறில் உங்கள் அனைவரையும் இந்தப் பதிவு வழி மீண்டும் சந்திப்பதில் மகிழ்ச்சி.  இந்த நாளை நல்லதொரு வாசகத்துடன் ஆரம்பிக்கலாம் வாருங்கள்.  

காலம் தாழ்த்தி எடுக்கக் கூடிய சரியான முடிவு கூட தவறானது தான். வாழ்க்கை என்பதே நேரத்தைப் பொறுத்தது.

*****

1954-ஆம் வருடம். ஸ்ரீராம் நடித்த திரைப்படமான போன மச்சான் திரும்பி வந்தான் என்கிற தமிழ் திரைப்படம் வெளிவந்தது! அதை தயாரிச்சது வேற யாருமில்லை! வெங்கட் தான் - அட… இருங்க! ஒரு மாசம் கழித்து வந்து ஏனிந்த விளையாட்டுன்னு சண்டைக்கு வந்துடாதீங்க!  நான் இங்கே சொல்வது எங்கள் பிளாக் ஸ்ரீராமோ இல்லை, உங்கள் வெங்கட் நாகராஜையோ அல்ல!  அவங்க வேற! நாங்க வேற!  மெர்க்குரி ஃபில்ம்ஸ் வெங்கடசாமி தயாரிப்பில் வெளிவந்த “போன மச்சான் திரும்பி வந்தான்” திரைப்படத்தில் ஸ்ரீராம், தங்கவேலு, டி.கே. ராமசந்திரன், அங்கமுத்து என நிறைய பேர் நடிச்சு இருக்காங்க! இசை எம்.எஸ்.வி - கூடவே இருந்தது சி.என். பாண்டுரங்கன் எனும் இசையமைப்பாளர்! 

சரி இப்ப எதுக்கு இந்த கதையெல்லாம்? ஒரு மாத இடைவெளிக்குப் பிறகு போன மச்சான் திரும்பி வந்தான் கதையாக நானும் பதிவுலகம் பக்கம் திரும்பி வந்திருக்கிறேன். கடந்த அக்டோபர் மாதம் 30-ஆம் தேதி தான் கடைசியாக ஒரு பதிவினை எழுதி இருந்தேன். நவம்பர் மாதத்தில் நேற்று வரை எந்தப் பதிவும் எழுதவில்லை.  தமிழகம் வந்திருந்த போது தொடர்ந்து பதிவுகள் எழுதவில்லை.  தலைநகர் தில்லி திரும்பி வந்தாலும் பதிவுகள் எழுதும் சூழல் இல்லை.  வீட்டு வேலைகள், அலுவலக ஆணிகள் என தொடர்ந்து கொண்டிருந்ததால் பதிவுகள் எழுத இயலவில்லை.  நண்பர்கள் எழுதும் பதிவுகளையும் கடந்த நான்கைந்து நாட்களாகத் தான் படித்துக் கொண்டிருக்கிறேன். 

இந்த இடைவெளியில் பதிவர் கோமதிம்மாவின் கணவர் இறைவனடி சேர்ந்தது பற்றி தெரிந்தது. மனதுக்கு மிகவும் வேதனை அளித்தது.  தலைநகர் தில்லியிலும் தமிழகத்தில் அவரது வீட்டிலும் சந்தித்து இருக்கிறேன்.  இறைவன் தனது தொண்டரை அழைத்துக் கொண்டார் என்று மனதைத் தேற்றிக் கொள்ள வேண்டியதாக இருக்கிறது.  பழகிய நமக்கே மனதைத் தேற்றிக் கொள்ள கடினமாக இருக்கும்போது அவரது குடும்பத்தினருக்கு இன்னும் கடினமாகவே இருக்கும்.  தலைவரை இழந்து தவிக்கும் கோமதி அம்மாவின் குடும்பத்தினருக்கு ஆழ்ந்த இரங்கல்கள்.  

நாட்கள் வேகவேகமாக ஓடுகின்றன.  இந்த வருடம் இப்போது தான் ஆரம்பித்த மாதிரி இருக்கிறது.  அதற்குள் நவம்பர் மாதம் முடிவிற்கு வந்து விட்டோம்.  டிசம்பர் மாதமும் இதே வேகத்தில் சென்று விடும்.  திநுண்மி நாட்களிலிருந்து விடுதலை கிடைக்கும் வழி தெரியவில்லை.  மார்ச் மாத கடைசியிலிருந்து இதோ வருட இறுதி வந்து விட்டாலும் அதிலிருந்து விடுபடும் வழி இல்லை.  கொஞ்சம் கொஞ்சமாக அதன் அலை அடங்கும் என்று பார்த்தால் அலை ஓய்ந்தபாடில்லை.  இந்த மாதத்தின் கணக்குப்படி, தில்லியில் ஒவ்வொரு மணி நேரத்திலும் தீநுண்மி காரணமாக ஐந்து பேர் இறக்கிறார்கள் என்று புள்ளிவிவரங்கள் சொல்கின்றன.  குளிர் காலம் ஆரம்பித்து விட்டதால் தீநுண்மியின் பாதிப்பு இன்னும் அதிகரிக்கும் என சிலர் பீதியைக் கிளப்புகிறார்கள்.  அலுவலகத்திலும் பலருக்கு தொற்று வருவதும், சிலர் குணமடைந்து திரும்புவதும், சிலர் தொற்றின் காரணம் இறைவனடி சேர்வதும் நடந்து கொண்டிருக்கிறது.  ஆனாலும் தொடர்ந்து அலுவலகம் சென்று வர வேண்டிய சூழல்!  தீநுண்மி எனது சில நண்பர்களையும் தொற்றி, சிலர் மீண்டிருக்கிறார்கள்.  சிலர் இன்னமும் சிகிச்சையில்!  விரைவில் இதற்கு ஒரு தீர்வு வேண்டும் என்று பிரார்த்தனை செய்வதைத் தவிர வேறு வழி தெரியவில்லை. 

சில சோக நிகழ்வுகள், சில சந்தோஷ நிகழ்வுகள் என இந்த இடைவேளையில் சந்தித்திருக்கிறேன்.  சந்தோஷ நிகழ்வாக, எனது மின்னூலான “என் இனிய நெய்வேலி”-ஐப் பற்றி நண்பர், ஆசிரியர் திரு கரந்தை ஜெயக்குமார் அவர்கள் ”அபிராமி, அபிராமி” என்ற தலைப்பில் ஒரு பதிவினை அவரது வலைப்பூவில் எழுதி இருக்கிறார்.  அவருக்கு எனது நெஞ்சார்ந்த நன்றி.  மின்னூலுக்கான அவர் பாணி விமர்சனம் மிகவும் சிறப்பாக இருந்தது.  நமது எழுத்திற்கான இப்படியான வாசிப்பனுபவங்களை படிக்கும் போது நமக்கு மேலும் உற்சாகம் வருகிறது - தொடர்ந்து எழுதுவதற்கும் இந்த மாதிரியான விமர்சனங்கள் ஒரு தூண்டுகோலாக இருக்கும் என்பதில் சந்தேகமில்லை.  கடந்த ஏப்ரல் மாதத்தில் அமேசான் தளம் வழியாக மின்னூல்களை வெளியிட ஆரம்பித்திருக்கிறேன் - இந்த எட்டு மாதங்களில் எனது மின்னூல்களுக்கான வரவேற்பு மகிழ்ச்சி அளிக்கும் வகையிலேயே இருக்கிறது என்பதையும் இங்கே சொல்ல வேண்டும் - குறிப்பாக இலவசமாக தரவிறக்கம் செய்யும் வசதி அளிக்கும் சமயங்களில்! :) 

தமிழகம் வந்திருந்த போது இரண்டு நிகழ்வுகள் - இரண்டுமே தவிர்க்க முடியாத சஷ்டியப்த பூர்த்தி நிகழ்வுகள் - ஒன்று தஞ்சையை அடுத்த களஞ்சேரி கிராமத்தில்! மற்றது சென்னையில்! களஞ்சேரி கிராமத்திற்கு குடும்பத்துடன் சென்று வந்தோம் - வாடகைக்கு டெம்போ ட்ராவலர் எடுத்து!  சென்னை பயணம் தவிர்க்க முடியாத காரணத்தினால் தனியாக - இரயில் மூலம்! பயணங்களில் கிடைத்த அனுபவங்கள் தனிப்பதிவுகளாக வந்தாலும் வரலாம் என்ற எச்சரிக்கையும் இங்கே செய்து விடுகிறேன்! சென்னை வந்தாலும் நண்பர்களையோ, உறவினர் குடும்பத்தினர்களையோ சந்திக்க வில்லை.  தீநுண்மி காலத்தில் யாருடைய வீட்டிற்கும் செல்லாமல் இருக்கவே நினைத்தேன்.  நம்மால் அடுத்தவர்களுக்கு ஏதும் தொல்லை இருக்கக் கூடாதல்லவா!  சென்னை பயணத்தில் கிடைத்த அனுபவங்களை விட, தில்லி திரும்பும்போது விமானத்தில் கிடைத்த அனுபவங்கள், சமீபத்தில் பிரபலமாக இருக்கும் சொற்தொடர் போல - “வேற லெவல்!”  அதுவும் எழுதுவேன்.  

இப்போதைக்கு, “போன மச்சான் திரும்பி வந்தான்” கதையைச் சொல்லியாயிற்று!  இனி தொடர்ந்து நேரம் எடுத்து, பதிவுகள் எழுதுவதோடு, நண்பர்களின் பதிவுகளையும் படித்து விடுவேன். தொடர்ந்து சந்திப்போம்… சிந்திப்போம்…

நட்புடன்

வெங்கட் நாகராஜ்

புது தில்லி.