அன்னையின் அழைப்பு!

மாதா வைஷ்ணோ தேவி பயணம் – 1

மாதா வைஷ்ணவ தேவி.....

ஏரிகள் நகரம் தொடரில் நைனிதால் மற்றும் ஜிம் கார்பெட் சென்று வந்தது பற்றி எழுதி இருந்தது அனைவருக்கும் நினைவில் இருக்கும். அப்பயணத் தொடர் முடிந்த பின் சில நாட்களாக பயணக் கட்டுரைகள் எழுத முடியாத சூழல். இப்போது மீண்டும் ஒரு பயணத் தொடர் ஆரம்பிக்கிறது. இப்பயணம் ஒரு ஆன்மீகப் பயணம். என்றாலும் ஆன்மீகம் அல்லாத விஷயங்களும் இத் தொடரில் எழுதப் போகிறேன் என்பதால் ஆன்மீகம் பிடிக்காதவர்களும் தொடர்ந்து படிக்கலாம். 

மலையடிவாரத்தில் இருக்கும் நுழைவு வாயில்...

மாதா வைஷ்ணோ தேவி – வட இந்தியர்களில் அனைவருக்கும் ஒரு இச்சை - ஒரு முறையாவது இங்கே சென்று மாதா வைஷ்ணோ தேவியின் அருளைப் பெற வேண்டும் என்பது தான் அது. ஆனாலும் எத்தனை தான் பணம் படைத்தவர்களாயினும் அவளது அழைப்பின்றி அவளை ஒருவரும் தரிசிக்க முடிவதில்லை என்றும் சொல்வார்கள். 

சிலையோ என எண்ண வேண்டாம்....  ஒரு கட்டிடத்தின் மேல் நிற்கும் ஆடு!

இங்கே செல்ல நினைத்தாலும், அவள் அழைத்தால் மட்டுமே உங்களால் மேற்கொண்டு பயண ஏற்பாடுகளைக் கவனிக்க முடியும். எனது நண்பர்கள் சிலர் நான்கு நாட்கள் விடுமுறை சமயத்தில்  Wagah Border, Amritsar Golden Temple எனச் சுற்றிவிட்டு, பிறகு கட்ரா வந்து வைஷ்ணோ தேவியை தரிசிப்பதாக திட்டம்.  கட்ரா வந்து பார்த்தால் அப்படி ஒரு கூட்டம் அங்கே.  மலையடிவாரம் வந்து மேலே செல்வதற்கான பயணச் சீட்டு வாங்குமிடத்தில் “நீங்கள் நான்கு நாட்கள் தங்கி பிறகு தான் மாதாவினை தரிசிக்க முடியும்” என்று சொல்ல, விடுமுறை இல்லாத காரணத்தினால் தில்லி திரும்பினார்கள். 

பயணிகளுக்காய் காத்திருக்கும் அலங்கார பூஷிதர்கள்....

சிலர் எல்லா வித ஏற்பாடுகளும் செய்திருப்பார்கள். ஆனாலும் அவளது அழைப்பு இல்லாத பட்சத்தில் கடைசி நேரத்தில் பயணம் தடைப்படும். இப்படி பல முறை கேட்டதுண்டு. அவளது அழைப்பு வந்துவிட்டால், எந்த வித திட்டமிடலும் இல்லாது புறப்பட்டு மிகவும் திவ்யமான தரிசனம் கிடைத்திடும் – இப்படி பலமுறை நடந்ததும் உண்டு. எனக்கே கூட இந்த அனுபவம் உண்டு! ஒரு முறை மாலை ஐந்து மணிக்கு நண்பரிடமிருந்து அழைப்பு – “இன்றிரவு ஒரு பேருந்து புறப்படுகிறது – வைஷ்ணோ தேவி யாத்திரை – வர வேண்டிய பயணிகள் சிலர் வர மறுத்துவிட்டார்கள். அதனால் நான் செல்ல இருக்கிறேன், நீயும் வருகிறாயா?” என.

மலையில் பாதி கட்டப்பட்ட நிலையில் ஒரு கோவில்.

அந்த நிமிடத்திலேயே முடிவு செய்து பயணம் செய்திருக்கிறேன் – மிக திவ்யமான தரிசனமும் கிடைத்திருக்கிறது! அதன் பிறகு இரண்டு முறை சென்று விட்டேன். ஒரு சில சமயங்களில் அங்கே செல்ல, யாரையாவது அழைத்துச் செல்ல முற்பட்ட சமயங்களில் ஏதோ தடை வந்திருக்கிறது. எப்போது அழைப்பு வருகிறதோ அப்போது செல்வது நிச்சயம் நடக்கும்!

மலைப்பாதையெங்கும் பூத்துக் குலுங்கும் சரக் கொன்றைப் பூக்கள்

அப்படிச் செல்லும் போது தாங்களாக செல்வதாக கூறிக்கொள்வதில்லை – “[ch]சலோ [b]புலாவா ஆயா ஹே!” அதாவது ”அழைப்பு வந்துவிட்டது, வாருங்கள் போகலாம்!” என்பதாகத் தான் சொல்வார்கள்.  அப்படி அழைப்பு வந்து விட்டால், பிறகென்ன, எல்லா ஏற்பாடுகளும் அவளே பார்த்துக் கொள்வாள் – முதல் அடி எடுத்து வைப்பது தான் நமது வேலை! எத்தனை கடினமான பாதையாக இருந்தாலும் சுலபமாய் பயணித்து மாதா வைஷ்ணோ தேவியின் தரிசனம் கிடைத்துவிடும்!

இயற்கை எழில் கொஞ்சும் மலைப்பகுதி

எனது கேரள நண்பர் – தில்லி வரும்போதெல்லாம் வைஷ்ணோ தேவி சென்று தேவியை தரிசனம் செய்ய வேண்டும் என்று சொல்லிக் கொண்டே இருப்பார். ஆனாலும் ஒவ்வொரு முறையும் ஏதோ ஒரு தடங்கல் – அவருக்கு அலுவலக வேலை முடிந்திருக்காது – இல்லையெனில் எனக்கு அலுவலகத்தில் விடுப்பு கிடைக்காது – இப்படி தட்டிக்கொண்டே போனது.  சென்ற முறை வரும்போது எல்லாம் சரியாக அமைய, அன்னையின் அழைப்பு வந்து விட்டது என்ற எண்ணத்தோடு ஜம்முவை நோக்கி பயணம் செய்ய முடிவு செய்தோம்.

எங்கே செல்லும் இந்தப் பாதை.....

திட்டமிடல் எதுவும் இல்லாத காரணத்தால், ரயிலில் முன்பதிவு எதுவும் செய்திருக்கவில்லை – நாங்கள் பயணிக்க முடிவு செய்தபோது எந்த ரயிலிலும் முன்பதிவு செய்ய முடியவில்லை – அனைத்திலும் Waiting List. நாங்கள் இருவர் மட்டுமே என்பதால் ஜம்மு அல்லது கட்ரா வரை பேருந்திலேயே பயணம் செய்ய முடிவு செய்து WWW.REDBUS.IN ஐ நாடினோம்.

குப்பைக் கூடைக்குள் பொக்கிஷம் தேடும் குரங்கு..

கட்ரா வரை செல்ல பேருந்து கிடைத்தது.  AC Semi Sleeper பேருந்து – எனது இல்லத்தின் மிக அருகிலிருந்து புறப்படும் என தெரிய அதிலேயே இரண்டு பயணச்சீட்டுகளை முன்பதிவு செய்தேன். Sleeper பேருந்துகளும் உண்டு – இருந்தாலும் அதில் பயணிப்பதை விட உட்கார்ந்தே பயணித்து விடலாம்! – ஆறடி மனிதனை ஐந்தடி படுக்கைக்குள் சுருட்டி விடுகிறார்களே! – ”பைநாகப் பையை சுருட்டிக் கொள்” என்று சொல்லாதது தான் குறை!

மலைப் பகுதி...  ஒரு பார்வை.

இந்தப் பேருந்துப் பயணத்தில் கிடைத்த அனுபவங்களை முன்னரே எழுதி இருக்கிறேன் – அட படிக்கலையா? நினைவில் இல்லையா?  சரி இங்கே அந்த அனுபவங்கள் படிக்கக் கிடைக்கும்! நீங்க படிச்சு முடிச்சுட்டு ரெடியா இருங்க! அடுத்த பாகத்தில் வேறு சில சுவாரசியமான தகவல்கள், அனுபவங்களோடு உங்களைச் சந்திக்கிறேன்.

மலைப்பகுதி வேறொரு கோணத்தில்....

ஜெய் மாதா [dh]தி! இந்த வாக்கியத்திற்கு என்ன அர்த்தம் என்று அடுத்த பதிவில் பார்க்கலாம்!

தொடர்ந்து பயணிப்போம்!

நட்புடன்

வெங்கட்.

புது தில்லி. 

டிஸ்கி: புகைப்படங்கள் நண்பர் அவரது கேமராவில் எடுத்தவை.  அவற்றை என்னுடன் பகிர்ந்து கொண்ட அவருக்கு நன்றி.