ஃப்ரூட் சாலட்–120: சுத்தம் நம் கையில் – ஆதார் – தில்லியில் வடிவேலு

இந்த வார செய்தி:

காரைக்குடி: கடந்த 50 ஆண்டுகளாக "ஊழியம்' என்ற பெயரில், ஆண்டுக்கு நான்கு முறை ஊரை சுத்தம் செய்தும், வரத்துக் கால்வாய், கண்மாய் தூர் வாரி வருகின்றனர் சிவகங்கை மாவட்டம் காரைக்குடி அருகே உள்ள கொரட்டி ஊர்மக்கள்.

சாக்கடை ஓடுகிறது, ரோடு சரியில்லை, குப்பை அள்ள வருவதில்லை, புதர்களை அகற்றுவதில்லை என புகார்கள், இன்றைய நவீன அவசர உலகில் வாழும் மக்களின் பிரதான புகார் வாக்கு மூலம். வீட்டின் முன்பு ரோட்டில் பள்ளம் கிடந்தால் அதில் தினமும் நடந்து செல்லும் நாம் ஒருநாளாவது, நம்மால் முடிந்த அளவு அதை மூட நினைப்பதில்லை. இதற்கு விதிவிலக்காக செயல்பட்டு வருகின்றனர் காரைக்குடி அருகே உள்ள கொரட்டி ஊர் மக்கள்.தட்டட்டி ஊராட்சிக்குட் பட்டது கொரட்டி. 200 குடும்பத்தில் 350 புள்ளிகள் உள்ளனர். ஒரு குடும்பத்தில் ஒருவர் திருமணம் முடித்தால் அவர் ஒரு புள்ளியாக கணக்கில் கொள்ளப்படுகிறார். பல்வேறு சமூகத்தினர் வாழ்ந்தாலும், கடந்த 50 ஆண்டுகளாக ஊர் மக்கள் ஒற்றுமையாக வாழ்கின்றனர். செயலாளர், பொருளாளர் பதவிக்கு, ஒவ்வொரு ஆண்டும், ஒவ் வொரு சமூகத்தை சார்ந்தவர்கள் தேர்வு செய்யப்படுகின்றனர்.இந்த ஊர் மக்கள் ஆண்டுக்கு நான்கு முறை "ஊழியம்' என்ற பெயரில் ஊர் சுத்தத்தில் ஈடுபடுகின்றனர். பொங்கல், தீபாவளி, இந்த ஊரின் சிந்தாமணி அம்மன் கோயில் விழா, மழைக்காலம் முடிகின்ற காலங்களில் இந்த பணியை மேற்கொள்கின்றனர்.ஒரு புள்ளிக்கு ஒருவர் கண்டிப்பாக இப்பணியில் ஈடுபட வேண்டும், என்ற கட்டுப்பாடு உண்டு. குண்டும் குழியுமாக கிடக்கும் ரோட்டை சீரமைப்பது, குடிதண்ணீர் ஊரணியை சுற்றியுள்ள புதர்களை அகற்றுவது போன்ற பணிகளில் ஈடுபடுகின்றனர்.

முழுக்கட்டுரையும் இங்கே!

இந்த வார முகப்புத்தக இற்றை:

இதயம் எத்தனை முறை காயப்பட்டாலும் மனதுக்குப் பிடித்தவரை மறக்காது – காரணம், இதயத்துக்கு நடிக்கத் தெரியாது, துடிக்க மட்டுமே தெரியும்!

இந்த வார குறுஞ்செய்தி:

நான் ரொம்ப அழகு என்று கர்வமா உங்களுக்கு? ஒரே ஒரு முறை உங்கள் ஆதார் அட்டையைப் பாருங்கள் – உண்மை தெரிந்து விடும்!

இந்த வார சாலைக்காட்சி:

சென்ற ஆண்டின் கடைசி சில மணி நேரங்கள் பாக்கி இருக்கையில் இரவு உணவு முடித்து சாலையில் நடந்து வந்து கொண்டிருந்தேன். எதிரே இரண்டு குடிமகன்கள் சாலையை அளந்து பார்த்தபடியும், நடப்பதற்கு உரிம்ம் வாங்க எட்டு போட்டபடியும் வந்து கொண்டிருந்தார்கள். 

இரண்டு பேருமே அப்படி ஒரு பரவச நிலையில் இருந்தார்கள்.  “உனக்கு நான் துணை, எனக்கு நீ துணை” என்று பேசிக் கொண்டு ஒருவரை மற்றொருவர் பிடித்து கைத்தாங்கலாக அழைத்துக் கொண்டு வந்து கொண்டிருந்தார்கள். 

ஒரு நிலைக்கு மேல் அவர்களால் நடக்கக்கூட முடியவில்லை.  அங்கேயே நின்று கொண்டு ஒருவரை ஒருவர் பிடித்தபடி நின்று கொண்டிருக்க, அந்த நேரத்தில் தான் நான் அவர்களை கடந்தேன். ”எஷ்க்யூஷ் மீ!” என்று ஒரு குரல் கேட்க, குழப்பத்துடன் அவர்களை நோக்கினேன்! இரண்டு பேரும் கோரஸாக “எங்களை அந்த முக்கு வரைக்கும் ட்ராப் பண்ண முடியுமா” என்று கேட்க, மயில்சாமி வடிவேலு ஜோடி தான் நினைவுக்கு வந்தது! அவருக்காவது ஒரு மயில்சாமி – இந்த வடிவேலுவுக்கு இரண்டு மயில்சாமிகள்!

இன்னும் கொஞ்ச நேரத்தில இந்த வழியா தில்ல் போலீஸோட இனோவா கார் வரும் – அதுலேயே உங்களைக் கொண்டு விடுவாங்க! என்று சொல்லி விட்டு நகர்ந்தேன்! எனக்குப் பின்னால் ”நாங்களே நடந்து போயிடுவோம், நீ எதுக்கு எங்களுக்கு என்று சொல்லியபடியே நடப்பது தெரிந்தது. பிறகு “தொப் தொப்” என்று சத்தம் – சாலையில் இருவரும் மல்லாக்க கிடந்தார்கள்! – தெளிந்தபின் எழுந்து போவார்கள் என நானும் நகர்ந்தேன்.

இந்த வார காணொளி:

”முயற்சி திருவினையாக்கும்” என்று மற்ற புலிக்கு சொல்கிறதோ இப்புலி! பாருங்களேன்....

Post by Tyrese Gibson.

இந்த வார புகைப்படம்:

கிறிஸ்துமஸ் தொடர்ந்த நான்கு நாட்களில் ஹிமாச்சல பிரதேசத்தில் இருக்கும் ஊனா, காங்க்ரா மாநிலங்களுக்கு ஒரு பயணம் சென்றேன்.  அங்கே எடுத்த ஒரு படம் உங்கள் ரசனைக்கு!

படித்ததில் பிடித்தது:

என்னை மணலில் வைத்து  
உன்னைக் கடலில் வைத்துக்  
கடமை முடித்துக்
காணாமல் போனான் கடவுள்!
 
வருவதும் போவதுமாய் நீ!

துறையில் படகைக் கட்டி
துடுப்பை நதியில் வீசி  
கடமை முடித்துக்  
காணாமல் போனான்  
கடவுள்!!
 
நதியின் போக்கில்  
துடுப்பின் ஓட்டம் !

சிப்பியில் என்னை வைத்து  
முத்துக்குள் உன்னை வைத்து  
கடமை முடித்துக்  
காணாமல் போனான்  
கடவுள் !

ஏதோ ஒரு கிரீடத்தில் நீ !

உன்னைச் சூரியனாக்கி  
என்னை மலராக்கி  
கடமை முடித்துக்  
காணாமல் போனான்  
கடவுள் !


உன்னுடைய திசை தேடித்  
திரும்பும் என் முகம் !

குளிர் நிலவின் ஒளி நெசவில்    
இளம் மனதின் உணர்விழைகள்  
அறுந்தும் சேர்ந்தும்  
அழுகை ஜரிகையாகிறது !

ஸ்வரங்களின் உச்சத்தைத் தொட  
ஏங்கிய இந்த மௌனராகம்  
மறக்கப்படவே  
மீட்டப்படுகிறது !!!

"ஸ்ரீ"

மீண்டும் அடுத்த வெள்ளியன்று வேறொரு ஃப்ரூட் சாலட்-ல் சந்திக்கும் வரை…..

நட்புடன்

வெங்கட்.

புது தில்லி.