விருதுகளும் தொடர் பதிவுகளும்!

ஹலோ....  மைக் டெஸ்டிங்!  One, Two, Three…. 

ஹலோ....  ஹலோ....  மைக் டெஸ்டிங்!  Three, Two, One!.....

நான் பேசறது உங்க எல்லாருக்கும் கேட்குதா.... 

Can you hear me! Can everyone hear me! 

”என்ன ஆச்சு இந்த ஆளுக்கு! போன வாரம் என்னடான்னா “தொடர்ந்து வந்த பெண்” அப்படின்னு ஒரு பதிவு போடறாரு! இந்த வாரம் என்னடான்னா “மௌன ராகம்” கார்த்திக் மாதிரி மைக் போட்டு ஊரைக் கூட்டி யாரையோ காதலிக்கறத சொல்லப் போறாரா?” அப்படின்னு யாரும் பயந்துட வேண்டாம்! அதெல்லாம் நம்மால முடியாத விஷயம்! :)

இப்படி மைட் டெஸ்ட் பண்ணி முன்னாடியே ஒரு பதிவு போட்டு இருந்தேன் – அது இருக்கும் ஒரு ரெண்டு வருஷம்...  என்ன பதிவுன்னு கேட்கறீங்களா? ”விருது வாங்கலையோ விருது!” அப்படின்னு ஒரு பதிவு – அதுவும் காதலர் தினம் அன்னிக்கு போட்டிருக்கேன் – எனக்கே தெரியாம! :)

இப்ப திரும்பவும் அதே மாதிரி – அதே Versatile Blogger Award – படம் மட்டும் மாத்தி இருக்கோ! அதுவும் ஒருத்தர் இல்ல, இரண்டு பேர் இல்லை, ஐஞ்சு பேர் கடந்த பத்து நாளில் கொடுத்து இருக்காங்க! [”டேய் உனக்கே இது அதிகமா தோணலை! ஓவரா சீன் போடாதே! அடங்கு!” – வேற யாரு மனசாட்சி தான் கூவுது உள்ளுக்குள்ளிருந்து!]

வலையுலகில் ஒரு பழக்கம் – திடீர்னு யாராவது ஒருத்தர் இப்படி விருது குடுப்பாங்க! இல்லைன்னா ஒரு தலைப்பில் பதிவு போட்டு – அதை 5 பேர் தொடரணும், 10 பேர் தொடரணும்னு fine print-ல condition போடுவாங்க! உடனே தமிழ் வலையுலகமே அப்படியே பத்திக்கும்! சில நாள் பார்த்தா Dashboard-ல தொடர்பதிவு/விருது பதிவுகளா குவியும்! யாரு யாரை கூப்பிடறாங்க/விருது குடுக்கறாங்கன்னே புரியாது!

சில மாதங்களுக்கு முன்னர் தொடர்பதிவு – இப்ப விருது!  அதுவும் இந்த Versatile Blogger விருது!

”சரி விஷயத்துக்கு வாடா ராசா!”ன்னு நீங்க சொல்றதுக்கு முன்னாடி சொல்லிடறேன்! எனக்கு இந்த விருது மாதத்தில் விருது கொடுத்தவங்க ஐஞ்சு பேர் யாருன்னு சொல்லிடறேன்!

கமலா ஹரிஹரன் அவர்கள் தந்த விருது - “என்னையும்” தேடி வந்த விருது… - 21.09.2014

எழில் அவர்கள் தந்த விருது – விருதுகள் - தூண்டுகோல்கள் – 18.09.2014

 

மதுரைத் தமிழன் அவர்கள் தந்த விருது – விஜய் டிவிகாரர்களுக்கு கொஞ்சமும் சளைத்தவர்கள் அல்ல இந்த வலையுலக பதிவர்கள்? – 18.09.2014

 

தில்லையகத்து துளசிதரன் அவர்கள் தந்த விருது - யாம் பெற்ற இன்பம் பெறுக எம் வலை அன்பர்கள்!  - 14.09.2014

 

துரை செல்வராஜூ அவர்கள் தந்த விருது - உங்களுடன் நான் – 13.09.2014

 

இப்படி விருது கொடுத்த பிறகும் அதைப் பத்தி என் வலைப்பக்கத்துல பதிவு போடலைன்னா “Blog” உம்மாச்சி கண்ணை குத்தும்னு மிரட்டல் வேற வருது! அதுனால தான் இந்த பதிவு!

 

என்னைப் பத்தி சொல்லணும்னு ஒரு கண்டிஷன் – ஏற்கனவே நான் பல தடவை TPT வேலை பண்ணியாச்சு! – அதாங்க தற்பெருமை தக்காளி வேலை! அதனால Strict No No!

 

இந்த விருதை குறைஞ்சது ஐந்து பேருக்காவது பகிர்ந்து தரணும்! – ”ஸ்ஸ்.... அப்பா....  இப்பவே கண்ண கட்டுதே!” – இவ்வளவு லேட்டா பதிவு போட்டா யாருக்கு கொடுக்கறது! எல்லாருக்கும் யாராவது ஒருத்தர் கொடுத்துருப்பாய்ங்க! அதனால ஒரு Safe வழி! – “என்னைத் தொடரும், எனக்கு தொடர்ந்து ஆதரவு தரும் அனைவருக்கும் இந்த விருதினை தரப் போகிறேன்! சரியா!

 

எனக்கு விருது அளித்த நண்பர்களான துரை செல்வராஜூ, துளசிதரன், மதுரைத் தமிழன், எழில் மற்றும் கமலா ஹரிஹரன் அவர்களுக்கு நெஞ்சம் நிறைந்த நன்றி.....

 

 

தொடரட்டும் வலைப்பதிவுகள்.... 

மீண்டும் சந்திப்போம்..

நட்புடன்

 

வெங்கட்.

புது தில்லி.

நடக்கலாம் வாங்க!

படம்: இணையத்திலிருந்து.....

மாதா வைஷ்ணோ தேவி பயணம் – பகுதி 3

முந்தைய பகுதிகள்: பகுதி-1 பகுதி-2

என்ன நண்பர்களே, சென்ற பகுதியில் சொன்னது போல அன்னையைத் தரிசிக்க நமது நடைப் பயணத்தினை துவங்கலாமா?

நடைப்பயணத்தினை துவங்கு முன்னர், சற்றே வயிற்றுக்கும் கொஞ்சம் இய்யலாம் என உணவகத்தினைத் தேடினோம்.  நாங்கள் தங்கியிருந்த இடத்தில் உணவகம் இல்லை. அதனால் வெளியே தான் சாப்பிட வேண்டும். பல உணவகங்கள் இருந்தாலும், ஒரு சிறிய உணவகத்தினைத் தேர்ந்தெடுத்தோம். காரணம் உணவகத்தின் உரிமையாளரே சுடச்சுட ”தவா ரொட்டி” செய்து கொண்டிருந்தார். பெரும்பாலும் வட இந்தியாவில் “தந்தூரி ரொட்டி” வகைகள் தான் அதிகம்.  பெரும்பாலான தென் இந்தியர்களுக்கு இந்த தந்தூரி ரொட்டி பிடிப்பதில்லை! என் நண்பரும் அதற்கு விதிவிலக்கல்ல!

 படம்: இணையத்திலிருந்து.....

தவா ரொட்டி, [dh]தால், [dh]தஹி, ஊறுகாய் என மிகச் சாதாரணமான மெனுவினைத் தேர்ந்தெடுத்து கொஞ்சமாக வயிற்றை நிரப்பினோம். பொதுவாகவே மலையாளிகளுக்கு ஒரு பழக்கம் – சாப்பிட்ட உடன் தேநீர் அருந்துவது! :)  மதிய உணவாக இருந்தாலும் கூட சாப்பிட்ட பின் தேநீர் அருந்துகிறார்கள்!  உணவினை வயிற்றுக்கு அளித்த பிறகு, அன்னையை மனதால் தொழுது எங்கள் நடைப்பயணத்தினை ஆரம்பித்தோம்.

 படம்: இணையத்திலிருந்து.....

கட்ரா நகர பேருந்து நிலையத்திலிருந்து சுமார் ஒரு கிலோ மீட்டர் தொலைவில் இருக்கிறது கோயிலின் நுழைவாயில்.  இந்த பாதையின் இரு மருங்கிலும் கடைகள், கடைகள், பல விதமான கடைகள் – எந்தக் கடையாக இருந்தாலும் வாயிலில் பல குச்சிகள்/கைத்தடிகள் வைத்திருப்பார்கள். இந்தக் குச்சிகளை வாடகைக்கு வாங்கிக் கொண்டால், செங்குத்தான பாதையில் நடக்கும்போது ஊன்றி நடக்க வசதியாக இருக்கும்.  20 ரூபாய் கொடுத்து ஒரு தடியை வாங்கிக் கொண்டால் பயன்படுத்தி திரும்ப வரும்போது கொடுத்தால் 10 ரூபாய் திருப்பிக் கொடுத்து விடுவார்கள்.

 படம்: இணையத்திலிருந்து.....

கைத்தடி அவசியமில்லை என்று நினைத்ததால் நாங்கள் எடுத்துக் கொள்ளவில்லை. எதிரே அன்னையைத் தரிசித்து வருகிறவர்கள் அனைவருமே நடைப்பயணத்தினை துவங்கும் பக்தர்களை உற்சாகப் படுத்தும் விதமாக “ஜெய் மாதா [dh]தி!” என முழங்க, தரிசிக்கச் செல்லும் பக்தர்களும் “ஜெய் மாதா [dh]தி!” என கோஷிக்கிறார்கள்! நடைப்பயணதினை துவங்கும்போதே இந்த கோவில் உருவான கதை பற்றியும் கொஞ்சம் கொஞ்சமாக பார்க்கலாம்!

 படம்: இணையத்திலிருந்து.....

எப்போதெல்லாம் அசுர சக்திகளின் பலம் அதிகரிக்கிறதோ அப்போதெல்லாம் இறைவன்/இறைவி தங்களது சக்திகளைப் பயன்படுத்தி அசுர்ர்களை வதம் செய்து விடுவார்கள் என்பதை நமது புராணங்களும் இதிகாசங்களும் நமக்குச் சொல்கின்றன. அப்படி அன்னை பராசக்தி அசுரர்களை அழித்துக் கொண்டிருந்தாள்.  ஒரு சமயத்தில் அவளுடைய மூன்று அவதாரங்களான மஹாகாளி, மஹாலக்ஷ்மி மற்றும் சரஸ்வதி ஆகிய மூவரும் ஒன்று சேர்ந்து தங்களது தெய்வீகச் சக்திகளை ஒருமுகப் படுத்தினார்கள்.  அப்போது அங்கே ஒரு ஒளிப்பிழம்பு வெளிவந்தது. அங்கே 

அப்பிழம்பிலிருந்து ஒரு அழகிய பெண் தோன்றினாள்.

தோன்றியவுடன் அவள் கேட்டாள் ஒரு கேள்வி! கேள்வி கேட்பது பெண்களுக்கே உரிய குணமல்லவா? ”அன்னையே ஏன் என்னை படைத்தீர்கள்? முப்பெரும் தேவியரும் அதற்கு பதிலளிக்கும் விதமாகச் சொன்னார்கள் – “நீ இப்புவியில் பிறந்து தர்மத்தினை நிலை நாட்ட வேண்டும்” என்பது தான் எங்கள் குறிக்கோள். தென் இந்தியாவில் இருக்கும் ரத்னாகர் மற்றும் அவரது மனைவியின் குழந்தையாக அவதரித்து கலைகள் பல கற்று, உன்னதமான நிலை அடைவாய் என்று சொல்லி மறைந்தார்கள். ரத்னாகரின் மனைவி ஒரு தெய்வீகக் குழந்தையைப் பெற்றெடுத்தாள். அவளுக்கு ”வைஷ்ணவி” என்று பெயரிட்டனர்.

 Dharshani Darwaza.....

ஒரு கிலோ மீட்டர் தொலைவினை நடந்தோ, அல்லது ஆட்டோவிலோ பயணிக்கலாம்.  அப்படி பயணித்து நாம் அடையும் இடம் “Darshani Darwaza”  அதாவது ”தரிசன நுழைவுவாயில்”.  இங்கே முதல் முறையாக சென்ற பகுதியில் பார்த்த Yatra Parchi பாதுகாவலர்களால் சரி பார்க்கப் படும். கூடவே பாதுகாப்பு சோதனைகளும் நடக்கும்.  கோவில் மற்றும் பாதைகளின் பாதுகாப்பு முழுவதுமே Central Reserve Police Force வசம்.  பலத்த சோதனைகள் செய்த பின்னரே அனுமதி அளிக்கிறார்கள். 

 நடக்கலாம் வாங்க..... கால் வலித்தால் கொஞ்சம் உட்காரலாம்!

இந்த இடம் கடல் மட்டத்திலிருந்து சுமார் 2800 அடி உயரத்தில் இருக்கிறது.  இங்கே நின்று பார்த்தால் அன்னை குடிகொண்டிருக்கும் திரிகூட மலையைக் காண முடியும் என்பதாலும்  இவ்விடத்திற்கு “Darshani Darwaza” என்ற பெயர். இந்த இடத்திலிருந்து ”Bhavan” என்று அழைக்கப்படும் அன்னையின் இருப்பிடம் சுமார் 12 கிலோ மீட்டர் தூரம்.  இந்த பன்னிரெண்டு கிலோ மீட்டர் தொலவு தூரத்தினை தாம் நாம் நடந்து கடக்கப் போகிறோம்.  என்ன நீங்களும் தயாரா? வாருங்கள் நடக்கலாம்!

 மேற்கூரையோடு கூடிய நடைபாதை

இப்போது இருக்கும் நடைபாதை, கோவிலின் நிர்வாகத்தினை Shri Mata Vaishno Devi Shrine Board [SMVDSB] [1988-ஆம் வருடம்] எடுத்துக் கொண்ட பிறகு போடப்பட்ட பாதை. அதற்கு முன்பு படிகளும், செங்குத்தான பாதைகளும் நிறைந்த ஒன்று. அதில் நடந்து போவது மிகவும் கடினமான ஒன்று. இப்போதைய பாதை மிகச் சிறப்பாக அமைக்கப்பட்டு நடக்க ஏதுவாய் இருக்கிறது. 

 ”Gotcha! எனக்கு உணவளித்தவருக்கு நன்றி” எனச் சொல்லுமோ?

 

வழியெங்கிலும் “சாரே [b]போலோ ஜெய் மாதா [dh]தி! ஜோர் சே [b]போலோ ஜெய் மாதா [dh]தி! [dh]தில் சே [b]போலோ, ப்ரேம் சே [b]போலோ ஜெய் மாதா [dh]தி!” போன்ற கோஷங்கள் உங்கள் காதுகளை நிறைப்பதோடு நடப்பதில் இருக்கும் சிரமம் தெரியாமல் இருக்க உதவும்.  ஒருவர் சொல்லச் சொல்ல, நீங்கள் சொல்ல நினைக்காவிடிலும் உங்கள் உதடுகள் இந்த கோஷங்களை உச்சரிக்க ஆரம்பித்து விடும்! 

 மலையை நோக்கியபடி நடைப்பயணம்!

இப்படி ஜெய கோஷங்கள் எழுப்பியபடி நமது நடைப்பயணம் துவங்கி விட்ட்து.  தொடர்ந்து நடப்போம்.....  பன்னிரெண்டு கிலோ மீட்டர் தொலைவு! அடுத்த பகுதியிலும் நடப்போம்!

ஜெய் மாதா [dh]தி!

தொடர்ந்து பயணிப்போம்!

நட்புடன்

வெங்கட்.

புது தில்லி.

வாவ்! நாற்காலிகள்

நாற்காலிகளில் தான் எத்தனை வகை. இறைவனின் படைப்பில் இத்தனை இத்தனை வேறுபாடுகள்! அது என்ன நாற்காலிகளை இறைவன் படைத்தானா? எனக்குத் தெரிந்து நாற்காலிகளை தச்சர்கள் தானே செய்வார்கள் என்று கேட்கக் கூடாது!  

இந்த ”நாற்காலி” எனும் சொற்பதத்தினை விலங்குகளுக்குப் பயன்படுத்திய துளசி டீச்சருக்கு பாராட்டுகள்! அந்த சொல்லை நானும் அவருக்கு மனதில் நன்றி சொன்னபடியே சுட்டு விட்டேன்!

நாற்காலிகளை படம் பிடிப்பதெற்கென்றே ஒரு சிலர் பல தினங்கள் காடு மலைகளில் காத்திருந்து, இன்னல்கள் பல அடைகிறார்கள்.  அப்படி காத்திருந்து அருமையான படங்களை தங்களது காமிராக்களில் சிறைபிடித்து மற்றவர்களுடன் பகிர்ந்து கொள்கிறார்கள்.  அப்படி பிடிக்கப்பட்ட படங்களை இந்த வருடத்தின் Wildlife Photographer of the Year போட்டிக்கு அனுப்பி இருந்தார்களாம். வந்திருந்த 41000 புகைப்படங்களில் இறுதிச் சுற்றுக்குச் செல்ல 50 புகைப்படங்களைத் தேர்ந்தெடுத்து வெளியிட்டு இருக்கிறார்கள்.  அவற்றில் சிலவற்றை இங்கே பகிர்ந்து கொள்வதில் புகைப்படம் எடுப்பதில் கத்துக்குட்டியான எனக்கும் மகிழ்ச்சி! எப்படி இவ்வளவு சிறப்பாய் படம் எடுக்கிறார்கள் என ஆச்சரியம்!

சென்ற வாரத்தில் ஃப்ரூட் சாலட்-106 பதிவில் வெளியிட்ட குரங்கார் படம் கூட இந்த ஐம்பது படங்களில் ஒன்று தான்.  மற்ற படங்களில் சிலவற்றைப் பார்க்கலாமா!

'Stretching' by Stephan Tuengler

முத்தம் கொடுக்க வந்ததால் வெட்கத்தில் கண்களை மூடிக்கொண்டதோ! இல்லை இல்லை இது சோம்பல் முறிக்கிறது!

'Flirting Bearded Seal' by Audun Rikardsen

 

ஐ! இந்த தாடி அழகா இருக்கே! இது மாதிரி தாடி வளர்க்கலாம்னு ஒரு யோசனை!

'Bad Hair Day' by Gordon Illg

 

மயிர் கூச்செறியும் காட்சி என்பது இது தானோ!

'Barracuda Swirl' by Alexander Mustard

 

சுத்தி சுத்தி வந்தீக சுத்தும் விழியால் சுட்டீக!

'Bat Festival' by João Paulo Krajewski

 

நாங்கள் தலைகீழாக தொங்கியபோது வெடி வெடித்த நபர் யாரோ என்று பறந்தபடியே கேட்கிறதோ!

'Dantes Inferno' by Karen Lunney

 

அந்நியன் பட தண்டனையை நினைவுபடுத்துகிறது இந்தப் படம்!

'Feel Safe' by Juan Carlos Mimó Perez

 

”ஏய் ஃபோட்டோ புடிக்கிற மாமா, நான் இங்க ஒளிஞ்சு இருக்கேன்னு யார்கிட்டயும் சொல்லிடாத!”

'Great Peacock Moth Caterpillar' by Leela Channer

நான் கூட மயில் தான்!

'Heavy Rain' by Pierluigi Rizzato

 

மழையிலே நனைஞ்சா கரைஞ்சு போயிட நான் என்ன சக்கரையா? நான் இப்படித்தான் நனைவேன்!

'Old Cloths' by Claudio Contreras Koob

யாருடா அது என்னை கொடியில காய வைச்சது!

'Red Kangaroos at Waterhole' by Theo Allofs

எத்தனை கங்காரு எண்ணிச் சொல்லுங்க பார்க்கலாம்!

'Sentry Duty' by Neil Aldridge

 

என்னைத் தாண்டி ஒரு ஈ, காக்கா கூட உள்ள வர முடியாது!

எல்லா படங்களையும் இங்கேயே பகிர்ந்து விட்டால் எப்படி? மற்ற படங்களையும் ரசிக்க இங்கே செல்லலாமே!

என்ன நண்பர்களே இந்த வாரத்தின் புகைப்படங்களை ரசித்தீர்களா?  மீண்டும் வேறு சில புகைப்படங்களோடு பிறிதொரு சமயத்தில் சந்திக்கிறேன்.

மீண்டும் சந்திப்போம்....

நட்புடன்

வெங்கட்

புது தில்லி.