கதம்பம் - கடைத்தெரு மனிதர்கள் - அறியாமை - அநீதி - மகளின் கைவண்ணம்

அன்பின் நண்பர்களுக்கு, இனிய காலை வணக்கம். இந்த நாளில் மீண்டும் ஒரு பதிவுடன் உங்கள் அனைவரையும் சந்திப்பதில் மகிழ்ச்சி.   

இதற்கு முன்னர் வெளியிட்ட சற்றே இடைவெளிக்குப் பிறகு… பதிவினை படித்து கருத்துகள் தெரிவித்த அனைத்து வலையுலக நண்பர்களுக்கும் மனம் நிறைந்த நன்றி.  இந்த நாளை நல்லதொரு வாசகத்துடன் தொடங்கலாம் வாருங்கள்.

******

கடைத்தெரு மனிதர்கள் - 7 மார்ச் 2025: 

மாதம் பிறந்துவிட்டால் மளிகைக்கு லிஸ்ட் போட்டு வாங்குவது, மருந்துகள் இன்ன பிற பொருட்கள் வாங்குவது என்று ஆரம்பித்து விடும்! நேற்று தான் நானும் இந்த வேலைகளைச் செய்ய கடைத்தெருவுக்குச் சென்றிருந்தேன்! அங்கே நான் பார்த்த சில விஷயங்கள் என்னை சிந்திக்க வைத்தது என்று சொல்லலாம்!

******

அறியாமை - 7 மார்ச் 2025: 

சாலையோர பழ வியாபாரி ஒருவரிடம் ஆரஞ்சும், திராட்சையுமாக கொஞ்சம் வாங்கிய பின் அதற்கு பணம் கொடுத்ததும் - ‘அக்கா! இந்த நோட்டு வேணாம்! வேற குடுங்களேன்! என்றார்! 

10 ரூ, 20 ரூ நோட்டு எல்லாமே இப்படித்தானே வருது! இங்க கடைத்தெருவுல தான் தந்தாங்கப்பா! என்றேன்! பிறகு வேறு நோட்டொன்றை கொடுத்ததும்…

அக்கா! இந்த மாதிரி நோட்டெல்லாம் 1000 ரூ பக்கம் வீட்டுலயே கெடக்குது! என்ன பண்றதுன்னே தெரியல!

பேங்குல போய் குடுத்து மாத்திக்கோங்கப்பா! என்றேன் அந்த பெண்மணியிடம்!

பேங்குக்கெல்லாம் யாருக்கா போறாங்க! அப்படியே வீட்டுல வெச்சிருக்கேன்! என்றதும் ஆச்சர்யப்பட்டேன்!!

முதல்ல பேங்க்ல உங்களுக்கு அக்கவுண்ட் இருக்கா?? என்று கேட்டேன்!

இருக்குக்கா! ஆனா எல்லாரும் Gpay பண்ணிடறாங்க! இல்லன்னா காசு குடுத்துடுவாங்க! அப்புறம் எதுக்கு பேங்குக்கு எல்லாம் போயிட்டு!!?? என்று சொல்கிறார் அருகில் வியாபாரம் செய்து கொண்டிருந்த அந்த பெண்மணியின் கணவர்!

உங்க கிட்ட இருக்கிற டேமேஜான நோட்டெல்லாம் பேங்குல போய் குடுத்து மாத்திக்கோங்க! 1000 ரூபான்னா சும்மாவா! என்றதும் புன்னகையுடன் தேங்க்ஸ் சொன்னார்கள் அந்த தம்பதிகள்!

******

அநீதி - 7 மார்ச் 2025: 

கடை ஒன்றில் நான் நின்று கொண்டிருந்த போது அந்தக் கடை முன்பு திடீரென்று கூச்சல்! என்னவென்று பார்த்ததில் எதிர்ப்புறம் ஒரு வயதான பெண்மணியின் கையில் இருக்கும் பையை பிடுங்க முயற்சித்துக் கொண்டிருக்கிறான் ஒரு இளைஞன்! 

அந்த அம்மா கத்திக் கூச்சல் போடும் சத்தம் தான் அது! அந்த இளைஞன் குடிபோதையில் நடுத்தெருவில்  அந்த அம்மாவின் மீதே விழுந்து அந்தப் பையை பிடுங்க முயற்சித்துக் கொண்டும், தகாத வார்த்தைகளால் திட்டிக் கொண்டும் இருந்தான்! 

பதறிப் போய் நான் பார்த்துக் கொண்டிருக்கையில், நான் நின்று கொண்டிருந்த கடையின் உரிமையாளர் ‘இவங்க அம்மாவும் பிள்ளையும் தான்! இது வழக்கமாகவும்  நடக்கிறது தாம்மா! என்று வெகு இயல்பாக சொல்கிறார்!

நாம் எங்கு சென்று கொண்டிருக்கிறோம்! ஒருபுறம் நாளைய தினத்தை பெண்களுக்கான சிறப்பான தினமாக கொண்டாடப்படும் வேளையில், இங்கே நடுத்தெருவில் ஒரு பெண்ணுக்கு அநீதி நிகழ்ந்து கொண்டிருக்கிறது! தன் அம்மாவின் உழைப்பை தன் சுயநலத்துக்காக உறிஞ்ச நினைக்கும் பிள்ளை! 

அந்தப் பிள்ளையிடம் நாலு வார்த்தை நறுக்கென கேட்கத் தான் துடிக்கிறது! மனம் நொந்து நான் அங்கிருந்து நடக்கத் துவங்கியதும் சிறிது தொலைவில்  சாலையோரத்தில் ஒரு தள்ளுவண்டியில் பாசிமணி, வளையல் என விற்றுக் கொண்டிருக்கும் ஒரு பெண் கண்ணீர் ததும்ப ‘எங்கிட்ட காசெல்லாம் இல்ல மச்சான்! எவ்வளவு தான் உனக்கு குடுக்கிறது! வயித்து பொழப்புக்காகத் தான் நானும் சம்பாதிக்கிறேன்! என்று புலம்பிக் கொண்டிருக்கிறார்!

இந்தக் காட்சிகளை எல்லாம் சாலையில் வேண்டுமானால் நாம் கடந்து வந்துவிடலாம்! ஆனால் மனதளவில் எளிதாக கடந்து விட முடியவில்லை என்பது தான் மறுக்க இயலாத கசப்பான உண்மை! இந்த நிலை மாறும் நாள் என்று???

******

மகளின் கைவண்ணம் - 17 மார்ச் 2025: 

மகளின் கைவண்ணத்தில் மண்டலா ஆர்ட் - உங்கள் பார்வைக்கு…

*******

இன்றைய பதிவு குறித்த தங்களது எண்ணங்களை பின்னூட்டத்தில் சொல்லுங்கள். விரைவில் வேறொரு பதிவுடன் உங்கள் அனைவரையும் சந்திக்கும் வரை…

நட்புடன்

ஆதி வெங்கட்

திருவரங்கம்

21 ஜூன் 2025