தேசிய பெண் குழந்தைகள் தினம்

இன்று ஜனவரி 24 – இந்த தினத்தினை தேசிய பெண் குழந்தைகள் தினமாகக் கொண்டாடுகிறது இந்திய அரசு. இந்த நாளின் முக்கியத்துவம் என்ன தெரியுமா? இந்தியாவின் முதல் பெண் பிரதம மந்திரியாக திருமதி இந்திரா காந்தி பதவியேற்ற தினம். கடந்த ஐந்து ஆண்டுகளாக இந்த தினம் கொண்டாடப்படுகிறது.

இன்னமும் இந்தியாவின் பல கிராமங்களில் பெண் குழந்தைகளைச் சுமையாகக் கருதி, கருவிலேயே அழித்து விடுவதும், அல்லது பெண் குழந்தை பிறந்த பின் அழித்து விடுவதும் தொடர்ந்து கொண்டு தான் இருக்கிறது. கடந்த இருபது ஆண்டுகளில் கருவிலேயே அழிக்கப்பட்ட பெண் குழந்தைகளின் எண்ணிக்கை மிக மிக அதிகம். சில ஆண்டுகளாக, கருவிலிருக்கும் குழந்தை ஆணா பெண்ணா எனப் பரிசோதிப்பது குற்றமாக பாவிக்கப்பட்டாலும், சில பணத்தாசை பிடித்த நிறுவனங்கள் காரணமாக சிசுக் கொலைகள் தொடர்ந்து கொண்டுதான் இருக்கின்றன.

ஆண்-பெண் விகிதாசாரப் படி பார்த்தால் கேரளாவில் அதிக பெண்களும், ஹரியானாவில் ஆண்கள் அதிகமாகவும் இருக்கிறார்கள்.  மொத்த இந்தியாவினையும் எடுத்துக் கொண்டால், நகரப் புறங்களை விட கிராமப் புறங்களில் பெண்களின் எண்ணிக்கை குறைந்து கொண்டே வருகிறது என மக்கள் தொகைக் கணக்கெடுப்பு சொல்கிறது.

பெண் நமது எதிர்காலத்தின் அடையாளம் – பெண் இல்லாது நாமேது – நம்மைப் பெற்றெடுத்த தாய் எனும் பெண் இல்லாதிருந்தால் நாமேது!  பெண்களுக்கு நல்ல எதிர்காலத்தினை படிப்பின் மூலமும் பாதுகாப்பின் மூலமும் கொடுக்க ஆவன செய்ய வேண்டியது எல்லோருடைய கடமை.

”பெண்கள் வாழ்கவென்று கூத்திடுவோமடா...  பெண்மை வெல்கவென்று கூத்திடுவோமடா...” என பாரதியார் சொன்னது போல, நாளைய பாரதத்தினை வெற்றிப் பாதையின் வழி நடத்த ஆண் - பெண் பேதமில்லாது குழந்தைகளை சிறந்தவர்களாகவும்,  வளர்ப்போமென உறுதி கொள்வோம்.

நாளைய ஃப்ரூட் சாலட் பதிவில் சந்திக்கும் வரை.....

நட்புடன்

வெங்கட்.

புது தில்லி.

சூர்ப்பணங்கு - நாடகம்

தில்லியில் கடந்த ஐந்தாம் தேதியிலிருந்து இருபதாம் தேதி வரை Bharat Rang Mahotsav 2013 – 15^th Theatre Utsav நடந்தது. அதில் சனிக்கிழமை [19.01.2013] அன்று மாலை 05.30 மணிக்கு திரு. முருகபூபதி அவர்களின் இயக்கத்தில் சூர்ப்பணங்கு நாடகம் நடக்குமென தெரிந்தது. சனிக்கிழமை மாலை என்பதாலும், அன்று விடுமுறை என்பதாலும் நாடகத்தினைக் காண முடிவு செய்தேன்.

தலைநகர் தில்லியின் Mandi House பகுதியில் இருக்கும் Meghdoot Open Air Theatre-க்கு ஐந்தே கால் மணிக்கே சென்று சேர்ந்தேன். ஐம்பது ரூபாய் அனுமதிச் சீட்டு வாங்கிக் கொண்டு, காத்திருந்தேன். ஆறு மணிக்கு, காலணிகளைக் கழட்டி வைத்துவிட்டு உள்ளே செல்ல அனுமதி தந்தார்கள். தில்லியின் குளிரிலும் பல காலுறைகளிலிருந்து வந்த வாடை மூக்கை அடைந்து மூர்ச்சையடையச் செய்யும்படி இருந்தது!

மணல்மகுடி குழுவினரின் இந்நாடகம் ஒரு மணி நேரம் முப்பத்தி ஐந்து நிமிடங்கள் நடுவே இடைவேளை இல்லை என்ற அறிவிப்புடன், ஏழு பாகங்கள் கொண்ட நாடகம் துவங்கியது.  ஒவ்வொரு பாகம் ஆரம்பிக்கும் முன்னர் அந்த பாகத்தின் கதையை இரண்டு பெரிய எல்.சி.டி. திரைகளில் ஆங்கிலத்தில் [தமிழ் தெரியாத தில்லி வாழ் மக்கள் சௌகரியத்திற்காக] விளக்கிச் சொல்லி விட்டு, நாடகத்தினை ஆரம்பித்தார்கள்.

நாடகத்தில் நடிக்கும் ஒரு நபர் வந்து “அந்த சனியனை அமுத்தி தூரப் போடுங்க! அதாங்க அந்த செல்ஃபோன் சனியனை அமுத்தி தூக்கிப் போடுங்க!” என்று வேண்டுகோள் விடுத்தார். சைலண்ட் மோடில் போட்டுவிட்டு நாடகத்தினைக் காண ஆர்வத்துடன் காத்திருந்தேன்.  அதிக நேரம் காத்திருக்க அவசியமில்லாது நாடகம் ஆரம்பித்தது.

மேடையின் ஒரு மூலையில் ஒரு பெரிய வெள்ளைப் பொதி போல இருக்க, அதிலிருந்து நல்லதங்காளாக வெளியே வருகிறார் சூர்ப்பணங்கு.  தாயை அணைத்துக் கொண்டு இருக்கும் குழந்தைகள் போல அவரைச் சுற்றி ஏழு குழந்தைகளும் ஒவ்வொருவராய் வெளியே வந்து தனது பசியைச் சொல்கிறார்கள். பரந்து விரிந்து இருக்கும் இப்பூமியில் பசியால் வாடும் குழந்தைகளுக்கு உணவு அளிக்க இயலாது தன் பிள்ளைகளுடன் மரணத்தை அணைக்கிறாள்.

வைக்கோல் பிரியைக் கூந்தல் போலக் கொண்டு நாடகத்தின் எல்லா பகுதிகளிலும் பெண்கள் படும் கஷ்டங்களை வெளிப்படுத்துகிறார்.  முன்னேற நினைக்கும் எல்லா திசைகளிலும் சமூகம் ஏதோ அடைப்புகளை ஏற்படுத்த, அவர்களை நோக்கி பெருமுழக்கத்தோடு போராடுகிறாள். நடித்திருக்கும் ஒவ்வொரு நடிகர்களும் மிகவும் சிரத்தையோடு அப்பாத்திரங்களாகவே மாறிவிடுகின்றனர்.  கண்களிலும், உடல் அசைவிலும் அப்படியே அந்தப் பாத்திரங்களைக் காண முடிகிறது. 

சில சமயங்களில் அச்சத்தோடும், சில சமயத்தில் ஆங்காரம் கொண்ட வனப்பேச்சியாகவும் வலம் வருகிறாள் அணங்கு. கிராமத்தில் நெல் குத்த பயன்படுத்தும் உலக்கை கொண்டு பூமியைப் பிளந்து விடுவது போல ஆவேசத்தோடு மேடையில் குத்தி, சாட்டை கொண்டு பெண்களை அடிமைப் படுத்தும் அடக்கு முறைக்கு எதிராகப் போராடுகிறாள். அவள் சிந்திய கண்ணீரில் உப்பு நீர் வடிகிறது.  உலக்கை தவிர, சுளகு, துடைப்பம், என பல பொருட்களைக் கொண்டு போராட்டம் நடக்கிறது.

நாடகத்திற்கு இசையும் ஒரு பெரிய பிளஸ். இசையும் திரு முருகபூபதியே தான். அப்படியே ஒவ்வொரு பகுதியின் வெற்றிக்கு பாத்திரங்களின் நடிப்பும், இசையும் போட்டிபோட்டுக் கொண்டு துணை போகின்றன. முழு நாடகத்திலும் அப்படியே ஊன்றி இருக்க முடிந்தது. நாடகத்தின் முடிவில், நாடக நடிகர்களுக்கும், இயக்குனருக்கும், குழுவினருக்கும் கிடைத்த கைதட்டல் ஓசைகளே நாடகத்தின் வெற்றியை பறைசாற்றியது.

நீண்ட நாட்களுக்குப் பிறகு தலைநகர் தில்லியில் ஒரு நல்ல நாடகம் பார்க்கக் கிடைத்தது. நாடகம் நடப்பது பற்றி தகவல் தந்த தில்லிகை நண்பர் திரு ஸ்ரீதரன் அவர்களுக்குத் தான் நன்றி சொல்ல வேண்டும்.

முழுக் கதையையும் இங்கே சொல்லவில்லையே என்ற எண்ணம் உங்களுக்கு வரலாம் – அதற்குக் காரணம் இருக்கிறது. நீங்கள் இருக்கும் பகுதியில் இந்த நாடகம் நடந்தால் நிச்சயம் சென்று பார்க்கவேண்டுமே என்ற காரணம் தான்.

மீண்டும் வேறொரு பகிர்வில் உங்களைச் சந்திக்கும் வரை....

நட்புடன்

வெங்கட்.

புது தில்லி.

கடல் – ஏ. ஆர். ரகுமான் பாடல்கள் – ஒரு பார்வை

அலுவலகத்தில் மலையாள நண்பர் ஒருவர் என்னிடம் வந்து கடல் பாட்டு கேட்டீங்களா? ரொம்ப நல்லா இருக்கு – அதுவும் ”நெஞ்சுக்குள்ளே...” ன்னு ஒரு பாட்டு அப்படியே மனதைக் கட்டிப் போட்டு விட்டது என்று சொல்லவே, எனக்கு முதலில் தோன்றியது – கடல் என்று ஒரு படமா, இல்லை காதல் என்பதைத் தான் இவர் இப்படி சொல்கிறாரோ என்று யோசித்தேன். பிறகு ஒரு நேயர் விருப்பமும் சொன்னார்.

”நெஞ்சுக்குள்ளே” பாடல் வரிகள் எனக்கு வேணும் – தமிழில் இல்லை – ஆங்கிலத்தில் அதன் அர்த்தத்தை எனக்கு எழுதித் தாருங்கள் எனக் கேட்கவே படத்தின் பாடல்களைக் கேட்டேன் – இரண்டு மூன்று முறை. நெஞ்சுக்குள்ளே பாடல் ஷக்திஸ்ரீ கோபாலன் என்ற பெண் பாடியது – பாடல் வரிகள் வைரமுத்து என்று யூ டியூபில் போட்டு இருந்தது.  ”நீர் போன பின்னும் நிழல் மட்டும் போகலியே போகலியே” என்று பாடுவது காதுக்குள்ளேயே கேட்டுக் கொண்டிருக்கிறது. நல்ல பாடல். நிச்சயம் இப் பாடல் ஹிட் ஆகும் எனத் தோன்றுகிறது.

ஏழு பாடல்கள் – அனைத்துமே ரகுமானின் முத்திரைப் பாடல்கள் என்று முதல் முதலில் கேட்ட போதே தெரிந்தது. வித்தியாசமான பாடகர்களை பாட வைப்பது தொடர்கிறது.  அடியே அடியே என்னை எங்க நீ கூட்டிப் போற என்று சித் ஸ்ரீராம் கேட்கிறார் – எங்கே கூட்டிக்கொண்டு போகிறார் என்பது படம் வந்த பின்தான் தெரியும்.

சித்திரை நிலா....  குழந்தையின் அழுகையோடு தொடங்கும் இப்பாடலை பாடியது விஜய் ஜேசுதாஸ். ’எல்லாமே ஒத்தையில நிக்குதுடே.... எட்டு வை மக்கா...’ என நெல்லை மொழியில் கேட்க நன்றாக இருக்கிறது.

”மூங்கில் தோட்டம் மூலிகை வாசம்”  என்ற பாடலைப் பாடியது அபய் ஜோத்பூர்கர் மற்றும் ஹரிணி. ”இது போதும் எனக்கு இதுபோதுமே, வேறென்ன வேணும் நீ போதுமே...”  என்று ஹரணி குரல் அப்படியே அசத்திப் போடுகிறது.

ஏலே கீச்சான் வந்தாச்சு பாடல் கேட்கும் போது ஏனோ இந்திரா படத்தில் வரும் ’ஓடக்கார மாரிமுத்து’ பாடல் மனதில் வந்து போனது. இப்பாடலை பாடியது ரகுமான் மற்றும் குழுவினர். பாடலின் பல வரிகள் புரியவே இல்லை – பல முறை கேட்க வேண்டும் போலிருக்கிறது.

”நீ இல்லையேல் நான் என் செய்வேன்.....” என்று ’அன்பின் வாசலே’ பாடலில் கேட்கிறார் ஹரிசரண்.  காதலி கூட இல்லாதது கஷ்டம் தான் :) ஆனால் பாடலில் ஹரிசரண் குரலை விட கோரஸ் பாடகர்கள் குரல் தான் அதிகம் கேட்கிறது. இன்னும் சில முறை கேட்க வேண்டும் போலிருக்கிறது. ’மகுடி, மகுடி’ பாடலும் அப்படியே.....

நெஞ்சுக்குள்ளே பாடல் யூ-ட்யூபில் இருக்கிறது – MTV Unplugged நிகழ்ச்சியில் வந்தது எனப் போட்டிருக்கிறார்கள்.  ஆடியோ கேட்க http://gaana.com/#!/albums/kadal-english தளத்திற்குச் செல்லலாம்.

படத்தில் இரண்டு அறிமுகங்கள் என செய்திகள் – கௌதம் கார்த்திக் மற்றும் துளசி. துளசியை கேரளாவிலிருந்து இறக்குமதி செய்திருக்கிறார். ரோஜா நாயகன் அரவிந்த்சாமியும் இப்படத்தின் மூலம் திரையுலகுக்குத் திரும்புகிறார். அர்ஜூன், பசுபதி, தம்பி ராமையா போன்றவர்களும் நடித்திருக்கும் இப்படம் வெளிவரும்போது பார்க்க நினைத்திருக்கிறேன். மணிரத்னம் இயக்கி வெளியான ராவணன் போல இது இருக்காது என நம்புவோம்!  

மொத்தத்தில் ஏழு பாடல்களில் ஐந்து பாடல்கள் நன்றாக இருக்கிறது – அதாவது எனக்குப் பிடித்திருக்கிறது. உங்களுக்கும் பிடிக்கலாம் – கேட்டுச் சொல்லுங்களேன் நண்பர்களே..... 

மீண்டும் வேறொரு பகிர்வில் சந்திக்கும் வரை....

நட்புடன்

வெங்கட்.

புது தில்லி.

கொஞ்சிக் கொஞ்சி பேசி.....

என்ன ஞாயிறன்று புகைப்படங்கள் பகிர்வது தானே உங்கள் வழக்கம்? இன்று என்ன பாடலா – அதுவும் ’கொஞ்சிக் கொஞ்சி பேசி மதிமயக்கும்” எனும் பழைய பாடலா? என்று கேட்டால்.....

இல்லை நண்பர்களே இன்று நிச்சயம் புகைப்படப் பகிர்வு தான்...  அதுவும் ஒரே ஒரு புகைப்படம் மட்டுமே. சமீபத்திய பயணத்தின் போது எடுத்த ஒரு புகைப்படம் இன்றைய பகிர்வு.

இந்தப் பறவையின் ஆங்கிலப் பெயர் VULTURINE GUINEA FOWL.  அறிவியல் பெயர் ACRYLLIUM VULTURINUM என்பது. தமிழில் இந்தப் பறவையை என்ன பெயர் கொண்டு அழைப்பார்கள் என தெரிந்தவர்கள் சொன்னால் நல்லது!

கிட்டத்தட்ட ஐந்து நிமிடங்களுக்கு மேல் கொஞ்சிக் கொண்டன. நானும் புகைப்படங்கள் எடுத்துத் தள்ளினேன்! என்ன ஒரே கஷ்டம் – அவை கூண்டுக்குள் – அதனால் முழுமையான தோற்றத்தினை எடுக்க முடியவில்லை!

“ஏண்டா நாங்க காதலிக்கறத இப்படி ஃபோட்டோ எடுக்கறயே, உனக்கு வெக்கமா இல்லை?” என்று பறவைகள் கேட்டு விடுமோ என பயந்து அங்கிருந்து விலகினேன் – சிறிது தூரம் சென்று சற்றே கழுத்தினைத் திருப்பி மெல்லப் பார்த்தால் அவ்விரண்டு பறவைகளும் விலகவே இல்லை!  

நான் ரசித்த இந்தப் பறவைகளின் புகைப்படம் இதோ உங்கள் பார்வைக்காக!

மீண்டும் அடுத்த வாரம் ஞாயிறன்று வேறு சில புகைப்படங்களோடு உங்களைச் சந்திக்கும் வரை....

நட்புடன்

வெங்கட்.

புது தில்லி.

ஃப்ரூட் சாலட் – 29 – மாதவிடாய் – ஆவணப்படம் - சரிதாயணம்

இந்த வார செய்தி:

இந்த மாதத்தின் இரண்டாம் சனிக்கிழமை அன்று “தில்லிகை” அமைப்பின் பன்னிரெண்டாவது கூட்டம் தில்லி தமிழ்ச் சங்கத்தின் பாரதி கலையரங்கில் நடைபெற்றது. அதில் முதல் நிகழ்வாக திருமதி கீதா இளங்கோவன் இயக்கிய ஆவணப்படமான “மாதவிடாய்” திரையிடப்பட்டது. இப்படம் பற்றி இணையத்தில் சில வலைப்பதிவாளர்கள் ஏற்கனவே எழுதிய போது படத்தினை பார்க்க ஆவலாகயிருந்தேன். அது இப்போது நிறைவேறியது.

”மாதா மாதம் இரத்தப் போக்கு ஏலாலம்படி ஏலோ” என்ற பாடல் பின்னணியில் ஒலிக்க, பெண்கள் மாதவிடாய் காலங்களில் சந்திக்கும் பிரச்சனைகள் பற்றி எல்லோரும் புரிந்துகொள்ள ஆவணப்படமாக எடுத்திருக்கிறார். படம் பற்றி சொல்லும்போதே ”ஆண்களுக்கான பெண்கள் படம்” என்று தான் சொல்கிறார்கள்.

தமிழக சட்டமன்ற உறுப்பினர் பாலபாரதி, டாக்டர் தமிழிசை சௌந்தர்ராஜன், திலகவதி IPS போன்றவர்களிடம் மாதவிடாய் பிரச்சனைகள் பற்றிய கருத்துகளைக் கேட்பது மட்டுமல்லாது, பள்ளிகள், பேருந்து நிலையங்கள், கல்லூரிகள் போன்று பொதுமக்கள் புழங்குமிடங்களில் மாதவிடாய் காலங்களில் பெண்கள் படும் அவஸ்தைகள் பற்றி நமக்குச் சொல்லிப்போகிறது 38 நிமிடங்கள் ஓடும் இந்த ஆவணப்படம்.

ஒரு கிராமத்தில் இதற்காகவே தனியாக ஒரு அறை கட்டி வைத்திருப்பது – அதில் எந்த விதமான சௌகரியங்களும் – மின்சாரம், கழிப்பறை – போன்ற எந்த விதமான சௌரியங்களும் இல்லாத இடத்தில் தங்க வைப்பது பற்றி படிக்கும்போது எனது அம்மா தனது சின்ன வயதில் இப்படிப் பட்ட இடத்தில் பட்ட கஷ்டங்களைப் பகிர்ந்து கொண்டது நினைவுக்கு வந்தது.

ஆவணப் படம் பார்த்த பிறகு, ”பெண்மை” என்ற தலைப்பில் முனைவர் உமாபாரதி, ”பெண்மை வாழ்க என்று கூத்திடுவோமடா” என்ற தலைப்பில் முனைவர் கே. நாச்சிமுத்து மற்றும் ”இன்றைய சூழலில் பெண்மை” என்ற தலைப்பில் பண்பாட்டு அமைச்சகத்தில் பணிபுரியும் திருமதி சத்யா அசோகன் ஆகியோர் பேசினார்கள். பிறகு கலந்துரையாடலும் நடந்தது.

ஒவ்வொரு மாதமும் இரண்டாம் சனிக்கிழமை மதியம் 03.00 மணிக்கு நடக்கும் தில்லிகை இலக்கியக் கூட்டம் என் போன்ற தில்லிவாசிகளுக்கு நல்ல ஒரு வாய்ப்பு. இந்த மாதக் கூட்டத்தில் பார்த்த ஆவணப்படம் நிச்சயம் எல்லா ஆண்கள் மட்டுமல்லாது பெண்களும் பார்க்கவேண்டிய ஒன்று.  வாய்ப்பு கிடைக்கும்போது நிச்சயம் அனைவரும் பாருங்கள்.

 

இந்த வார முகப்புத்தக இற்றை:

எல்லோருடைய வாழ்க்கையும் ஒரு மெழுகுவர்த்தி போலதான். தூரத்தில் இருந்து பார்த்தால் ஒளி மட்டும் தெரியும். அருகில் சென்று பாருங்கள் அவர்கள் உருகி கண்ணீர் வடிப்பது தெரியும்.

இந்த வார குறுஞ்செய்தி: 

THE BEST LESSON OF LIFE – ‘DON’T GET FRUSTRATED DOING CONTINUOUS WORK WITHOUT ANY RESULTS; SOMETIMES THE LAST KEY OF THE BUNCH OPENS THE LOCK’.

ரசித்த புகைப்படம்: 

இந்த மூன்று குழந்தைகளையும் பார்க்கும்போது உங்கள் சிறுவயதில் நீங்கள் செய்த குறும்புகளை நிச்சயம் உங்கள் மனக்கண்ணில் முன்னே நிறுத்தி இருக்குமெனெ நம்புகிறேன். நான் பிடித்துத் தொங்கிய மாமரக் கிளைகள் எனக்கு நினைவுக்கு வந்தது!

  

ரசித்த பாடல்: 

தீபம் படத்தில் கே.ஜே. யேசுதாஸ் மற்றும் எஸ். ஜானகி குரலில் ”பூவிழி வாசலில் யாரடி வந்தது கிளியே கிளியே” என்ற பாடல் நான் ரசித்த, ரசிக்கும் பாடல்களில் ஒன்று. இதோ உங்கள் ரசிப்பிற்காய் இங்கே காணொளியாய்....

 

ரசித்த காணொளி:

தமிழ் சினிமா தெரிந்த எல்லோருக்கும் எல்லிஸ் டங்கனையும் தெரிந்திருக்கும்.  அவர் எடுத்த ஒரு குறும்படம் – சுமார் பதினான்கு நிமிடங்கள் ஓடக்கூடியது – இதோ இன்று உங்கள் பார்வைக்கு....  மதுரை வீரன், ஜல்லிக்கட்டு என பல விஷயங்களைத் தொட்டுச் செல்கிறது இப்படம். சற்றே நேரமெடுத்து ரசியுங்கள் நண்பர்களே.....

படித்ததில் பிடித்தது:

நண்பர் பால கணேஷ் அவர்கள் தனது வலைப்பூவில் எழுதிய சரிதா பதிவுகளைத் தொகுத்து ”சரிதாயணம் @ சிரிதாயணம்” என்ற புத்தகமாக வெளியிட்டு இருக்கிறார். சமீபத்திய தமிழகப் பயணத்தின் போது எழுத்தாளர் பால கணேஷ் தனது கையொப்பமிட்டு சரிதாயணம் புத்தகத்தை எனக்குத் தந்ததில் மட்டற்ற மகிழ்ச்சி. இந்தப் புத்தகம் வாங்கிப் படிப்பவர்கள் நிச்சயம் சிரித்து மகிழ்வார்கள் என்பதில் சந்தேகமில்லை. கூடுதலாக அவரது வரலாற்றுப் புனைவான சிரித்திரபுரமும் இப்புத்தகத்தில் படிக்கக் கிடைக்கும். புத்தகத்தினை வாங்கி தாங்களும் படித்து, தங்களது நண்பர்களுக்கும் பரிசாக வழங்கலாம். புத்தகம் கிடைக்குமிடம் “ழகரம் புத்தகச் சோலை, 8/36, ஜோதி ராமலிங்கம் தெரு, மேற்கு மாம்பலம், சென்னை – 33.  புத்தகத்தின் விலை அப்படி ஒன்றும் அதிகமில்லை நண்பர்களே – ரூபாய் 60 மட்டுமே. சிரிப்பதற்கு இவ்வளவு பணம் செலவு செய்வதில் தப்பில்லை!

மீண்டும் ஃப்ரூட் சாலட்-உடன் அடுத்த வெள்ளியன்று சந்திக்கும் வரை…

நட்புடன்

வெங்கட்.
புது தில்லி.