ரௌடிகளின் வகுப்பு

ரசித்த குறும்படங்கள் பகிர்வு வெளியிட்டு சில மாதங்கள் ஆகிவிட்டன.  தொடர்ந்து புதன் கிழமைகளில் ரசித்த குறும்படங்கள் பற்றி எழுதி வந்தது உங்களுக்கு நினைவில் இருக்கலாம். சற்றே இடைவெளிக்குப் பிறகு இன்று மீண்டும் ஒரு குறும்படம் பற்றிய பகிர்வு. 

இரண்டொரு நாட்களுக்கு முன்னர் ஆசிரியர்கள் மற்றும் மாணவர்களுக்கு இடையேயான பந்தம் பற்றிய சில பதிவுகளை படிக்க நேர்ந்தது. ஒரு ஆசிரியர் எப்படி இருக்க வேண்டும், மாணவர்களை எப்படி நல்ல நிலைக்கு கொண்டு வர வேண்டும் என்பது பற்றியெல்லாம் அவ்வப்போது படித்துக் கொண்டு தான் இருக்கிறோம்.  மாணவர்கள் களிமண் போன்றவர்கள் – ஆசிரியர்கள் எப்படி அவர்களை வடிவமைக்கிறார்களோ அந்த நிலைக்கு அவர்கள் வருகிறார்கள் என்றும் சொல்வதுண்டு.

இக் காணொளியில் நாம் காணப்போவதும் இப்படி ஒரு வகுப்பறை தான்.  பள்ளியில் ஆசிரியராக சேர்ந்த முதல் நாளே “Class of Rowdies” என்று அழைக்கப்படும் வகுப்பில் பாடம் நடத்த வேண்டிய கட்டாயம் அந்த ஆசிரியருக்கு.  அங்கே தனக்கு கிடைத்த அனுபவம் அவரை நோகடிக்கச் செய்கிறது.  பள்ளியில் ஏற்கனவே பணிபுரியும் ஆசிரியர்கள் சிரித்தபடியே “எப்படி இருந்தது முதல் நாள் அனுபவம்?” என்று கேட்க, பதில் சொல்லாது வெளியேறுகிறார்.

அடுத்த நாள் அவர் என்ன செய்தார்? மாணவர்களை எப்படி அவர் மாற்றினார், அவர்களின் நற்திறமைகளை வெளிக்கொணர என்ன செய்தார் என்பதை மிக அழகாகச் சொல்லி இருக்கிறார்கள் இக்குறும்படத்தில். 

இது ஆசிரியர்-மாணவர் ஆகியோருக்கு மட்டும் பொருந்தாமல் பெற்றோர்-குழந்தைகள் ஆகியோருக்கும் பொருந்தும் என எனக்குத் தோன்றியது.  இக்குறும்படத்தினை நீங்களும் பார்த்து, உங்கள் கருத்துகளைச் சொல்லுங்களேன்!

என்ன நண்பர்களே, நிதின் தாஸ் என்பவரின் தயாரிப்பில் உருவான இக்குறும்படத்தினை ரசித்தீர்களா?

மீண்டும் சந்திப்போம்!

நட்புடன்

வெங்கட்

புது தில்லி.