அக்கா – துளசி கோபால்

தலைவர் ரஜினி நடித்த[?] சிவாஜி படத்தில் சாலமன் பாப்பையா “வாங்க பழகலாம்” என்று சொன்னது போல சந்தியா பதிப்பகம் வெளியிட்டு இருக்கும் “அக்கா” புத்தகத்தின் முதல் பக்கத்திலேயே இப்படி ஒரு அழைப்பு:

“அக்காக்கள் அற்புத ஜீவன்கள். அப்படி ஒரு அக்காவோடு பழகலாம் வாங்க!”

வீதியோரங்களில் நடந்து போகும் சமயம் சின்னதா ஒரு மூணு நாலு வயசுக் குழந்தை, தன்னை விட இன்னும் சின்னஞ்சிறுசான குழந்தையொன்னை தூக்கமுடியாமல் இடுப்பில் சுமப்பதைப் பார்க்கும்போதெல்லாம் மனசு தவிச்சுப் போகும். ஆனால் சுமக்கும் குழந்தையின் முகத்தில் சோர்வோடுகூடவே ஒரு பெருமிதமும் இருப்பதைக் கவனிச்சு இருக்கீங்களா? இது ஏன்? ஏன்னா….  அது ஒரு அக்கா!

இப்படி முதல் பக்கத்திலேயே ஒரு அற்புதமான அழைப்பு வந்த பிறகு புத்தகத்திற்குள் செல்லாமல் இருக்க முடியுமா? வாங்க புத்தகத்திற்குள் நுழைந்து பழகலாம்!

அக்காவின் கல்யாணத்தில் தான் ஆரம்பிக்கிறது கதை.  “மாப்பிள்ளை பொண்ணு ஊர்வலத்தில் குனிஞ்ச தலை நிமிராம நடந்து வந்த அக்கா, மாப்பிள்ளை வீட்டைத் தலைநிமிர்ந்து பார்த்துச்சு. கண்ணுலே குத்தாலம்…..” பெண் பார்க்க வந்த அன்று அப்போதைய சிறுமி, இன்றைய துளசி டீச்சர் எட்டுரூக்கு கேட்கும்படி கேட்ட கேள்வி – ”யாரு மாப்பிள்ளை? பெரிய பெரிய பல்லுவச்சிக்கிட்டு இருக்காரே? அவரா?”

பள்ளி காலத்தில் சக மாணவ/மாணவிகளை அடித்து விட்டு சுவற்றில் இருக்கும் ஓட்டை வழியே ஓடி வருவது, இரண்டாவது அக்காவுடன் பூவுக்குச் சண்டை போடுவது, புத்தக ஆசிரியர் செய்த குறும்புகள் என சந்தோஷமாகச் சென்றாலும், புத்தகம் ஆரம்பிக்கும்போது சொன்ன மாதிரி பல வித சோகங்களைச் சொல்லிப் போகிறாள் – அக்கா.

என்னதான் சிறு வயதில் அக்கா, தம்பி, தங்கை என்ற பாசமும், அதை வெளிக்காட்டுவதும் இருந்தாலும், வளர்ந்த பிறகு பாசம் எல்லாம் அவரவர் குடும்பத்திலும், குழந்தைகள் மீதும் மாறி விடுகிறது. அதே தான் இப்புத்தகத்திலும். அத்தனை ஆசையாக இருந்த அக்கா, தனது குடும்பச் சூழலில் மூழ்கிவிட, அக்காவினை விட்டு விலகிச் சென்றுவிட்ட உணர்வு ஆசிரியைக்கும் படிக்கும் நமக்கும் வருகிறது.

தொடர்ந்து குழந்தைகளை பெற்று கஷ்டப்படும் அக்கா, இரண்டாவது அக்காவின் கல்யாணம், குழந்தைகளை தனியாக வளர்த்த அம்மா, பல வருடங்கள் கழித்து சந்தித்த அப்பா, வீட்டினரை எதிர்த்து அப்பாவை அவர் தங்கியிருந்த வெளியூரிலிருந்து அழைத்து வந்து வீட்டினரின் அதிருப்திக்கு ஆளானது, விலக்கி வைக்கப்பட்ட சித்தப்பா சித்தி உறவு என பல இடங்களில் சோகம்.

கதையின் பெரும்பாலான இடங்களில் நாமும் கூடவே இருப்பது போல ஒரு உணர்வு.  வத்தலகுண்டு வீட்டிற்கு நாமும் சென்று விட்ட உணர்வு நமக்கு வந்துவிடும்.  இப்படிப் பட்ட ஒரு புத்தகத்தினைப் படிக்கும் போது நம்மையும் அந்த உணர்வுகளை புரிந்து கொள்ள வைப்பது ஆசிரியரின் வெற்றி என்று தான் சொல்ல வேண்டும்.

புத்தகத்தினை படிக்கும் போது நமக்கும் அக்காவுடன் இருந்த நாட்கள் மனதில் வந்து போகும்.  நான் முதன் முதலாக நெய்வேலி பள்ளியில் சேர்ந்தபோது பாதி நேரம் என் வகுப்பினை விட்டு அக்காவின் வகுப்பில் தான் உட்கார்ந்திருப்பேனாம்.  இத்தனைக்கும் எனக்கு வந்த ஆசிரியரான காலஞ்சென்ற திருமதி நாமகிரி அவர்கள் அத்தனை அற்புதமான, ஆசையான ஆசிரியர்.  அக்காவின் கைகளைப் பிடித்தபடியே பள்ளிக்குச் சென்று வந்ததை இன்றைக்கும் சொல்வார்கள்.

வலைப்பூவில் வெளியிட்டு பிறகு புத்தகமாக வந்திருப்பது புத்தகத்தில் நிறைய இடங்களில் தெரிகிறது. உதாரணத்திற்கு ஒன்று – “கல்யாணப் பொண்ணுக்குப் புடவை, வழக்கமான காஞ்சீபுரம் பட்டுப் புடவையா எடுக்காம, பனாரஸ் பட்டுன்னு வெலவெலன்னு ஒன்னை வாங்கியிருந்தார். [அதை பிற்காலத்தில் நாந்தான் கட்டிக் கிழிச்சேன். அதைப் பத்தி அப்புறம் சொல்றேன்]”  - புத்தகத்தில் இது பற்றி சொல்லாத போது அப்புறம் சொல்றேன்னு சொல்லி இருப்பதை எடுத்து இருக்கலாம்! இம்மாதிரி இரண்டொரு இடங்கள்.  இதை ஒரு குறை என்று சொல்லவில்லை. தவிர்த்திருக்கலாம் என்று தான் சொல்கிறேன்!

அக்காவின் கல்யாணத்தில் ஆரம்பித்த புத்தகம் அப்பாவின் இறப்பில் முடிகிறது.  அதுவும் அந்த முடிவு – ‘மெட்ராஸுக்கு ரயில் புடிக்க ஸ்டேஷனுக்குள்ளே போனப்பவும் அண்ணன் டிக்கெட்டு கவுண்டர்கிட்டே நின்னுக்கிட்டு இருந்தார். அதே ரயிலுக்குத்தானே நானும் போகணும். அவர் நகர்ந்து போகட்டுமுன்னு இருந்துட்டு நானும் போய் டிக்கெட்டு வாங்கிக்கிட்டு வண்டி வந்ததும் லேடீஸ் பெட்டியில் ஏறிட்டேன். அதுக்குப் பிறகு அவரை நான் பார்க்கவே இல்லை!” அப்பாடி என்னவொரு முடிவு. 

”உண்மைக்கதைகளை எழுதும்போது மகிழ்ச்சியான முடிவுகள் பெரும்பாலும் வர்றதில்லை” என்று சொல்லி ஒரு கற்பனையான மகிழ்ச்சியான முடிவையும் சொல்லி இருந்தாலும், எனக்கென்னவோ இந்த உண்மையான முடிவுதான் சரியாக இருப்பதாகத் தோன்றுகிறது.

நீங்களும் உங்கள் அக்காவினை நினைத்துக்கொள்ள புத்தகத்தினை படிக்கலாமே…..  புத்தகம் பற்றிய விவரங்கள் கீழே.

புத்தகத்தின் தலைப்பு:       அக்கா

பதிப்பகம்           :    சந்தியா பதிப்பகம்.

பதிப்பக முகவரி      :    புதிய எண் 77, 53வது தெரு,

9வது அவென்யூ, அசோக் நகர்,

சென்னை -600083.

தொலைபேசி எண்     :     044-24896979.

புத்தகத்தின் விலை   :     ரூபாய் 100/-

பக்கங்கள் எண்ணிக்கை     :     136.

மீண்டும் வேறொரு வாசிப்பனுவபத்துடன் உங்களைச் சந்திக்கும் வரை…..

நட்புடன்

வெங்கட்

புது தில்லி.

டிஸ்கி:  ஆசிரியரின் பிற நூல்கள் - ஃபிஜித்தீவு, என் செல்லச் செல்வங்கள், மற்றும் நியூசிலாந்து.

இப்புத்தகத்திற்கான மற்றுமொரு வாசிப்பனுபவம் அக்கா - என் பார்வையில்....! [சும்மா ஒரு விளம்பரம் தான்!]