காதல் கடிதத்தைத் தேடி - குறும்படம்

அனைத்து நண்பர்களுக்கும் இனிய காலை வணக்கம். இன்றைய பொழுதை ஒரு இனிமையான வாசகத்துடன் ஆரம்பிக்கலாம்.

காரணம் இல்லாமல் யார் மீதும் காதல் வருவதில்லை… ஆனால் அந்த காரணம் தான் யாருக்கும் புரிவதில்லை.

கடந்த வாரத்தில் பார்த்த ஒரு குறும்படம் பற்றிய தகவலோடு இந்த ஞாயிறில் உங்கள் அனைவரையும் சந்திப்பதில் மகிழ்ச்சி.  இந்த வாரம் ஒரு தமிழ் குறும்படம்! உங்களில் சிலர் பார்த்திருக்கலாம்.  சற்றேறக்குறைய 29 நிமிடங்கள் ஓடக் கூடிய குறும்படம் – ஆர்.வி. சரண் இயக்கத்தில்.  விக்னேஷ்குமார் என்பவர் முக்கிய பாத்திரத்தில் நடித்திருக்கிறார்.  படத்தினை நீங்கள் பார்ப்பதற்கு முன்னர் சில வார்த்தைகள்.

இளைஞன் ஒருவன் தனது வாழ்க்கையில் முன்னேறத் துடித்துக் கொண்டிருக்கிறார். தனது அப்பா-அம்மாவின் 25-ஆவது வருட திருமண நாளுக்கு நல்லதொரு பரிசு தர நினைக்கிறார். அந்த நேரத்தில் தான் தனது அப்பா, திருமணம் செய்து கொள்வதற்கு ஒரு மாதத்திற்கு முன்னர் எழுதிய கடிதம் – வந்து சேராத கடிதம் – பற்றி தெரிந்து கொள்கிறார்.  ஹிமாச்சலப் பிரதேசத்தின் கடைசி தபால் நிலையமான ஹிக்கிம் என்ற இடத்திலிருந்து கடிதம் அனுப்புகிறார். அதற்குள் அங்கே நிலச்சரிவு ஏற்படுகிறது.  அவர் எழுதிய அந்த காதல் கடிதம் வந்து சேரவே இல்லை! இதனைத் தெரிந்து கொண்ட அந்த இளைஞன், தில்லியில் வேலைக்கு நேர்காணல் என வீட்டில் சொல்லி விட்டு, நண்பர்கள் உதவியுடன் ஹிக்கிம் நோக்கி பயணிக்கிறார்.  இந்த இடத்தில் ஒரு விஷயம் சொல்ல வேண்டும் – ஹிமாச்சலப் பிரதேசத்தின் மலைப்பகுதிகளுக்கு இப்படி பயணம் செய்வது ஒரு ஸ்வாரஸ்ய அனுபவம். அங்கே செல்ல முடியாதவர்கள் இந்தக் குறும்படத்தின் வழி அங்கே பயணம் செய்த அனுபவம் பெற முடியும் – அழகாக படம் பிடித்து இருக்கிறார்கள் படக் குழுவினர். கடினமான பாதையில் பயணித்து அங்கே சென்று கடிதத்தினை கண்டு பிடிக்க முடிந்ததா? இல்லையா என்பதை படத்தினை பார்த்து தெரிந்து கொள்ளுங்களேன்.

காணொளியாக இணைத்திருந்தாலும், சில சமயங்களில் யூவில் சென்று தான் பார்க்க வேண்டும் என வரலாம். அதனால் கீழே யூட்யூப் சுட்டியும் கொடுத்திருக்கிறேன். அங்கேயும் சென்று பார்க்கலாம்!

https://www.youtube.com/watch?v=2bkgljJrX6Q

ஒரு சில விஷயங்கள் சினிமாவுக்கு மட்டுமே ஒத்து வரும் என்று தோன்றினாலும் (உதவி செய்யும் மந்திரியின் காரியதரிசி ஒரு உதாரணம்!) படம் நன்றாக எடுத்திருக்கிறார்கள்.  நல்லதொரு குறும்படம்.  நண்பர்களே, கால் நூற்றாண்டு காதல் என்ற தலைப்பில் வெளிவந்த இந்தக் குறும்படம் உங்களுக்குப் பிடித்ததா? இந்தக் குறும்படம் பற்றிய உங்கள் கருத்துகளைச் சொல்லுங்களேன். விரைவில் வேறு ஒரு பதிவுடன் மீண்டும் ச[சி]ந்திப்போம்...

நட்புடன்

வெங்கட்

புது தில்லி