பளிங்கினால் ஒரு மாளிகை…

[மத்தியப்பிரதேசம் அழைக்கிறது…. பகுதி-18]

(மத்தியப்பிரதேசம் அழைக்கிறது தொடரின் பகுதி  1   2   3   4   5   6   7   8   9   10   11   12 13 14 15 16 17)

சென்ற பகுதியில் குடைகள் பற்றி சொல்லும் போது, மஹாராணியின் குடை, 125 வயதான ”கதம்” மரம், சிவலிங்கத்தின் சிறப்புகள் பற்றி பார்த்தோம். அடுத்து நாம் பார்க்கப் போவது பளிங்கினால் ஒரு மாளிகை…  கொஞ்சம் பொறுங்க நான் சொல்லப்போவது ”வல்லவன் ஒருவன்” படத்தில் வரும் பாடலைப் பற்றியது அல்ல.

மஹாராஜா மாதோ ராவ் சிந்தியா அவர்களுக்கான குடை தான் இந்த ”பளிங்கினால் ஒரு மாளிகை….”  அப்பப்பா..  எத்தனை கலை நுணுக்கத்தோடு கூடிய வேலைப்பாடுகள்.  பளிங்குக் கற்களில் கட்டப்பட்ட தூண்கள், அத்தூண்களின் நடுநடுவே வேறு கற்களைக் கொண்டு செய்யப்பட்ட பறவை, வண்ணத்துப்பூச்சி, பூக்கள் என எல்லாமே அருமை. 

பூக்களின் வடிவங்கள், வேலைப்பாடுகள் எல்லாமே விலை மதிப்புள்ள கற்கள், படிமங்கள் கொண்டு தயாரிக்கப்பட்டிருக்கின்றன.  கைவிளக்கு கொண்டு அக்கற்கள் மேல் ஒளிபாய்ச்ச, ஒளி கற்களை ஊடுருவி செல்லும் விதமாய் இருக்கிறது. எத்தனை விதமான வேலைப்பாடுகள்… ஆச்சரியமளிக்கும் விதமாகக் கட்டப்பட்டு இருக்கிறது.  அங்கிருந்து வெளியே வரவே மனமில்லை. 

இந்த மாளிகைக்குள் செல்ல நிறைய பூ வேலைப்பாடுகள் செய்யப்பட்ட வெள்ளிக் கதவுகள் இருக்கின்றன.  மேலும் பளிங்குக் கற்களால் ஆன கதவுகளும், ஜன்னல்களும் இருக்கின்றன.  பளிங்கு கதவுகள் எனும் போது நிச்சயம் அதன் எடை அதிகமாகத்தான் இருக்கும்.  “எப்படி திறந்து மூடுவது?” என்ற கேள்வி எங்கள் அனைவரின் மனதிலும். அதற்கும் பதில் இருந்தது திரு மோஹிதே அவர்களிடம். 

இந்த கதவுகள் பிணைக்கப்பட்டிருப்பது வெள்ளியால் ஆன பிணைப்புகளால் [HINGES].  இரண்டு  வயதே ஆன சிறுவனால் கூட இதனை சுலபமாகத் திறந்து விட முடியும் என்று கூறிய அவர் அதை இரண்டு விரல்களாலேயே திறந்தும் காட்டினார். 

குடைக்குள்ளே திரு மாதோ ராவ் சிந்தியா அவர்களின் முழு உருவச் சிலை இருக்கிறது.  அவரின் சிலைக்கு முன்னே ஒரு சிவலிங்கமும், அதற்கு முன் ஒரு கரு வண்ண நந்தியின் சிலையும் இருக்கிறது.  எதிரே இருக்கும் அரங்கத்தில் வேலைப்பாடுகள் நிறைந்த பளிங்குக் கல் தூண்கள் தவிர, இரண்டு அலங்கார விளக்குகளும், வெள்ளி, தங்கம் ஆகியவற்றால் அலங்கரிக்கப்பட்ட கூரைகளும் இருக்கின்றன.  இங்கும் மரத்தினால் ஆன இறக்கைகள் கொண்ட மின்விசிறிகள் இருக்கின்றன. 

மஹாராணி குடைக்குள் இருந்த மின்விசிறிகளுக்கும் மஹாராஜா குடைக்குள் இருந்த மின்விசிறிகளுக்கும் இருந்த வித்தியாசம் – மஹாராஜாவின் குடையில் இருந்த மின்விசிறிகளில் தங்கத்தினால் அலங்காரங்கள் செய்யப்பட்டிருக்கிறது.  அந்தக் காலத்தில் ஆண்களுக்கும் தங்கத்தின் மேல் மோகம் இருந்திருக்கிறது போல!  உடனே இப்போதிருக்கும் ஆண்களுக்கு தங்கத்தின் மீது மோகம் இல்லையா என்று கேட்கும் சக பதிவர்களுக்கு, ”இது என்னுடைய கருத்து அல்ல, என்னுடன் வந்த மிசோ மாநில பெண்மணியின் கருத்து” என்பதை சொல்லிக் கொள்ள விழைகிறேன்… [அப்பாடா நான் தப்பித்தேன்….]

சுற்றிச் சுற்றி இருக்கும் பலவித அதிசயங்களையும் பார்த்து ”நமக்கும் யாராவது இப்படி குடை கட்டுவார்களா?” என்று யோசித்தபடிதான் நாங்கள் எல்லோரும் இருந்தோம் என்பது மறுக்கமுடியாத உண்மை.  

இந்த இரண்டு குடைகளும் அமைந்திருக்கும் இடத்தில் நிறைய மரங்களும், பூச்செடிகளும் அமைத்திருக்கிறார்கள்.  வெளியே வர மனமில்லையெனிலும் வெளியே வந்துதானே ஆகவேண்டும் என்பதால் வெளியே வந்தோம். 

வரும்போது கிருஷ்ணர் கோவிலுக்கு எதிரே ஒரு நீண்ட நான்கு பேர் அமரக்கூடிய கல்லால் ஆன இருக்கை ஒன்று இருந்தது.  நீண்ட நேரம் கால்கடுக்க சுற்றியதற்கு இதமாய் இருந்தது.  ஒரே பளிங்குக் கல்லினால் ஆன இந்த இருக்கையில் நிறைய வேலைப்பாடுகள் செய்யப்பட்டு இருந்தன.  சிறிது நேரம் அமர்ந்து இளைப்பாறிவிட்டு, நாங்கள் தங்கியிருந்த இடம் வந்து சேர்ந்தோம். 

மதிய உணவு எடுத்துக் கொண்டபின் நாங்கள் சென்ற இடம் பற்றி அடுத்த பதிவில் தெரிவிக்கிறேன்.  நம் வனங்களில், நாட்டில் இருக்கும் பல விதமான மரங்கள் மூலம் நமக்குக் கிடைக்கும் சில பொருட்கள் எப்படி பயன்படுகின்றன என்பது பற்றி பார்க்கலாம் அடுத்த பகிர்வில்.

மீண்டும் சந்திப்போம்…..

வெங்கட். 

சிந்திய பால்…

அறிவில் சிறந்த  பெரியவர் ஒருவர் சொற்பொழிவாற்ற வந்திருந்தார்.  அவர் பேசுவதைக் கேட்க நிறைய பேர் திரண்டிருந்தனர்.    பெரியவர் ஒரு நகைச்சுவையான விஷயத்தினைச் சொன்னார்.  கூட்டத்தில் இருந்தவர்கள் எல்லோரும் கரவொலி எழுப்பி சிரித்து மகிழ்ந்தனர்.  கரவொலி அடங்கியது. 

ஒரு சில விநாடிகளுக்குப் பிறகு அதே நகைச்சுவையைத் திரும்பச் சொன்னார்.  திரும்பவும் கேட்ட பிறகு சிலர் சிரித்து மகிழ்ந்தனர்.  சிரிப்பொலி அடங்கிய பின்னர் மீண்டும் ஒரு முறை அதே நகைச்சுவையைச் சொன்னார். இப்போது  சிரித்து மகிழ்ந்தவர்கள்/கரவொலி எழுப்பியவர்கள் எண்ணிக்கை குறைந்தது.

திரும்பத் திரும்ப சொன்னார். கடைசியில் யாருமே சிரிக்கவில்லை. கூட்டத்தில் இருந்தவர்களுக்கு என்னமோ போல் இருந்தது.  எதற்காக  இவர் ஒரே நகைச்சுவையை திரும்பத் திரும்ப சொல்கிறார் என்பது புரியவில்லை.

அப்போது அந்தப் பெரியவர் கூட்டத்தினரைப் பார்த்து சிரித்தபடியே பேச ஆரம்பித்தார்.   ”நகைச்சுவையாக இருந்தாலும், ஒரே விஷயத்தினைக்  கேட்டு/நினைத்து நம்மால் சிரிக்க முடியாதபோது கஷ்டம் வந்தால் மட்டும் அதனை நினைத்து நினைத்து அழுவது எதற்காக, அப்படி அழுவதால் என்ன பலன்? அந்த நிகழ்விலிருந்து மீண்டு அடுத்தது என்ன என்ற எண்ணம் வரவேண்டும், முன்னே செல்ல வேண்டும்” என்று கூட்டத்தில் சொன்னாராம். எத்தனை உண்மையான வார்த்தைகள்!

நம்மில் எத்தனை பேரால் இப்படி இருக்க முடிகிறது.  ஆங்கிலத்தில் ஒரு வாக்கியம் இருக்கிறது – ”சிந்திய பாலிற்க்காக அழுவதில் பயனில்லை”.  எத்தனை முறை படித்தாலும் நமக்கு அது மனதுக்குள் நிற்பதே இல்லை.  மீண்டும் மீண்டும் சோகக் கடலில் தத்தளிக்கிறோம்.

சிலர் இப்படி இருப்பதில்லை.  தனக்கு என்ன பிர்ச்சனை வந்தாலும் அதிலிருந்து மீண்டு வாழ்க்கையில் ஏதோ ஒன்றை சாதிக்கிறார்கள்.  என்னுடைய வார்த்தைகளால் விளக்க முடியாததை கீழே கொடுத்துள்ள இந்த காணொளி விளக்கும் என்பதில் எனக்கு சந்தேகமில்லை. 

_

காணொளியைப் பார்த்தபின் ஒரு சொட்டு கண்ணீராவது இப்பூமியில் சிந்துவது திண்ணம்.  தோல்வியைக் கண்டு துவளாது, சோகத்தில் உழலாது, வெற்றிக்கனி பறிக்க அயராது முயற்சிப்போம். 

நட்புடன்

வெங்கட்

பின்குறிப்பு:  முகப்புத்தகத்தில் நண்பர்கள் பகிர்ந்த இரு விஷயங்களைச் சேர்த்து எழுதிய பதிவு இது.  அங்கே பகிர்ந்த நண்பர்களுக்கு நன்றி.  பல சமயங்களில் தேவையில்லாத விஷயங்கள் வந்தாலும் சில நேரங்களில் இது போன்ற நல்ல விஷயங்களும் வந்து கொண்டுதான் இருக்கிறது. அவ்வப்போது முகப்புத்தகத்தில் இருந்து விலக நினைத்தாலும் இன்னும் தொடர இதுவும் காரணம்… :)

ராஜா-ராணி குடைகள்:

[மத்தியப்பிரதேசம் அழைக்கிறது…. பகுதி17]

(மத்தியப்பிரதேசம் அழைக்கிறது தொடரின் பகுதி  1   2   3   4   5   6   7   8   9   10   11   12 13 14 15 16) 

இத்தொடரின் பகுதி-14-ல் ”பூங்கொத்துடன் வரவேற்பு” எனும் தலைப்பில் மத்தியப் பிரதேசத்தின் ஷிவ்புரி மாநிலத்தில் இருக்கும் சத்ரி பற்றி சொல்லியிருந்தேன்.  முதல் நாள்  மாலை பெய்த மழையின் காரணமாய் அங்கு செல்ல இயலவில்லை. எப்படியும் சென்று விடுவது என முடிவு செய்து, "மாதவ் தேசிய பூங்கா" மற்றும் ”பதையா குண்ட்” [Bhadaiya Kund] ஆகியவைகளை பார்த்த பிறகு காலை உணவை முடித்துக்கொண்டு  10 மணிக்கு அங்கு செல்ல கிளம்பினோம். 

மஹாராஜா மாதோ ராவ் சிந்தியா மற்றும் மஹாராணி சாக்ய ராஜே சிந்தியா அவர்கள் இருவருக்குமான குடைகள் இவை.  ”சத்ரி” என்பது இவ்வுலகில் நல்ல விஷயங்களைச் செய்தவர்களுக்கான சமாதி்.  இந்த குடைகள் பொதுவாக போரில் வீர மரணம் எய்திய மராட்டிய மஹாராஜாக்களுக்காக கட்டப்பட்டு வந்தன.  சிந்தியா ராஜா-ராணிக்காகக் கட்டப்பட்டவையே இந்த மிக அழகிய குடைகள்.

இந்த இடத்தினை நிர்வாகம் செய்துவரும் அறக்கட்டளையின் திரு மோஹிதே அவர்கள் இந்த இடம் முழுதும் எங்களுடன் வந்து அதன் சிறப்பினை விளக்கிச் சொன்னார்.  அவர் சொன்ன நிறைய விஷயங்கள் அந்த இடத்தின் பெருமையை உணர்த்தியது.

மஹாராணி சாக்ய ராஜே சிந்தியா அவர்களின் அமர்ந்த நிலையில் உள்ள முழு உருவச் சிலை இருக்கிறது.  அந்த இடத்தின் எதிரே ஒரு பெரிய மண்டபம்.  அதில் தினமும் காலை நேரத்தில் பிரசங்கங்கள் நடைபெறுகின்றன.  மாலையில் வாத்திய இசையுடன் கூடிய பாடல்களை  இசைக்கிறார்கள். 

மஹாராணி மற்றும் மஹாராஜா அவர்களின் குடைகளின் உள்ளே இருக்கும் அரங்குகளில் நிறைய மின்விசிறிகள் இருக்கின்றன.  அவற்றின் இறக்கைகள் மரத்தினால் ஆனவை என்பது ஒரு சிறப்பு.  இன்னுமொரு சிறப்பு இந்த மின்விசிறிகள் ஏ.சி. டி.சி என்ற இரண்டிலும் இயங்கும் விதமாய் அமைந்துள்ளது.  இப்போதும் இயங்குகிறது என்று திரு மோஹிதே அவர்கள் சொன்னபோது ஆச்சரியமாக இருந்தது.

இந்தக் குடைகளுக்கு நடுவே அழகாய் வடிவமைக்கப்பட்ட குளம் இருக்கிறது.  குளத்திற்கு நீர் பக்கத்தில் இருக்கும் ஆற்றிலிருந்து வருகிறது.  இந்தக் குடைகளைப் பார்க்க வரும் சுற்றுலா பயணிகள்  குளத்தில் நிறைய குப்பைகளைப் போட்டுச் சென்றிருக்கிறார்கள்.  திரு மோஹிதே அவர்கள் இதைப் பற்றி சொல்லும்போது தினமும் குளத்தினை சுத்தம் செய்தாலும், அடுத்து வருபவர்கள் போட்டு விடுகிறார்கள் என்று எங்களிடம் குறைபட்டார். 

இங்கே ”கதம்” என்று அழைக்கப்படும் ஒரு பெரிய மரம் இருக்கிறது.  125 வயதான இந்த மரம், 1996 வருடம் இந்திய அரசாங்கத்தினால் ”மஹாவ்ருக்‌ஷ் புரஸ்கார்” வழங்கப்பட்டு கௌரவிக்கப் பட்டிருக்கிறது.  இந்த மரத்தின் உயரம் 20.7 மீட்டர்.

குளத்தின் இரண்டு பக்கங்களிலும் இரு கோவில்கள் கட்டப்பட்டு இருக்கின்றன.  ஒரு கோவிலில் கருப்பு நிற இராமரும், பக்கத்தில் சீதாதேவி மற்றும் இலக்குவனும் இருக்க, வெளியே கைகளை கூப்பியபடி ஹனுமனும் நின்று கொண்டு இருக்கிறார்.  மற்ற பக்கத்தில் இருக்கும் கோவிலில் புல்லாங்குழல் ஊதியபடி கருமை நிற கண்ணனும், ராதையும் இருக்கிறார்கள்.

குளத்தின் நடுவே இருக்கும் ஒரு மேடையில் சிவலிங்கமும் அதன் எதிரே ஸ்படிகத்தினால் ஆன ஒரு நந்தியும் இருக்கிறது.  சிவலிங்கத்தின் மேலே இயற்கையிலேயே பல விஷயங்கள் இருக்கின்றன.  சிவலிங்கத்தின் ஒரு பகுதியில் நந்தியின் உருவம் தெரிகிறது.  இன்னொரு பக்கத்தில் சிவனின் உடுக்கையும் தெரிகிறது.  எங்களுக்கு திரு மோஹிதே அவர்கள் சமய சார்பான பல விஷயங்களை விளக்கினார். 

இன்னும் நிறைய விஷயங்கள் இருக்கிறது.  அவற்றினை அடுத்த பகுதியில் பார்ப்போம்…

மீண்டும் சந்திப்போம்…

வெங்கட்.