தினம் தினம் தில்லி - புதிய தொடக்கம் - பகுதி ஒன்று

அன்பின் நண்பர்களுக்கு, இனிய காலை வணக்கம். இந்த நாளில் மீண்டும் ஒரு பதிவுடன் உங்கள் அனைவரையும் சந்திப்பதில் மகிழ்ச்சி.

நேற்று வெளியிட்ட சதுரகிரிக்கு ஒரு குறும்பயணம்… - பகுதி இரண்டு பதிவினை படித்து கருத்துகள் தெரிவித்த அனைத்து வலையுலக நண்பர்களுக்கும் மனம் நிறைந்த நன்றி. இந்த நாளை நல்லதொரு வாசகத்துடன் தொடங்கலாம் வாருங்கள்.

******

நான் கடந்த 32 வருடங்களாக வசித்து வரும் இந்தியத் தலைநகர் தில்லி குறித்து நிறைய தகவல்களை இந்த வலைப்பூவில் எழுதி இருக்கிறேன் என்றாலும் எழுதாமல் விட்ட தகவல்கள் நிறையவே உண்டு. இதில் சில தகவல்களை சென்ற வருடத்தில் முகநூல் பக்கத்தில் எழுதி இருந்தேன் என்றாலும் இங்கே வெளியிட வில்லை. இந்தத் தகவல்களும் இன்னும் வெளியிடப்படாத தகவல்களையும் ஒவ்வொரு வியாழனும் வெளியிடலாமா என்று ஒரு யோசனை தோன்ற இதோ, இந்த வியாழனில் தொடங்கி விட்டேன் - “தினம் தினம் தில்லி” என்ற தலைப்பில் இந்த தில்லி குறித்த தகவல்கள் இன்னும் சில வாரங்களுக்கேனும் வருவதற்கு தயாராக இருக்கிறது. இந்த வாரம் தலைநகர் தில்லி குறித்த இரு தகவல்கள் பகிர்ந்து கொள்ள இருக்கிறேன். வாருங்கள் தலைநகர் தில்லி குறித்த தகவல்களை பார்க்கலாம்!

ஷக்கர் கந்தி:

சர்க்கரை வள்ளிக்கிழங்கு உங்களுக்குத் தெரிந்தது தான். அதைத்தான் வடக்கே “ஷக்கர் கந்தி” என்று அழைக்கிறார்கள். நெய்வேலியில் இருந்தவரை அம்மா எப்போதாவது இந்த சர்க்கரை வள்ளிக்கிழங்கை வாங்கி, வேகவைத்து பொரியலாகவோ அல்லது வெல்லம் சேர்த்து இனிப்பாகவோ சாப்பிடத் தருவார்கள். வீதிகளில் இந்த சர்க்கரை வள்ளிக்கிழங்கை வேகவைத்து மசாலா சேர்த்து விற்பதை நீங்கள் நம் ஊரில் பார்த்தது உண்டா? நிச்சயம் பார்த்து இருக்க முடியாது.

வடக்கே இந்தக் கிழங்கை வேக வைத்து/தணலில் வாட்டி, தோலெடுத்து, சிறு துண்டங்களாக்கி ஒரு தொன்னையில் வைத்து மேலே மசாலாப் பொடிகள் தூவி விற்பனை செய்வார்கள். இதற்குப் பெயர் ஷக்கர் கந்தி சாட் (Chaat)! பலரும் இதனை வாங்கி உண்பார்கள். இதற்கென்றே சில ரசிகர்களும் உண்டு. ஒரு பசி நேரத்தில் இந்த ஷக்கர் கந்தி சாட் சுவைத்தது உண்டு. என்னதான் புதிய சுவையாக இருந்தாலும் அம்மா செய்து கொடுத்த வெல்லம் சேர்த்த சர்க்கரைக் கிழங்கின் சுவைக்கு ஈடுகொடுக்கவில்லை அந்த புதிய சுவை. அப்படிச் சுவைத்து வருடங்கள் முப்பதுக்கும் மேல் ஆகிவிட்டது. அடுத்த முறை தமிழகம் வந்தால் சுவைக்க வேண்டும் என மனதில் முடிச்சு போட்டு வைத்துக் கொண்டிருக்கிறேன்.

வெளியே இப்படி சுவைப்பது தவிர வடக்கிந்தியர்கள் சப்பாத்திக்கு தொட்டுக்கையாக்கவும் இதனை சமைப்பது உண்டு. சப்பாத்தி அதிகமாக உண்பதால் தினம் தினம் வேறு வேறு தொட்டுக்கை தேவைப்படுவதால் எல்லா காய்கறிகளும் இப்படி சப்ஜி என்ற பெயரில் சமைப்பது வழக்கம். பெரும்பாலான சப்ஜி தயாரிப்பு முறை ஒன்றாகவே இருக்கும். வெங்காயம் தக்காளி எல்லாவற்றிலும் பயன்படுத்துவதே வழக்கம். இந்த ஷக்கர் கந்தி சப்ஜியும் அப்படியே. இணையத்தில் இதற்கான செய்முறைகள் கிடைக்கும் என்பதால் இங்கே எழுதப் போவதில்லை! 🙂

சமீபத்தில் காய்கறி வாங்கச் சென்ற போது சர்க்கரை வள்ளிக்கிழங்கு பார்த்ததும் அரை கிலோ வாங்கினேன். வேக வைத்து சாப்பிடலாம் என. ஒரு நாள் மாலையில் சாப்பிட்டேன் - அம்மா செய்து கொடுத்த வெல்லம் சேர்த்த சர்க்கரைக் கிழங்கின் சுவையை நினைத்துக் கொண்டே….

*&*&*&*&*&*&

CHசோலியா (Choliya)

குளிர் காலம் முடிந்து ஹோலி பண்டிகை வரும் சமயத்தில் தில்லி நகரில் மட்டுமல்லாது வடக்கில் உள்ள பல இடங்களில் கிடைக்கும் ஒரு விஷயம் இன்று நாம் பார்க்கப் போகும் CHசோலியா எனும் பொருள். இது நம் ஊரில் நீங்கள் பார்த்திருக்க வாய்ப்பு குறைவு தான். அது என்ன CHசோலியா? கருப்பு கொண்டைக்கடலை பார்த்து இருக்கலாம்…. பச்சையாக, நிலத்தில் இருந்து எடுத்த உடன் பார்த்ததுண்டா? அப்படி பச்சையாக நிலத்தில் இருந்து எடுக்கப்பட்ட பச்சைக் கொண்டைக்கடலை தான் CHசோலியா.

சின்னச் சின்ன செடிகளில் கொத்துக் கொத்தாக இருக்கும் CHசோலியாவை அப்படியே செடியாகவே வேறுடன் பிடுங்கி விற்பனைக்குக் கொண்டு வந்து விடுவார்கள். கட்டுகட்டாகக் கட்டப்பட்டு விற்பனைக்கு வரும் இவை விற்கப்படுவது கிலோ கணக்கில். இந்த வருடம் கிலோ நாற்பது ரூபாய்… செடியில் காய்த்து இருக்கும் CHசோலியா-வை தனியாக எடுத்து மேலே இருக்கும் தோலை உரித்து ஒவ்வொன்றாக சேகரிக்க வேண்டும். ஒரு கிலோ செடியுடன் வாங்கினால் சுமார் 200 கிராம் பச்சை கொண்டைக்கடலை கிடைக்கலாம். குறைவாகவும் கிடைக்க வாய்ப்புண்டு.

சல்லியம் பிடித்த வேலை அதாவது நச்சுப்பிடித்த வேலை என்பதால் பொதுவாக இதை நான் வாங்குவதில்லை. சரி வாங்கி என்ன செய்யலாம்? அப்படியே பச்சையாக சாப்பிடலாம், அல்லது ஊற வைத்து முளைவிட்டபின்னர் (Sprouted) சாப்பிடலாம், இல்லை வேகவைத்து சாப்பிடலாம், இல்லை என்றால் இருக்கவே இருக்கிறது - எல்லாவற்றிலும் சேர்ந்து கொள்ளும் ஆலு எனும் உருளைக் கிழங்கு! அதனுடன் சேர்த்து சப்ஜியாக சமைத்து சப்பாத்தியுடன் தொட்டுக்கொண்டு சாப்பிடலாம்….. சுவையாக இருக்கும் என்பதோடு, ஹோலி பண்டிகை நாட்களில் மட்டுமே கிடைக்கும் என்பதால் அந்தச் சமயத்தில் பலரும் இதனை வாங்குவது வழக்கம்.

என்ன இதைச் சாப்பிட்டால் அதிகமாக வாயுத்தொல்லை இருக்கும் என்று சொல்வதுண்டு…. பக்கத்தில் வர தெரிந்தவர் பலரும் அஞ்சக்கூடும்! :) நான் வாங்கி சப்ஜி செய்தததில்லை என்றாலும் பச்சையாகவும் சப்ஜியாகவும் சுவைத்ததுண்டு. சுவை நன்றாகவே இருக்கும் என்பதால் வாய்ப்பு கிடைத்தால் நீங்களும் சுவைத்துப் பாருங்களேன்….

******

இந்த நாளின் பதிவு குறித்த தங்களது எண்ணங்களை பின்னூட்டம் வாயிலாக சொல்லுங்களேன். மீண்டும் வேறொரு பதிவுடன் உங்கள் அனைவரையும் சந்திக்கும் வரை…

நட்புடன்

வெங்கட் நாகராஜ்

புது தில்லியிலிருந்து….