எல்லாம் வாங்க ரிசர்வ் வங்கியின் உதவி தேவை....

[சூரஜ்குண்ட் மேளா போகலாம் வாங்க! – இரண்டாம் பகுதி]

சூரஜ்குண்ட் மேளா போகலாம் வாங்க! – முதல் பகுதி-யில் உங்களை அங்கே அழைத்துச் சென்றதற்கு நன்றி சொன்ன அனைத்து நல்லுள்ளங்களுக்கும் மனமார்ந்த நன்றி! [அட நெஜமாகவே சொல்ல நினைச்சாங்கப்பா!]

”என்ன கேட்டீங்க? இந்தப் பகுதியில் என்ன என்றா?”  இதோ பதிவுக்கு போயிடுவோம்! 

பீங்கானில் கைப்பை?

விதவிதமாய் பீங்கான் பொருட்கள்

இவ்வளவு உண்டியல் வைச்சிருக்கே, ஒண்ணுலயாவது காசு போடுங்க!

உள்ளே நுழைந்த இடத்திலேயே பீங்கானில் பல பொருட்கள் விற்பனைக்கு வைத்திருந்தார்கள். தேநீர் கோப்பைகள், சூப் கப்கள், கைப்பைகள் மாதிரி ஒன்று – அதைப் பேனா ஸ்டேண்டாகவோ அல்லது ஸ்பூன் ஸ்டேண்டாகவோ பயன்படுத்தலாம், குழந்தைகளுக்கான உண்டியல், பூ ஜாடிகள் எனப் பலப் பல பொருட்களை விற்பனைக்கு வைத்திருந்தார்கள். நீல வண்ணத்தில் சிறிய சிறிய கோப்பைகள், தட்டுகள் என 15 எண்ணிக்கை கொண்ட ஒரு செட் வைத்திருந்தார்கள் – அதன் பெயர் பேபி செட்! விலை 185 ரூபாய் மட்டுமே.

இந்தக் கார்ல ஒரு ரவுண்ட போலாமா?

 

இல்லைன்னா இந்தக் கார்ல?

  

அதன் பிறகு மரத்தினாலான பல பொருட்கள் விற்பனைக்கு வைத்திருந்தார்கள். சின்னச் சின்னதாய் வாகனங்கள், விளையாட்டு பொம்மைகள், ‘நாங்க ஒண்ணுக்குள்ள ஒண்ணு” எனச் சொல்லும் ஒரு பொம்மை [பிரிக்கப் பிரிக்க உள்ளுக்குள் இன்னொரு பொம்மை வருகிறது – மொத்தம் ஐந்து], குழந்தைகளுக்கான சில பேனா பென்சில்கள் என நிறைய இருந்தது.

சாசிவேகலு கணேஷ்

அது என்னமோ தெரியவில்லை, ஆனைமுகன் மேல் அனைவருக்கும் காதல். எந்த பொருள் பார்த்தாலும் அதில் ஆனைமுகனை வடித்து விடுகிறார்கள். மேளாவில் பல இடங்களில், பல பொருட்களில், பல வடிவங்களில் ஆனைமுகன். வெட்டி வேரில் கூட ஆனைமுகனை செய்திருக்கிறார்கள். கர்நாடகத்தின் ஹம்பி நகரில் ஹேமகுண்டா மலை அடிவாரத்தில் 1506 ஆம் வருடம் அமைக்கப்பட்ட ”சாசிவேகலு கணேஷ்” உருவச்சிலையை தில்லியிலும் காண அதன் மாதிரியை இங்கே வைத்திருக்கிறார்கள். ஆனைமுகனின் கால் விரல்கள் கடுகு போன்ற வடிவில் இருப்பதால் இந்த ஆனைமுகனுக்கு கடுகு கணேஷ் பெயர் கொடுத்திருக்கிறார்கள்.

கண்ணார ரசிப்போம்....  இங்கே நோ ஜருகண்டி!!!

 

குழலூதும் கண்ணன்

  

மரத்தில் செய்யப்பட்ட பெரிய பெரிய சிலைகள் ஆங்காங்கே வைத்திருந்தார்கள். அதில் சில சிலைகள் தத்ரூபமாக இருந்தன. திருப்பதி வெங்கடாஜலபதியின் உருவச் சிலை ஒன்று பத்தடிக்கு மேலிருக்கும். ஒரு மரத்தில் சாய்த்து வைக்கப்பட்டிருந்த வேங்கடவனை நீங்கள் மெய்மறந்து காணும்போது ‘ஜருகண்டி ஜருகண்டி’ எனச் சொல்லி உங்களை தள்ளிவிட யாருமில்லை. ஆனந்தமாக ஏகாந்த சேவை சாதிக்கிறார். வெங்கடாஜலபதி, குழலூதும் கிருஷ்ணர், பஞ்சமுக ஆஞ்சனேயர் என பல கடவுள்களின் உருவச் சிலைகளை இங்கே பார்க்க முடிந்தது.

அஷ்ட லக்ஷ்மி

 

தமிழகத்திலிருந்து தஞ்சாவூர் ஓவியங்கள் விற்கும் ஒரு நிலையமும் இருந்தது. தஞ்சாவூர் ஓவியங்கள் பெயர் பெற்ற அளவுக்கு விலையும் அதிகம் தானே. அஷ்ட லக்ஷ்மியின் ஒரு ஓவியம் பார்த்து, விலை கேட்டேன். ரூபாய் 12,000/- எனச் சொன்னார். கீழேயே ராதா கிருஷ்ணர் ஓவியம் இருக்க, அதன் விலையையும் கேட்டு வைப்போமே எனக் கேட்க, ரூபாய் 45,000/- என்றார்.  ”ரொம்ப நல்லா இருக்கு” எனச் சொல்லி அங்கே விற்பனைக்கு/காட்சிக்கு வைத்திருந்த சில ஓவியங்களைப் புகைப்படங்கள் எடுத்துக் கொண்டு அடுத்த கடை நோக்கி நகர்ந்தோம்.

விதவிதமான பொருட்கள் இருக்க, அனைத்தையும் வாங்க ஆசைதான். அதற்கு தலைப்பில் சொன்னது போல மத்திய ரிசர்வ் வங்கியின் உதவி தேவை என்பதால் கண்ணால் ரசித்து மட்டும் வந்தேன்.

இன்னும் இந்த மேளாவில் பல விஷயங்கள் கொட்டிக் கிடக்கிறது. அவற்றை அடுத்த பகுதியில் காண்போம்.

மேளா பற்றிய அடுத்த பகுதியில் சந்திக்கும் வரை....

நட்புடன்

வெங்கட்.

புது தில்லி.