பதிவுலகில் ப்ரையன் லாரா

பதிவுலகில் நான் தொடர்ந்து படித்துக் கொண்டிருக்கும் சில பதிவர்களைப் பற்றிய பகிர்வு இது. 2009 ஆம் ஆண்டு பதிவுலகிற்கு வந்த பிறகு நான் தொடரும் பதிவர்களில் பல பதிவுகள் எழுதிய சில பதிவர்கள், மற்றும் அவர்களுடான எனது நட்பு ஆகிய விஷயங்களை உங்களுடன் பகிர்ந்து கொள்ள இன்று எனக்கு ஒரு வாய்ப்பு! வாங்க பார்க்கலாம் :)

1.  கீதா சாம்பசிவம்

2005-ஆம் வருடத்திலிருந்து தமிழ் வலைப்பதிவுலகில் தனது முத்திரையைப் பதித்து வரும் திருமதி கீதா சாம்பசிவம் தனது எண்ணங்கள் வலைப்பூவில் இது வரை எழுதிய பதிவுகள் 1488. தனது அனுபவங்கள், பயணக் கட்டுரைகள், கதைகள் என பல தலைப்புகளில் பதிவுகள் எழுதி வரும் இவர், இந்த வலைப்பூ தவிர கண்ணனுக்காக, சாப்பிடலாம் வாங்க, பேசும் பொற்சித்திரமே, என் பயணங்களில், ஆன்மீகப் பயணம் என இன்னும் ஐந்து வலைப்பூக்களிலும் எழுதி வருகிறார். சென்னையின் அம்பத்தூர் வாசியான இவர் தற்போது ஸ்ரீரங்கத்துக்கு வந்த பிறகு நான்கைந்து முறை சந்தித்து விட்டேன். ஒவ்வொரு முறையும் நான் திருச்சி வரும் போதும் இவரைச் சந்திக்கா விட்டால், ‘க்ர்ர்ர்ர்ர்ர்ர்ர்ர்ர்ர்’ என்று சொல்லும் இவரது பாசத்திற்கு நன்றி சொல்லக் கடமைப் பட்டிருக்கிறேன். 

2.   துளசி கோபால்

துளசிதளம் எனும் தளத்தில் 2004 – ஆம் வருடம் எழுத ஆரம்பித்த இவர் இதுவரை 1402 பதிவுகள் எழுதி இருக்கிறார். இவர் எழுதும் பயணக் கட்டுரைகளில் எத்தனை எத்தனை விவரங்கள். பார்க்கும் அத்தனை விஷயங்களையும் நினைவில் வைத்துக் கொண்டு இவர் தனது கட்டுரைகளில் எழுதுவதைப் பார்த்தால் தான் எனக்கு பொறாமை. பயணக் கட்டுரைகள் எழுதுவதில் எனக்குப் பிடித்தம் ஏற்படக் காரணமானவர் இவர் தான். தான் எழுதும் கட்டுரைகளில் அவர் எடுத்த புகைப்படங்களையே இணைத்து சிறப்பான பதிவுகள் எழுதும் இவரை நான் இதுவரை மூன்று முறை சந்தித்து இருக்கிறேன் – ஒரு முறை தில்லியில், இரண்டாவது சென்னையில் மூன்றாம் முறை திருச்சியில். இவருடனான எனது நட்பு தொடர ஆண்டவனைப் பிரார்த்திக்கிறேன்.

3.   புதுகைத் தென்றல்

ஹைதை ஆவக்காய் பிரியாணி, பயணக் கட்டுரைகள், சினிமா, சமையல், கொசுவத்தி என பல தலைப்புகளில் தனது புதுகைத்தென்றல் வலைப்பூவில் இதுவரை 936 பதிவுகள் வெளியிட்டு இருக்கும் புதுகைத் தென்றல் வலைப்பூவில் எழுத ஆரம்பித்த்து 2007 – ஆம் வருடம்.  இரண்டு வருடத்திற்கு முன் தில்லி வந்த இவரை நானும் சக தில்லி பதிவர்களும் சந்தித்து நீண்ட நேரம் அளவளாவினோம். இது பதிவர்கள் சந்திப்பாக இல்லாது குடும்ப நண்பர்களின் சந்திப்பாகவே அமைந்தது! விரைவிலேயே 1000 பதிவுகள் எழுதிட இவருக்கு எல்லாம் வல்லவன் வாய்ப்புகள் தரட்டும்!

4.   மோகன்குமார்

இவரை உங்களுக்கு அறிமுகம் செய்யவேண்டிய அவசியமில்லை. தொடர்ந்து தமிழ்மணத்தில் முதலாம் இடத்தினை தக்க வைத்திருக்கும் இவர் 2008-ஆம் ஆண்டு எழுத ஆரம்பித்து இதுவரை 677 பதிவுகளை தனது வீடு திரும்பல் வலைப்பூவில் எழுதி இருக்கிறார். இவர் எழுதாத விஷயமே இல்லை எனச் சொல்லலாம்! புத்தகம்/சினிமா விமர்சனங்கள், பல விஷயங்களை தன்னகத்தே கொண்ட வானவில், தொலைக்காட்சி விமர்சனங்கள், என பல துறைகளில் கலக்கும் இவரது பதிவுகளில் இவர் எழுதும் சாதாரணமானவர்களின் நேர்காணல் எனக்கு மிகவும் பிடித்த விஷயம். இவரையும் இதுவரை மூன்று – நான்கு முறை சந்தித்து இருக்கிறேன். ஒவ்வொரு சந்திப்பும் சுவாரசியம்!

5.   பழனி. கந்தசாமி

2009-ஆம் வருடம் சாமியின் மன அலைகள் எனும் வலைப்பூவில் எழுத ஆரம்பித்த இவர் இதுவரை எழுதிய பதிவுகள் எண்ணிக்கை 536. சிறப்பான பல விஷயங்களை எழுதி வரும் இவரை நான் சந்தித்தது பழைய தில்லியின் ரயில் நிலையத்தில்! கோவையிலிருந்து ஹரித்வார் செல்லும் போது வழியில் சந்தித்தேன் இவரை. கோயம்புத்தூருக்கே உண்டான குசும்புடன் எழுதும் இவரது பல பதிவுகளுக்கு நான் ரசிகன்!

இவர்கள் தவிர நான் நேரில் சந்திக்காவிட்டாலும் தொடர்ந்து படித்து வரும் வலைப்பூக்களும் அவர்கள் எழுதிய பதிவுகளின் எண்ணிக்கையும், எழுத ஆரம்பித்த வருடமும் கீழே!

1184 – ஐந்து ஆசிரியர்கள் குழு – எங்கள் பிளாக் - 2009

823 - இராஜராஜேஸ்வரி – மணிராஜ் – 2011

510-சென்னை பித்தன்–நான் பேச நினைப்பதெல்லாம்–2008

457 – நாஞ்சில் மனோ – 2010

439 – சங்கவி – 2009

406 – ராமலக்ஷ்மி – முத்துச்சரம் – 2008

சரி, ”இதெல்லாம் இந்தப் பதிவில் இன்று சொல்ல வேண்டிய அவசியம் என்ன?” என சந்தேகத்தோடு படிக்கும் உங்களுக்கு காரணம் சொல்ல வேண்டிய தருணம் வந்து விட்டது! கிரிக்கெட் விளையாட்டில் டெஸ்ட் போட்டிகளில் ஒரு இன்னிங்க்ஸில் 400 ரன்கள் எடுத்த ஒரே வீரர் பிரையன் லாரா மட்டுமே! ஆனால் நமது தமிழ் வலைப்பூக்களில் 400 பதிவுகளுக்கு மேல் எழுதிய லாராக்கள் பலர். அவர்களைப் பற்றி சொல்லி நானும் அந்த பட்டியலில் இன்று இடம் பெறுகிறேன் எனச் சொல்லவே இந்த பதிவு! ஆமாங்க இது என்னுடைய நானூறாவது பதிவு!

உங்கள் வாழ்த்துகளுக்கு முன்கூட்டியே நன்றி சொல்லி விடுகிறேன்!

தொடர்ந்து இந்த தளத்தில் சந்திப்போம்!

நட்புடன்

வெங்கட்.

புது தில்லி.