கதம்பம் – தேன்குழல் – பிளாஸ்டிக் இல்லா சமையலறை – விஸ்வாசம் – ஜாடிக் குடும்பம்

சாப்பிட வாங்க – தேன்குழல் – 5 February 2019

மாலை நேர நொறுக்குத் தீனிக்கு. எப்போதுமே நானே மாவரைத்து, உளுந்து வறுத்து மாவாக்கி, பொட்டுக்கடலையும் அதே போல் மாவாக்கி, இதர சாமான்களை சேர்த்து தேன்குழல் செய்திருக்கேன்.

முதல்முறையாக கடையில் முறுக்கு மாவு வாங்கியுள்ளேன். சில நாட்களாக செய்யாமலே இருக்கிறது என இன்று செய்தாச்சு. பாட்டி தேங்காய் எண்ணெயில் தான் கைமுறுக்குகளைச் சுற்றி போட்டு எடுப்பார். நானும் இன்று தேங்காய் எண்ணெயில் தான் போட்டெடுத்தேன். வாங்க அரட்டை அடித்துக் கொண்டே கொறிக்கலாம்.

பிளாஸ்டிக் இல்லா சமையலறை – 31 January 2019

முதலில் அவசியமற்ற பொருட்களை வாங்குவதை தவிர்க்க வேண்டும். ஒருமுறைக்கு இருமுறை யோசித்து பின் எதையும் வாங்குவது நல்லது. இருக்கும் பொருட்களையும் அவ்வப்போது சுத்தம் செய்து தேவைப்படுபவர்களுக்கு கொடுத்து உதவலாம். அல்லது வேறு விதமாக உபயோகப்படுத்தலாம். அடுத்து மறுசுழற்சிக்கு கொடுப்பது.

நானும் இப்படித்தான் செய்து வருகிறேன். பிளாஸ்டிக்குக்கு மாற்றாக எவர்சில்வரில் மளிகைப் பொருட்கள் மாற்றம். என்னிடமிருந்த டிபன் பாக்ஸ்களையும், சம்படங்களையும் உபயோகப்படுத்திக் கொண்ட பின் மீதியுள்ளவற்றுக்கு கணக்கிட்டு வாங்கிக் கொண்டேன்.

சி.டி. மார்க்கரால் மகள் அதில் உள்ள பொருட்களின் பெயர்களை எழுதித் தந்தாள். கையால் அழித்தாலும் தண்ணீர் பட்டாலும் அழிவதில்லை. சோப்பு பட்டால் மட்டுமே அந்த மை அழிகிறது. வேறு பொருட்களை மாற்றும் போது சோப்பால் சுத்தம் செய்து விட்டு மாற்றிக் கொள்ளலாம்.

விஸ்வாசம் – 9 February 2019

ஏறக்குறைய வெளியாகி ஒரு மாதம் ஆகப்போகிறது. எங்கள் வீட்டுத் 'தல'யுடன் இன்று தான் சென்று பார்த்து வந்தோம்..:)

11 மணி காட்சிக்கு முன்பதிவு செய்திருந்ததால் எல்லா வேலைகளையும் முடித்துக் கொண்டு தியேட்டருக்கு சென்று விட்டோம். சிறிது நேரம் காத்திருக்கையில் அங்கு வந்த சில ஜோடிகளையும், குடும்பங்களையும் பார்த்துக் கொண்டு அமர்ந்திருந்தோம்.

கைக்குழந்தையுடன் வந்திருந்த தம்பதிகளை பார்த்து, நம்ப எல்லாம் இப்படியெல்லாம் வந்திருப்போமா?? என்றேன். உடனே என்னவரோ "ஏன்! நம்ப ரோஷியை எடுத்துக் கொண்டு வந்திருக்கோமே" என்றார்!!

சினிமாவிற்கு செல்வதில் விருப்பமே இல்லாத என்னவருடன் டெல்லியில் நான் பார்த்த படங்கள் மூன்று :) அதுவும் மகளின் ஐந்தாவது வயதில் :)

வந்த கோபத்தை அடக்கிக் கொண்டு "அது யாரோட போனீங்களோ!!! சத்தியமா நான் வரலை!! என்றேன் :)

சரி!! எங்க திரைக்கதையை விட்டுவிட்டு சினிமாவுக்கு வருவோம்! அடாவடி தூக்குதுரை என்ற பெயருக்கு ஏற்ப கட்டப்பஞ்சாயத்தும், அடிதடி சண்டைகளும் தான் படம் முழுதும் வியாபித்திருக்கின்றன.

நயன்தாராவுடனான காதல் காட்சிகள்..பத்து வருட பிரிவுக்குப்பின் தன் மகளையும், மனைவியையும் சந்திக்கும் அஜித்..அப்பா மகளுடனான புரிதல்கள்.

இறுதியில் கணவன் மனைவி இடையேயான புரிதலை விட அப்பாவுக்கும், மகளுக்கும் இடையேயான பாசப் பிணைப்பு வெற்றி பெறுகிறது. பாடல்கள் ஓகே ரகம் தான்.

ஆக மொத்தம் பொழுதுபோக்குக்கு தகுந்த படம்.

ஜாடிக் குடும்பம் – 12 February 2019

இன்று வாசலில் வந்த ஜாடிக்காரரிடம் விதவிதமான அளவுகளில், விலைகளில் பீங்கான் ஜாடிகள் இருந்தன. நான் ஊறுகாய் போட்டு வைக்க மூன்று கிலோ, நான்கு கிலோ கொள்ளளவு கொண்ட இரண்டு ஜாடிகளை வாங்கிக் கொண்டேன்.

அதில் இட்லிமாவும் விட்டு வைத்தால் புளிக்காதாம். ஃப்ரிட்ஜில் வைக்க வேண்டிய அவசியம் இல்லையாம். இது எந்தளவு உண்மை என்று செய்து பார்த்தால் தான் தெரியும் :)

சில நாட்கள் முன்பு உப்புக்கும், புளிக்கும் ஜாடிகளை தெற்கு வாசலில் வாங்கினேன். கொஞ்சமாக ஊறுகாய் வைத்து பயன்படுத்த கால் கிலோ கொள்ளளவு கொண்ட இரண்டு ஜாடிகளை சித்திரைத் தேரின் போது வாங்கினேன்.

இந்த மாதிரி பீங்கான் ஜாடிகளில கூட பாட்டில் போல் திருகு மூடி இருக்குமென்று மாமியார் சொல்லிக் கேட்டிருக்கிறேன். ஆனால் நான் இதுவரை பார்த்ததில்லை. இந்த ஜாடிக்காரரிடம் கேட்டுப் பார்த்தேன். அவரும் எல்லாரும் கேட்கறாங்க!! வருவதில்லை என்றார்!

சரி! நெய்வேலியிலிருந்து கொண்டு வந்த எலுமிச்சம்பழங்களை உப்பு போட்டு நன்றாக ஊறியாச்சு. இன்று மாடியில் வெயிலிலும் வைத்திருக்கிறேன். அதை ஜாடிக்கு மாற்றிட வேண்டியது தான். தேவைப்படும் போது காரமும், எண்ணெயும் சேர்த்துக்கலாம்.

என்ன நண்பர்களே, இந்த நாளில் பகிர்ந்து கொண்ட கதம்பம் பதிவு உங்களுக்குப் பிடித்திருக்கிறதா? பின்னூட்டத்தில் சொல்லுங்களேன்....

நட்புடன்

ஆதி வெங்கட்