ஃப்ரூட் சாலட் – 26 – மனித நேயம் – ஜ்வல்யா

இந்த வார செய்தி:

தில்லியில் சென்ற வாரம், ஒரு மருத்துவமனையில் சிகிச்சை பெற்று வரும் சில நோயாளிகள் மனித நேயத்தோடு ஒரு காரியம் செய்திருக்கிறார்கள். 

முகம்மது யூசஃப்

ஜெய்பூர் நகரைச் சேர்ந்த தையல் தொழிலாளி ஹஃபீஸ். அவரது மகன் முகம்மது யூசஃப். பிறந்து பதினாறு மாதங்கள் தான் ஆகிறது. பிறக்கும் போதே கல்லீரலை குடலுடன் இணைக்கும் நாளங்கள் இல்லாது பிறந்த குழந்தை முகம்மது யூசஃபிற்கு மஞ்சள் காமாலை நோய் தாக்க, அறுவை சிகிச்சை செய்வது மட்டுமே பலன் அளிக்குமென மருத்துவர்கள் சொல்லிவிட்டார்களாம்.

மருத்துவர்களின் கட்டணத்தைக் கழித்த பிறகும் கூட ஆறு லட்சம் வரை செலவாகும் என தில்லியிலுள்ள மருத்துவமனை கூறவே மனம் கலங்கிய ஹஃபீஸுக்கு, அந்த மருத்துவமனையில் சிகிச்சை பெற்று வரும் சில நோயாளிகள் ஆறுதல் வார்த்தைகள் கூறி தங்களால் முடிந்த உதவி செய்ய முன்வந்திருக்கிறார்கள். சொன்னது மட்டுமல்லாது மூன்று லட்சம் ரூபாய் சேகரித்துக் கொடுக்க, மீதி மூன்று லட்சம் தனது வாடிக்கையாளர்களிடம் கடனாக பெற்று மகனுக்கு அறுவை சிகிச்சை செய்து விட்டார்களாம்.

தனது கல்லீரலிலிருந்து ஒரு பகுதியையும் கொடுத்திருக்கிறார் இந்த தந்தை. அறுவை சிகிச்சை முடிந்து குழந்தையும் இப்போது நன்றாக இருக்கிறார். மனித நேயத்துடன் உதவி புரிந்த சக நோயாளிகள் பாராட்டுக்குரியவர்கள்.

தில்லியில் இந்த வாரம் ஒரு பெண்ணுக்கு நடந்த ஒரு காட்டுமிரண்டித்தனமான செயலைப் பற்றி சொல்ல நா கூசுகிறது. இப்படிப் பட்ட மிருகங்கள் இருக்கும் இதே தில்லியில் மனித நேயம் இன்னும் தழைப்பது மேலே சொன்ன மனிதர்கள் போன்றவர்களால் தான்.

இந்த வார முகப்புத்தக இற்றை:

 

இன்று உலகம் அழியப் போகிறதாமே! இல்லை இல்லை, அதைத் தள்ளி வைத்து விட்டார்களாம். இப்போது தான் செய்தி பார்த்தேன்!

இந்த வார குறுஞ்செய்தி: 

JUST CHANGE THE WAY YOU LOOK AT THE THINGS & EVEN THE WORST CAN BE CHANGED INTO THE BEST.  READ ‘EVIL’ THE OTHER WAY ROUND AND IT BECOMES ‘LIVE’.  

ரசித்த புகைப்படம்: 

நான் எப்படி போறேனோ அதே மாதிரி பார்த்து எல்லாரும் வந்திடணும்.... ஓகே..

 

ராஜா காது கழுதை காது: 

நீங்கள் அனைவரும் ஆவலுடன் எதிர்பார்த்த ராஜா காது கழுதை பகுதி மீண்டும்! சாலையோர உணவுத் திருவிழா என்ற பதிவில் கிடைத்த [கேட்ட] விஷயம் இது. தமிழக ஸ்டால் நோக்கி சென்றபோது ஒரு தமிழ் குடும்பம் – கணவன், மனைவி மற்றும் மகன் - அங்கிருந்து வந்து கொண்டிருந்தார்கள். இனி அவர்கள் பேசியது.

மனைவி: “அந்த தமிழ்நாடு ஸ்டால்-ல அசோகா அல்வா இருந்தது. வாங்கி சாப்பிட்டு இருக்கலாம். நீங்க தான் வாங்காம வந்துட்டீங்க”

கணவன்: ”அது உன் முகரக்கட்டை மாதிரி இருந்தது. அதான் வாங்கலை!” 

என்ன கடுப்பில் இருந்தாரோ? இருந்தாலும் பொது இடத்தில், என்னதான் தில்லியாக இருந்தாலும், தமிழ் காரர்களும் இருப்பார்கள் என்ற எண்ணம் இல்லாது இப்படியா மனைவியை அவமதிப்பது.

ரசித்த காணொளி:

இப்படி ஒரு திறமைசாலியை நீங்க கண்டிப்பா பார்க்கணும். இந்த திறமைக்காகவே இரண்டு இளநீர் கூட சாப்பிடலாம்!

படித்ததில் பிடித்தது:

’இருட்டு வரப்ப
வெளிச்சம் எங்கப்பா
போவுது..’
‘காக்கா எங்கப்பா
தூங்கும்..’
‘மீனுக்கு குளிராதாப்பா’
‘பசுமாடு குடிக்கதாப்பா பாலு..’

ஜ்வல்யாவுக்குக் கேட்கத் தெரிகிறது..
எனக்கு விழிக்கத் தெரிகிறது..

ரிஷபன் சார் அவ்வப்போது முகப்புத்தகத்தில் இடும் ஸ்டேட்டஸ் கவிதைகள் படிக்க எனக்கு மிகவும் பிடிக்கும். அப்படி சமீபத்தில் படித்த ஒரு ஸ்டேட்டஸ் கவிதை!

மீண்டும் ஃப்ரூட் சாலட்-உடன் அடுத்த வெள்ளியன்று சந்திக்கும் வரை...

நட்புடன்

வெங்கட்.
புது தில்லி.