இறைவனுக்கும் வாகனம் – செய்பவருடன் ஒரு அனுபவம்

அனைவருக்கும் இனிய காலை வணக்கம். அனைவருக்குமே வாகனத்தில் செல்வது பிடித்த விஷயம் தானே. அதுவும் தனக்கென்று ஒரு வாகனம் வைத்திருந்தால் மகிழ்ச்சி. வசதி படைத்த சிலர் தங்களுக்கென்றே நிறைய வாகனங்கள் வைத்திருப்பார்கள் – குஜராத் – அஹமதாபாத் நகரில் இருக்கும் ஒருவர் கிட்டத்தட்ட 250 கார்களை வைத்திருக்கிறார் – அனைத்தும் விண்டேஜ் கார்கள். அது பற்றி படிக்காதவர்கள் இங்கே படிக்கலாம்… மனிதர்களிடமே இத்தனை வாகனங்கள் என்றால் இறைவன் என்ன சும்மாவா? ஒவ்வொரு இறைவனுக்கும் விதம் விதமாக வாகனங்கள். புராணக் கதைகளில் படித்திருக்கிறோமே – புஷ்பக விமானத்தில் இறைவன் வந்து இறங்கினார் என!

யானை முகத்தானுக்கு மூஞ்சூறு, வேலனுக்கு மயில், சிவனுக்கு நந்தி, பூதகணம், ரிஷபம் என பல வாகனங்கள் விஷ்ணுவுக்கு கருடன் – ஹனுமன் என பல வாகனங்கள், ஐயப்பனுக்கு புலி, இப்படிச் சொல்லிக் கொண்டே போகலாம். எதற்காக இந்த வாகனங்கள், அவை குறிப்பது என்ன என்பதை இறைவனின் வாகன அமைப்பும், தத்துவ விளக்கமும் என்ற பதிவினை ஒரு வலைப்பூவில் படித்தேன். நீங்களும் விரும்பினால் படிக்கலாம். நாம் இன்றைக்குப் பார்க்கப் போவது வேறு விஷயம். இந்த வாகனங்களைச் செய்யும் ஒரு நபரிடம் சமீபத்தில் பேச வாய்ப்புக் கிடைத்தது. அதைப் பற்றி தான் இன்றைக்குப் பார்க்கப் போகிறோம்.

எங்கள் பகுதியில் திருமலா திருப்பதி தேவஸ்தானம் கட்டி இருக்கும் திருப்பதி பாலாஜி மந்திர் பற்றி ஏற்கனவே சில முறை எழுதி இருக்கிறேன். சில வருடங்களாக இங்கே திருப்பதியில் நடப்பது போலவே பிரமோற்சவம் நடத்துகிறார்கள். அந்த நாட்களில் ஒவ்வொரு நாளும் காலையிலும் மாலையிலும் உற்சவ மூர்த்தி விதம் விதமான வாகனங்களில் வீதி உலா வருவது வழக்கம். சென்ற வருடம் கோவிலில் இந்த மாதிரியான வாகனங்கள் ஏதும் இல்லை. பக்தர்களும் கோவில் நிர்வாகமும் சேர்ந்து சென்ற வருட பிரமோற்சவம் முடிந்த உடனேயே அடுத்த வருடத்திற்குள் கோவிலுக்கென்று பிரத்தியேகமாக வாகனங்களை செய்து பார்க்க ஆசைப்பட்டார்கள்.

அப்படியான வாகனங்களை செய்து தர தமிழ்நாட்டின் தாராசுரம் [கும்பகோணம்] பகுதியிலிருந்து வந்தவர் தான் திரு மது அவர்கள். அவரும் அவரது குழுவினர்களும் தமிழகத்திலிருந்து தலைநகர் தில்லிக்கு வந்து இங்கேயே தங்கி கருட வாகனம், ஹனுமந்த வாகனம், கஜ வாகனம், ஹம்ச பக்ஷி வாகனம், சேஷ வாகனம் என பல வாகனங்களை மது அவர்களது குழுவினர்கள் செய்து முடித்து இந்த வருடத்தின் பிரஹ்மோற்சவம் சமீபத்தில் வெகு சிறப்பாக நடந்தேறியது. அனைத்து வாகனங்களும் மரத்திலான பீடங்களில் அமைக்கப்பட்டு கம்பீரமாகக் காட்சி தருகின்றன. பொதுவாக, ஆரம்ப நாட்களில் மரங்களில் தான் வாகனம் செய்வார்கள். பிறகு மரத்தில் செய்து அதன் மேல் பித்தளை, தங்கம் அல்லது வெள்ளி தகடுகள் வேய்ந்து செய்வார்கள். இங்கே செய்யப்பட்டிருக்கும் வாகனங்கள் பித்தளைத் தகடுகள் வேயப்பட்டவை.

பிரஹ்மோற்சவம் சமயத்தில் எனது கேமராவில் படங்கள் எடுத்துக் கொண்டிருந்தபோது அவரது வாகனங்களுடன் தன்னையும் படம் எடுத்துத் தரும்படிக் கேட்டுக் கொண்டார். வாகனங்களையும் தனித்தனியாக புகைப்படம் எடுத்து அவருக்கு வாட்ஸப் மூலம் அனுப்பி வைத்தேன். முடிந்தால் அவர் பற்றியும், அவரது தொழில் பற்றியும் நண்பர்களுக்குச் சொல்லுங்கள் எனக் கேட்டுக் கொண்டார் – அதற்கென்ன, வலைப்பூவில் படங்களுடன் தகவல்களும் பகிர்ந்து கொள்கிறேன் என்று சொல்லி இருந்தேன். இதோ பதிவாகவும் இன்றைக்கு வெளிவந்தாயிற்று! திரு மது அவர்கள், பதிவில் ஏற்கனவே சொன்னது போல கும்பகோணம் அருகே இருக்கும் தாராசுரம் பகுதியில் ஸ்ரீ பாலாஜி ஆர்ட்ஸ் & க்ராஃப்ட்ஸ் என்ற பெயரில் நிறுவனம் வைத்திருக்கிறார். அவரது விசிட்டிங் கார்ட் கீழே!

இறைவனுக்கான வாகனம் செய்யும் அவரது தொழில் மேன்மேலும் சிறப்படைய எல்லாம் வல்லவனின் பூரண அருள் கிடைக்க பிரார்த்தனைகள்.  அவர் செய்த வாகனங்கள் இப்பதிவில் படங்களாக. இந்த வாகனங்களில் இறைவன் உலா வந்த படங்கள் விரைவில் வேறு ஒரு பதிவில் வரலாம்! – நிழற்பட உலாவாக!

      

நண்பர்களே, இன்றைய பதிவு/படங்கள் பற்றிய உங்கள் கருத்துகளை பின்னூட்டத்தில் சொல்லுங்களேன்.

மீண்டும் ச[சி]ந்திப்போம்….

 

நட்புடன்

வெங்கட்

புது தில்லி