கதம்பம் - க்ரீச் - வரம் - ஆப்பிள் பேடா - தில்லி - வெண்ணெய்

அன்பின் நண்பர்களுக்கு, இனிய காலை வணக்கம். நேற்று வெளியிட்ட பதிவினை படித்து கருத்துகள் தெரிவித்த அனைத்து வலையுலக நண்பர்களுக்கும் மனம் நிறைந்த நன்றி.  இந்த நாளை நல்லதொரு வாசகத்துடன் தொடங்கலாம் வாருங்கள். 

விட்டுக்கொடுப்பதும், மன்னிப்பதும் தான் வாழ்க்கை.  ஆனால், வாழ்க்கையின் போராட்டமே, யார் விட்டுக்கொடுப்பது, யார் மன்னிப்பது என்பது தான்!

*****

இந்த வாரத்திற்கான செய்தி:  க்ரீச் - Misophonia!!

க்ரீச் என்ற சத்தத்தைக் கேட்கும் போதோ, எந்த பொருளாவது உராயும் போதோ, நகர்த்தும் போதோ பற்கள் பயங்கரமாக கூசும் உணர்வை ஏற்படுத்துமா உங்களுக்கு? அப்போது உங்களுக்கு இருப்பது Misophonia!! சமீபகாலமாக மகளுக்கு இது ரொம்பவே படுத்துகிறது.. இணையத்தில் பார்த்ததில் தெரிந்து கொண்டது.

புயல் சிலருக்கு வரம் - பலருக்கு தொல்லை - 3 டிசம்பர் 2020

தொடர்ந்து வந்து கொண்டிருக்கும் புயல் பலருக்கு கஷ்டமான சூழலைக் கொடுத்திருக்க, திருச்சி வாழ் மக்களுக்கு இந்தப் புயல் வரமாக இருக்கிறது.  

அதிகாலை முதல் நசநசவென்று இடைவிடாத தூறல்! சில்லென்ற திருவரங்கம்!!! மின்விசிறியின் பயன்பாடு தேவைப்படாத நாள்! புயலின் தாக்கம்! அருளிய இறைவனுக்கு நன்றி!  இதுவன்றோ வரம்!!

இந்த வாரத்திற்கான காணொளி - ஆதி’ஸ் கிச்சன் - க்ரீன் ஆப்பிள் பேடா

இந்த வாரத்தில் உங்களுடன் பகிர்ந்து கொள்ள இருக்கும் காணொளி, தீபாவளி சமயத்தில் செய்த ஒரு இனிப்பான க்ரீன் ஆப்பிள் பேடா எப்படிச் செய்வது என்பதைப் பற்றிய காணொளி தான்! பாருங்களேன். 

How to make easy Green apple peda by Adhi Venkat/ Green apple peda/Sweet peda/ஆப்பிள் பேடா/ஸ்வீட்!! - YouTube

இந்த வாரத்தின் பின்னோக்கிப் பார்க்கலாம் பதிவு:

எனது கோவை2தில்லி வலைப்பூவில் இதே வாரத்தில் 2011-ஆம் வருடம் எழுதிய ஒரு பதிவு – ஸ்தம்பித்துப் போகுமா தில்லி? - அப்பதிவிலிருந்து சில வரிகள் இங்கே.

பொதுவாக வட மாநிலங்களில் பாலின் உபயோகம் அதிகமாக இருக்கும். தரமும் அதற்குத் தகுந்தாற்ப் போல் நன்றாக இருக்கும். எருமைப் பால் தான் இங்குள்ளவர்கள் உபயோகிப்பார்கள். பசும்பால் சில இடங்களில் தான் கிடைக்கும். எருமைப்பாலை விட பசும்பாலின் விலை அதிகம். ஏனென்றால் இந்த குளிரில் பசுமாடுகளால் இருக்க முடியாது.

நான்கு பேர் கொண்ட ஒரு வீட்டில் ஒரு நாளைக்கு 4-லிருந்து 5 லிட்டர் வரை பால் வாங்குவார்கள். எல்லோருமே அவ்வப்போது பால் எடுத்துக் கொள்வார்கள். இல்லையென்றால் டீ போட்டுக் குடிப்பார்கள். நம்மூரில் ஆவின் போல இங்கு மதர் டைரி, தில்லி அரசாங்கத்தின் டி.எம்.எஸ், மற்றும் நேரிடையாக நம் கண் முன்னேயே கறந்து தரப்படும் எருமைப் பால் என்று விதவிதமாக கிடைக்கும். கொழுப்புச் சத்துள்ள பால், கொழுப்பு நீக்கப்பட்ட பால், இரண்டு முறை கொழுப்புச்சத்து நீக்கப்பட்ட பால் மற்றும் டோக்கன் போட்டால் மிஷினிலிருந்து வரும் பால் என்று பாலிலும் தரம் பிரிக்கப்பட்டிருக்கின்றன.

முழுபதிவும் படிக்க ஏதுவாக சுட்டி கீழே!

கோவை2தில்லி: ஸ்தம்பித்துப் போகுமா தில்லி? (kovai2delhi.blogspot.com)

இந்த வாரத்தின் இரண்டாம் காணொளி - நெய்/வெண்ணெய்: 

மேலே பகிர்ந்த பின்னோக்கிப் பார்க்கலாம் பதிவுக்கு சம்பந்தமான, இந்த வாரத்தில் எனது Adhi’s Kitchen YouTube Channel-ல் பகிர்ந்த ஒரு காணொளியையும் இங்கே பகிர்ந்து கொள்வது பொருத்தமாக இருக்கும் என்பதால்…

டெல்லியில் பால் தரமானதாக இருக்கும்..எருமைப் பால் தான்! திக்காக ஏடு படியும்.. பால் ஏடை திக்காக எடுக்க சல்லடை போன்று வலைத்தட்டு கிடைக்கும்..அதை பாலை காய்ச்சியவுடன் போட்டு மூடி வைத்தால் ஏடு திக்காக படியும்.. 

மாதம் ஏறக்குறைய 1 கி நெய் கிடைக்கும்..ஃபுல்கா ரொட்டிக்கு தடவ, இனிப்பு செய்ய என்று எல்லாவற்றுக்கும் இது தான்.. கடையில் நெய் வாங்கியது மிகவும் அரிது...திருமணமானது முதல் இந்த முறையைத் தான் பின்பற்றுகிறேன்..மிகவும் எளிது..வேலையும் குறையும்..

 

Adhi's kitchen சேனலில் இந்த வார காணொளி..

How to make Homemade butter - by Adhi Venkat/ Easy butter making/Healthy Butter at home!! - YouTube

பார்த்து விட்டு உங்கள் கருத்துக்களை பகிர்ந்து கொள்ளுங்களேன்..

என்ன நண்பர்களே இந்த நாளில் ”கதம்பம்” பதிவாக பகிர்ந்து கொண்ட விஷயங்கள் பிடித்திருந்ததா? பதிவு பற்றிய உங்கள் கருத்துகளை பின்னூட்டத்தில் சொல்லுங்களேன்! மீண்டும் சந்திப்போம். 

 

நட்புடன்,

ஆதி வெங்கட்