கதம்பம் – ஸ்ரீதேவி – ஆட்டோ அட்ராசிட்டி – மரச்சீனி அப்பளம்

திருச்சிடா! திருச்சின்னா வெயில்டா!

வெயில் ஜோரா இருக்கு. சத்திரம் பேருந்து நிலையம் வரை செல்லும் வேலை இருந்தது. அடிக்கிற வெயிலுக்கு குளுகுளு ஜிகிர்தண்டா!! வழக்கமாக வாங்கும் கடையில் வாங்கி ருசித்தோம். முப்பது ரூபாய். வயிறு குளுகுளு என்றானது…

ஆட்டோ அட்ராசிட்டி

நேற்று இரவு வீட்டுக்குத் திரும்ப ஆட்டோ ஒன்றை விசாரித்தேன். சரியான கட்டணத்தை ஆட்டோக்காரர் சொல்ல, பேரம் பேசாமல் ஆட்டோவில் ஏறி உட்கார்ந்தோம்.

வண்டியை எடுத்ததும், "தப்பா சொல்லிட்டேன், பேசினதை விட சேர்த்து கொடுங்க "என்றார். நீங்க சரியா தான் சொன்னீங்க, அதனால தான் நான் குறைச்சு கேட்கலை என்றேன்.

இல்லம்மா! கட்டாது! என்று சொல்லி வண்டியின் வேகத்திலும் ஒரு திமிறல். வீட்டை வந்தடைந்ததும், இறங்கிய பின் இங்க தான இருக்கு. இதுக்குப் போய் அதிகமா கேட்கறீங்களே?? என்றேன். நான் சரியா தான் கேட்டேன் என்றார். முகத்திலும் கடுகடுப்பு!!

இந்தாங்க!! நீங்க கேட்ட காசு! வெச்சுக்கோங்க!! என்று சொல்லி வீட்டுக்குள் சென்றேன்.

இப்படியும் மனிதர்கள்!!

மார்க் தம்பியின் நினைவூட்டல் – சென்ற வருடத்தில் எழுதியது…

சிலர் பேசும் போது வெடுக்கென்று ஏதாவது சொல்லி விடுவார்கள். அடுத்தவர்களின் மனம் புண்படுமே என்ற எண்ணமே இல்லாமல். நல்ல வார்த்தைகளுடன் மென்மையாக பேசுபவர்கள் மிகக்குறைவே. இரண்டாவது ரகத்தில் ஒரு பெண்மணி இங்கு.

இன்று வாசலில் வந்த பூக்காரம்மாவிடம் வாடிக்கையை வாங்கிக் கொண்ட பின் பக்கத்து வீட்டு பெண்மணி என்னிடம் "வாக்கிங் போகலையா?" என்றார். நானும், இதோ போகணும் என்றேன்.

உடனே பூக்காரம்மா, எங்கேம்மா போற? என்றார். மாடில தாம்மா! என்றதும், வெளில எல்லாம் நீ போகாதம்மா!! மாடில நட! அதுவும் இந்த நேரத்திலேயே போய்டு!! நேரங்கழிச்சு போகாத! தைரியமா போய் நட!! என்று அக்கறையுடன் ஆயிரம் அறிவுரைகள்.

நானும் சரிம்மா! எங்கேயும் போகமாட்டேன்..கவலைப்படாதீங்க என்று சொல்லி, வழக்கம் போல் மூட்டுவலியின் காரணமாக, அவரால் படி இறங்க முடியாது என்பதால் லிஃப்டில் பட்டனை அழுத்தி கீழே அனுப்பி வைத்தேன். வெளியே வந்துட்டீங்களா! என்றும் கூப்பிட்டு உறுதி செய்து கொண்டேன்.

அன்றாடம் பார்ப்பவர்களிலேயே இப்படியும், அப்படியுமாக எத்தனை பேர்.

ஸ்ரீதேவி – மறக்க முடியாத பாடல்

மரச்சீனி (அ) மரவள்ளிக்கிழங்கு அப்பளம்!!

எனக்கு மிகவும் பிடித்தது. நீண்ட நாட்களுக்குப் பிறகு வாங்கியிருக்கிறேன். உங்களுக்கும் பிடிக்குமா??? வாங்க ! வாங்க !

What a Combination Sirji!

வத்தக்குழம்பும், கொத்தவரங்காய் பருப்புசிலியும்!!

வாங்க சாப்பிடலாம்!!

மீண்டும் ச[சி]ந்திப்போம்…

நட்புடன்

ஆதி வெங்கட்

புதுதில்லி.