ருபின் பாஸ் - மலையேற்றம் - நிழற்பட உலா - பகுதி ஒன்று

 

அன்பின் நண்பர்களுக்கு, இனிய காலை வணக்கம். இந்த நாளில் மீண்டும் ஒரு பதிவுடன் உங்கள் அனைவரையும் சந்திப்பதில் மகிழ்ச்சி.   

 

நேற்று வெளியிட்ட காஃபி வித் கிட்டு  பதிவை படித்து கருத்துகள் தெரிவித்த அனைத்து வலையுலக நண்பர்களுக்கும் மனம் நிறைந்த நன்றி.  இந்த நாளை நல்லதொரு வாசகத்துடன் தொடங்கலாம் வாருங்கள். 

 

IF YOU ARE DEPRESSED, YOU ARE LIVING IN THE PAST; IF YOU ARE ANXIOUS, YOU ARE LIVING IN THE FUTURE; IF YOU ARE AT PEACE, YOU ARE LIVING IN THE PRESENT - LAO TZU.

 

******

 

அலுவலக நண்பர் திரு ப்ரேம் Bபிஷ்ட் அவர்களின் மலையேற்றப் பயணங்களில் ஒன்றான கேதார் தால் குறித்து சில பதிவுகளும் அங்கே எடுத்த படங்கள் குறித்த சில பதிவுகளும் இங்கே வெளியிட்டு இருந்தது உங்களுக்கு நினைவில் இருக்கலாம்.  அவர் கடந்த 15-20 வருடங்களில் மேற்கொண்ட மலையேற்றப் பயணங்கள் எண்ணற்றவை.  அவரும் அவருடைய நண்பர் திரு ராவத் அவர்களும் எல்லா வருடமும் ஒன்றிரண்டு மலையேற்றப் பயணங்களையாவது மேற்கொண்டு விடுகிறார்கள் - அந்த அளவு மலையேற்றத்தின் மீது அவர்களுக்கு ஈடுபாடு இருக்கிறது.  அவர் சென்ற பயணங்களின் போது எடுத்த படங்கள் தொகுத்து வைத்திருந்தாலும், அவர் பயணம் குறித்து பெரும்பாலும் எழுதி சேமித்து வைத்துக் கொள்வதில்லை.  ஒன்றிரண்டு பயணங்கள் குறித்து எழுதி இருந்தாலும் அவற்றை வலைப்பூவில் எழுதி வெளியிடவில்லை - காணொளிகள் சில அவர் யூவில் வெளியிட்டு இருக்கிறார்.  அவரிடம் பேசும்போதெல்லாம் மலையேற்றம் குறித்தே பேசுவது வழக்கமாகி விட்டது. 

 

கேதார் தால் பயணத்தினைத் தொடர்ந்து அவரது பயணங்களில் ஒன்றான ருபின் பாஸ் என்ற மலையேற்றம் குறித்து சில விஷயங்களை பகிர்ந்து கொண்டிருக்கிறார்.  கூடவே அப்பயணத்தில் எடுத்த படங்களும்! ருபின் பாஸ்  (கடல் மட்டத்திலிருந்து சுமார் 15300 அடி உயரம்) மலையேற்றம் உத்திராகண்ட் மாநிலத்தில் தொடங்கி ஹிமாச்சலப் பிரதேசம் மாநிலத்தில் முடிவடையும் ஒரு மலையேற்றப் பயணம்.  குறைந்தது ஒரு வாரமாவது இந்த மலையேற்றத்திற்குத் தேவையாக இருக்கும் என்பது கூடுதல் தகவல்.  எண்ணற்ற அருவிகள், சமவெளிப்பகுதிகள், வித்தியாசமான பூக்கள் என பார்க்கும் இடங்கள் எல்லாம் அழகு தான். ஒரே பயணத்தில் இரு வேறு விதமான மாநிலங்களில் பயணிப்பதால் வேறு வேறு மனிதர்களையும் பார்க்க முடியும் என்பது கூடுதல் வசதி.  இந்தப் பயணத்தில் நண்பர் ப்ரேம் மற்றும் அவரது நண்பர் சாம்சங் மற்றும் சோனி டிஜிட்டல் கேமரா கொண்டு எடுத்த நிழற்படங்களை இந்த வாரத்திலிருந்து ஒவ்வொரு ஞாயிறும் பகிர்ந்து கொள்ள இருக்கிறேன்.  நிழற்படங்களின் வரிசையில் முதலாவதாக சில படங்கள் உங்கள் பார்வைக்கு! பயணம் குறித்த தகவல்கள் தனிப் பதிவுகளாக/தொடராக வரும் வாரத்தில் வெளியாகும்!

 

******

 

நண்பர்களே, இந்த நாளில் பகிர்ந்து கொண்ட நிழற்படங்கள் குறித்த தங்கள் எண்ணங்களை பின்னூட்டத்தில் பகிர்ந்து கொள்ளலாமே... விரைவில் வேறொரு பதிவுடன் உங்கள் அனைவரையும் சந்திக்கும் வரை…

 

நட்புடன்

 

வெங்கட் நாகராஜ்

புது தில்லியிலிருந்து….