தினம் தினம் தில்லி -ஆறு - தில்லி எருமையும் பாலும் இனிப்புகளும்……

அன்பின் நண்பர்களுக்கு, இனிய காலை வணக்கம். இந்த நாளில் மீண்டும் ஒரு பதிவுடன் உங்கள் அனைவரையும் சந்திப்பதில் மகிழ்ச்சி.   

நேற்று வெளியிட்ட டேராடூன் பயணம் - பகுதி இரண்டு பதிவினை படித்து கருத்துகள் தெரிவித்த அனைத்து வலையுலக நண்பர்களுக்கும் மனம் நிறைந்த நன்றி.  இந்த நாளை நல்லதொரு வாசகத்துடன் தொடங்கலாம் வாருங்கள். 

******

கடந்த சில வாரங்களாக இங்கே எழுதி வரும் தினம் தினம் தில்லி பதிவுகள் உங்கள் அனைவருக்கும் பிடித்திருக்கும் என நம்புகிறேன்.  இது வரை இந்த தலைப்பில் நான்கு பதிவுகள் வெளியிட்டு இருக்கிறேன். அந்தப் பதிவுகளுக்கு நீங்கள் அனைவரும் தந்த கருத்துரைகள் மகிழ்ச்சியைத் தந்தன.  அதே வரிசையில் ஆறாவது பதிவாக இன்றைக்கு ஒரு பதிவினை பார்க்கலாம் வாருங்கள். 

தில்லி எருமையும் பாலும் இனிப்புகளும்……

தமிழகத்தில் இருந்தவரை அம்மா என்னை அழைக்கும் போதெல்லாம் காது கேட்காத மாதிரி உட்கார்ந்திருக்க கடைசியில் கோபத்தோடு, "ஏ டெல்லி எரும" என்று அழைக்க உடனடியாக, '?' என்று கேட்டு அவரிடம் செல்வேன். அம்மா அடிக்கடி அழைத்த மாதிரியே இந்த டெல்லி எருமையும் டெல்லி வந்து சேர்ந்துவிட்டது…. :) இங்கே வந்தபிறகுதான் அப்படி என்ன டெல்லி எருமைக்கு ஒரு பெருமை என்று தெரிந்தது…. நம்மூர் எருமைகள் பார்த்து வளர்ந்த எனக்கு இந்த ஊர் எருமைகள் பார்த்தபோது சிறிய யானை போல தோன்றியது அதன் அளவு பார்த்து. பிரம்மாண்டமாக இருந்த அந்த எருமைகள் ஒவ்வொரு நாளும் கெட்டியான பால் கொடுக்க அதை சாப்பிட்ட மனிதர்கள் பெரும்பாலும் சோம்பேறிகளாக இருக்கிறார்கள் அந்த எருமைகளைப் போல!!!! 

இங்கு எருமைகளுக்கு கொடுக்கும் உணவுகளும் பார்க்கும்போது பிரமிப்பாக இருக்கும்.  கோதுமையை அரைத்து அப்படியே கொடுப்பார்கள் நம்ம நமது ஊரில் கோதுமை தவிடு மட்டுமே கொடுக்க இங்கேயும் கோதுமையையே அரைத்து கொடுப்பது உண்டு. பாலும் நன்று கெட்டியாக இருப்பதால், தயிர், வெண்ணை என எல்லாமே மிகவும் நன்றாக இருக்கும். இங்கே வந்து பால் சாப்பிட்ட பிறகுதான் நம்ம ஊர் பால் எவ்வளவு நீர்க்க இருக்கிறது என்று புரிந்தது. நம்ம ஊரில் தண்ணீர் கலப்பது அதிகம் இங்கே தண்ணீர் கலக்காமல் தருகிறார்கள் அதுவும் சில இடங்களில் வீட்டுக்கு வாசல் வரை எருமை உடன் வந்து நம் கண்ணெதிரிலேயே நமது பாத்திரத்திலேயே கறந்து தருவதுண்டு.

இந்த்ராணி கப்

பால் நன்றாக கிடைப்பதால் இங்கே பால் கொண்டு தயாரிக்கப்படும் இனிப்புகளும் அதிகம். விதம் விதமான இனிப்புகள் இங்கே கிடைப்பது உண்டு. எத்தனை எத்தனை இனிப்புகள் அவற்றுக்கு வைக்கப்படும் பெயர்களும், சின்னச்சின்ன மாற்றங்களோடு இருக்க அவற்றையெல்லாம் நாம் சுவைக்க முடியும். ஒரு காலத்தில் ஹிந்தி பாட்டு ஒன்று மிகவும் பிரபலமானது. ILU ILU, ILU ILU….. இன்று தொடங்கிய அந்த பாட்டு I LOVE U…. என்று இருக்கும். இந்தப் பெயரில் கூட, அதாவது ILU ILU என்ற பெயரில் கூட பால் இனிப்பு உண்டு. அது மட்டுமா HONEYMOON என்ற பெயரில் கூட பால் இனிப்பு உண்டு. சமீபத்தில் இந்த்ராணி கப் என்ற பெயரில் ஒரு பால் இனிப்பு பார்த்தேன். பொதுவாக ரசமலாய் கேள்விப்பட்டிருக்கலாம். மாம்பழம் சேர்த்த ரசமலாய் சமீபத்தில் சுவைத்தேன். ஆஹா என்ன ஒரு இனிப்பு…. இந்தப் பதிவில் சேர்த்திருப்பது மாம்பழ ரசமலாய் மற்றும் இந்த்ராணி கப் படங்கள்…. தலைநகர் தில்லி வந்தால் நிச்சயமாக ஒரு சில பால் இனிப்புகளை யாவது நிச்சயம் சுவைத்துப் பாருங்கள்.  உங்களுக்கும் பிடிக்கும்…..

மீண்டும் தில்லி குறித்த வேறு ஒரு தகவலுடன் விரைவில் உங்களைச் சந்திக்கிறேன்…. அது வரை….

******

இந்த நாளின் பதிவு குறித்த தங்களது எண்ணங்களை பின்னூட்டம் வாயிலாக சொல்லுங்களேன்.  மீண்டும் வேறொரு பதிவுடன் உங்கள் அனைவரையும் சந்திக்கும் வரை…

நட்புடன்

வெங்கட் நாகராஜ்

புது தில்லியிலிருந்து….