சாப்பிட வாங்க – கொத்தமல்லி பொடி

வாரச்சந்தையில் நானும் தோழியும் காய்கறி வாங்கினோம். எல்லாம் வாங்கிய பின் அண்ணே!! கறிவேப்பிலை, கொத்தமல்லி குடுங்க என்றேன்.

இந்தாங்க அக்கா!! என்று கையில் ஒரு பெரிய கட்டு கொத்தமல்லியை திணித்தார். கொசுறாக சிறிதளவு கறிவேப்பிலை.

என்னண்னே!! என்று பார்க்க, 200 க்கு மேல் காய் வாங்கியதால் கொத்தமல்லி கட்டு இனாமாம். பம்பர் பரிசு கிடைத்த சந்தோஷம் இருவருக்கும்.

நேற்று கொத்தமல்லி சாதம் செய்து பாதி கட்டை காலி செய்தேன்.. இன்று வீணாக போவதற்குள் மீதியை காலி செய்ய வேண்டும் என்று முடிவெடுத்து விட்டேன்.

அம்மா செய்து கொத்தமல்லி பொடி சாப்பிட்டிருக்கிறேன். சட்டென்று வீணாகவும் போகாது. இணையத்தில் தேடி ரெசிபி எடுத்தேன். செய்தாச்சு.

தேவையான பொருட்கள்:

கொத்தமல்லி தழை – ஒரு கப்

கடலை பருப்பு – அரை கப்

உளுத்தம் பருப்பு – அரை கப்

சிகப்பு மிளகாய் – அரை கப்

பெருங்காயத் தூள் – கால் டீஸ்பூன்

புளி – ஒரு எலுமிச்சை அளவு

நல்லெண்ணை – அரை டீஸ்பூன்.

உப்பு – தேவையான அளவு

செய்முறை:

கொத்தமல்லி தழைகளை தண்ணீரில் சுத்தம் செய்து பரத்தி, உலர்த்தவும்.

புளியை வாணலியில் கொஞ்சமாக வறுத்துக் கொள்ளவும்.

கடலைப் பருப்பு, உளுத்தம்பருப்பு, பெருங்காயம், சிகப்பு மிளகாய் ஆகியவற்றை நல்லெண்ணை விட்டு இளஞ்சிவப்பாக வறுத்துக் கொள்ளவும்.

கொத்தமல்லி தழைகளையும் வாணலியில் போட்டு வதக்கிக் கொள்ளவும்.

மிளகாய், புளி, உப்பு ஆகியவற்றை மிக்சி ஜாரில் போட்டு அரை நிமிடம் அரைக்கவும். பிறகு அந்த ஜாரில் கொத்தமல்லியை போட்டு அரை நிமிடம் அரைக்கவும். பிறகு மீதி உள்ள பருப்புகளையும் அரை நிமிடம் அரைத்துக் கொண்டால் கொத்தமல்லி பொடி ரெடி!

சூடான சாதத்தில் போட்டு நல்லெண்ணெய் விட்டு சாப்பிடலாம். மோர்சாதத்துக்கும் நல்ல ஜோடி.

உங்கள் கருத்துகளை பின்னூட்டத்தில் சொல்லலாமே!

மீண்டும் ச[சி]ந்திப்போம்....

நட்புடன்

ஆதி வெங்கட்

திருவரங்கத்திலிருந்து....

அலைபேசி மூலம் தமிழ்மண வாக்களிக்க....