ஷிவ் ஜெயந்தி – சத்ரபதி ஷிவாஜி – புகைப்பட உலா

சத்ரபதி ஷிவாஜி அவர்களின் பிறந்த நாள் இந்த முறை பல இடங்களில் கொண்டாடப்பட்டது – ஃபிப்ரவரி 19-ஆம் தேதி தலைநகரிலும் ஷிவ் ஜெயந்தி 2018 என்ற பெயரில் திருவிழா நடக்கப்போவது பற்றி 18-ஆம் தேதி தான் தெரிந்தது. 18-ஆம் தேதி வேறு ஒரு விழாவிற்குச் சென்றபோது தான் விழா பற்றிய பதாகை பார்த்தேன். நான் 18-ஆம் தேதி சென்ற போது கோல்ஹாபூர் [மஹாராஷ்ட்ரா]விலிருந்து வந்திருந்த இளைஞர்கள் டோல் எனப்படும் கருவியை இசைத்தபடி வீர முழக்கங்கள் எழுப்புவதைப் பார்த்தபோது அடுத்த நாள் மாலை விழாவிற்குச் செல்ல வேண்டும் என முடிவு செய்திருந்தேன் – நாம் முடிவு எடுத்துவிட்டால் போதுமா? அடுத்த நாள் பார்க்க முடிந்ததா?

அடுத்த நாள் மாலை அலுவலகத்திற்குச் செல்லும்போதே கேமரா பையையும் எடுத்துக் கொண்டு அலுவலகத்தில் பொருட்கள் பாதுகாப்பு அறையில் வைத்துவிட்டேன். மாலை கொஞ்சம் சீக்கிரமாக [ஆறு மணிக்கு] புறப்பட்டு, நண்பர் பத்மநாபனையும் அழைத்துக் கொண்டு நிகழ்ச்சி நடக்கும் இடத்திற்குச் சென்றபோது மாலை ஆறரை மணி! சாலையெங்கும் பலத்த பாதுகாப்பு! எப்போதும் செல்லும் நுழைவு வாயில் அருகே சாலையைக் கடக்க, ஒரே விசில் சப்தம் ”இப்படிப் போகக் கூடாது – அடுத்த நுழைவாயில் வழியே வாருங்கள்” எனச் சொல்ல, அடுத்த நுழைவாயிலை அடைந்தோம். வாசலில் பெரியதோர் சிவாஜியின் சிலை வைத்திருக்க புகைப்படம் எடுத்துக் கொண்டோம்!

விழா நடக்கும் பகுதிக்குச் சென்றால் X-Ray Machine – கேமரா பையை வைக்க, ”பையில் என்ன இருக்கிறது?” என்றார் அக்கருவியை இயக்குபவர். கேமரா என்று சொன்னவுடன், ”இதற்கு அனுமதி கிடையாது” என்று சொன்னார். குடியரசுத் தலைவர் வந்திருப்பதால் பாதுகாப்பு கெடுபிடிகள்! ஆனால் அங்கே கேமராவைப் பாதுகாப்பாக வைக்க வசதிகள் இல்லை! வேறு வழியில்லை. நிகழ்ச்சியை பார்க்கவும் முடியாது! சிறிது நேரம் வெளியே நின்றுவிட்டு அங்கிருந்து புறப்பட்டோம்.  நல்ல வேளையாக முதல் நாள் சென்றபோது கோல்ஹாபூரிலிருந்து வந்திருந்த இளைஞர்கள் பயிற்சி செய்ததை புகைப்படமாகவும், காணொளிகளாகவும் எடுத்திருந்தேன். 

அத்தனை பெரிய டோல், அதனை இடுப்பில் தடிமனான கயிறு மூலம் நான்கைந்து சுற்று சுற்றி கட்டி வைத்துக் கொண்டு டோல் வாசிப்பது மட்டுமல்லாது, நடுநடுவே சுற்றிச் சுற்றியும், டோலை மேலே தூக்கியும் ஆடுவது ரொம்பவே கடினமான விஷயம். ஆண்கள், பெண்கள் என இருவருமே அந்த குழுவில் இருந்தார்கள். ஒரு சிறுவன் கூட நம் ஊர் தாரை-தப்பட்டை போன்ற வாத்தியத்தினை வாசித்துக் கொண்டிருந்ததைப் பார்க்க முடிந்தது. முழு நிகழ்வினையும் பார்க்க முடிந்திருந்தால் நன்றாக இருந்திருக்கும். பாதுகாப்பு காரணமாக கேமராவுடன் உள்ளே அனுமதிக்கவில்லை! சரி பரவாயில்லை. அவர்கள் பயிற்சி செய்ததை எடுத்து வைத்திருந்ததால், உங்களுடன் பகிர்ந்து கொள்ளவே இப்பகிர்வு.

பயிற்சியின் போது அவர்களின் துடிப்பும், டோலை உபயோகித்த விதமும், நடுநடுவே எழுப்பிய “ஜெய் ஷிவாஜி, ஜெய் பவானி” கோஷங்களும் நம்மையும் சிலிர்க்க வைத்தது. வாருங்கள் புகைப்படங்களையும் காணொளிகளையும் பார்க்கலாம்….

புகைப்படங்கள் மற்றும் காணொளிகளை ரசித்தீர்களா? உங்கள் கருத்துகளை பின்னூட்டத்தில் சொல்லலாமே!

மீண்டும் ச[சி]ந்திப்போம்....

நட்புடன்

வெங்கட்

புது தில்லி.