நவராத்ரி கொலு – சில படங்களும் வரவுகளும்…

கீதாம்மா வீட்டு கொலு...

நவராத்ரி என்றாலே கொலு பார்ப்பதும், தோழிகளுடன் கலந்துரையாடுவதும், கலெக்‌ஷனும் தானே… இந்த வருடம் எங்களுக்கு பண்டிகை இல்லை என்றாலும், அழைத்த சில வீடுகளுக்குச் சென்று வந்தோம் – நானும் மகளும். என்னவர் இங்கே இருந்தாலும், அவர் ஒரே ஒருவர் வீட்டிற்கு தான் வந்தார் – அது கீதாம்மா [எண்ணங்கள் கீதா சாம்பசிவம் அவர்கள்] வீட்டிற்கு தான்! அங்கிருந்து தான் இந்த வருடன் கலெக்‌ஷன் ஆரம்பம்! அவர் இல்லத்துக்கு நேற்று சென்று சிறிது நேரம் பேசி விட்டு கொலுவை பார்த்து தாம்பூலம் பெற்று வந்தோம். நெய் சொட்டும் கேசரியுடன், அழகான பரிசுப்பொருளும் - எங்களுக்கு பிடித்த கணேஷா தான் பரிசாக!

நாங்கள் சென்ற போது மாமா பொடிப் பொடியாக வெங்காயம் நறுக்கிக் கொண்டிருந்தார்.

”மாமிக்கு ஹெல்பா!!!” என்றதும்...

”இல்ல இல்ல... எங்கப்பாவுக்கு சத்தியம் பண்ணிக் கொடுத்திருக்கார்... உங்கப் பொண்ணை கண்கலங்க விடமாட்டேன்னு... அதான்…” என்றார் கீதாம்மா… எல்லோரும் கலகலப்பானோம்…

அன்றைக்கு இரவு உணவிற்கு நட்புவட்டத்தில் ஒரு குடும்பத்தை டின்னருக்கு அழைத்திருந்தோம். சப்பாத்திக்கு மாவு பிசைந்து தந்தார் என்னவர். மாமி வீட்டிலிருந்து வந்த பின் இரண்டு விதமான சப்ஜி செய்து, அவர் சப்பாத்தி தேய்த்து தர, போட்டு எடுத்து பரிமாறினேன்.

இரண்டாம் நாள் இரண்டு வீடுகளுக்குச் சென்று கொலு பார்த்து வந்தோம்! அப்ப மூன்றாம் நாள் மூன்று வீடா என்ற கேள்வி வரக்கூடாது!

மூன்றாம் நாள் ஒரு வீட்டிலும், நான்காம் நாள் வேறொரு வீட்டிலும் கொலு பார்த்து வந்தோம்.  இந்த வருடம் குறைவான அழைப்புகள் தான் – அதனால் எடுத்த படங்களும் குறைவு.  எங்கள் வீட்டிலும் கொலு இல்லை. இருந்தால் படங்கள் எடுத்து பகிர்ந்திருக்கலாம் – அனைவரையும் கொலுவிற்கு அழைத்திருக்கலாம்…. இருக்கவே இருக்கு அடுத்த வருட கொலு, இந்த வருடமே மூன்று நான்கு பொம்மைகள் புதியதாக வாங்கி வைத்திருக்கிறோம். அடுத்த வருட கொலுவை ஜமாய்த்து விடலாம்!

என்ன நண்பர்களே, நான் எடுத்த படங்களை ரசித்தீர்களா? பின்னூட்டத்தில் சொல்லுங்களேன்.

மீண்டும் வேறு ஒரு பகிர்வுடன் சந்திப்போம்…. சிந்திப்போம்….

நட்புடன்

ஆதி வெங்கட்