என்ன சமையலோ…. – ஆதி வெங்கட்

வாழைக்காய் மொளகூட்டல்!!

ரெசிபி பார்க்காமல் சற்றே மாறுதலுக்கு செய்து பார்த்தது. தேங்காய் எண்ணெய் மணத்தில் நன்றாகவே இருந்தது. கேரள சமையல் எனக்கு எப்போதுமே பிடிக்கும். சிகப்பரிசி சாதத்தை தவிர!

 

முகநூலில் இந்த நிலைத் தகவலை பகிர்ந்த போது, பதிவர் சாந்தி மாரியப்பன் [அமைதிச் சாரல்] அவர்கள் “நாங்க என்ன கேக்கப்போறோம்? வழக்கம்போல ரெசிப்பிதான்!” என்று கேட்டிருந்தார்.  அவருக்கு பதிலாகத் தந்ததையே இங்கே தருகிறேன் – “வாழைக்காயை வேகவைத்து, உப்பு, மஞ்சள்தூள் சேர்க்கவும். தேங்காயுடன் மிளகும், சீரகமும் சேர்த்து அரைத்து காயில் சேர்க்கவும். கொதித்ததும் தேங்காய் எண்ணெயில் கடுகு, உளுந்து கறிவேப்பிலை சேர்த்து தாளிக்கவும். பருப்பும் வேகவைத்து சேர்க்கலாம். மிளகுக்கு பதில் மிளகாயும் சேர்க்கலாம். புளிக்கரைசல் தேவையில்லை!”

மாலைத் தேநீருடன் கப்பக்கிழங்கு!!!

கோவையில் அடிக்கடி வேகவைத்த மரவள்ளிக்கிழங்கு அம்மா கொடுப்பாங்க. இல்லையென்றால் கடுகு, உளுத்தம்பருப்பு, வரமிளகாய் தாளித்து துண்டங்களாக நறுக்கிய வேகவைத்த மரவள்ளிக்கிழங்கு சேர்த்து பிரட்டி இறுதியில் துருவிய தேங்காயும் சேர்ப்பார். பிரமாதமாக இருக்கும்.

அங்கு பழைய பேப்பர், இரும்புச் சாமான் வாங்குபவரும் (ஹிந்தியில் - Kabaadiwala என்று சொல்வார்கள்) கூட எடைக்கு தகுந்தாற்போல் மரவள்ளி தான் தருவார்.

மரவள்ளி அப்பளமும், சிப்ஸும் எனக்கு மிகவும் பிடித்தமானது.

கோவை வாசத்திற்கு பிறகு மரவள்ளி சாப்பிட்ட சந்தர்ப்பம் மிகவும் அரிது. டெல்லியில் கேரளக் கடைகளில் கிடைக்கும்.

காய்கறிக்கடையில் பார்த்ததும் வாங்கி வந்தேன். மாலை மகளுக்கு உப்பு போட்டு வேகவைத்து தந்தேன். அவளுக்கு ஏனோ இஷ்டப்படலை.

தீபாவளி பலகாரங்கள்…

இந்த முறை எங்களுக்கு தீபாவளி இல்லை – அதனால் பலகாரம் ஒன்றும் செய்யப் போவதில்லை என்று இருந்தேன். சென்னையிலிருக்கும் தம்பி அக்காவுக்காக வாங்கி அனுப்பிய இனிப்பு காரங்களுடன் தித்திக்கும் தீபாவளி!!!

தீபாவளி முடிந்த பிறகு நான் செய்த இரண்டு பலகாரம் – ரவா லாடு மற்றும் ரிப்பன் நாடா!

ரவை குழிப்பணியாரம்!!

தோசைமாவு கொஞ்சமே கொஞ்சம் தான் இருந்தது! சரி என அதில் ரவை சேர்த்து செய்தேன் – ரவை குழிப்பணியாரம்!

ஒவ்வொரு நாளும் சமையல் என்ன செய்வது என்று யோசிப்பதே பல வீடுகளில் நடக்கும் விஷயம் – என்ன சமைக்கலாம் எனக் கேட்டால் பதில் வேறு ஒழுங்காகக் கிடைக்காது! என்ன வேணும்னாலும் சமைக்கலாம்! சமீபத்தில் செய்த சில பலகாரம் இன்றைய பதிவில் ஒரு தொகுப்பாக….  முகநூலில் பகிர்ந்தவை இங்கேயும் ஒரு சேமிப்பாக!

மீண்டும் வேறு ஒரு பகிர்வுடன் சந்திப்போம்…. சிந்திப்போம்….

நட்புடன்

ஆதி வெங்கட்