கதம்பம் - ரோஸ்மில்க் புட்டிங் - Brussels Sprout - எங்கே போகிறோம்?

அன்பின் நண்பர்களுக்கு, இனிய காலை வணக்கம். இந்த நன்நாளில் மீண்டும் ஒரு பதிவுடன் உங்கள் அனைவரையும் சந்திப்பதில் மகிழ்ச்சி.  

இதற்கு முன்னர் வெளியிட்ட இயற்கை அன்னையின் மடியில் - தங்குமிடங்கள் பதிவினை  படித்து கருத்துகள் தெரிவித்த அனைத்து வலையுலக நண்பர்களுக்கும் மனம் நிறைந்த நன்றி.  இந்த நாளை நல்லதொரு வாசகத்துடன் தொடங்கலாம் வாருங்கள். 

*******

ரோஸ்மில்க் புட்டிங் - 10 ஃபிப்ரவரி 2024:

நேற்றைய மாலைப்பொழுதில் என்னவருடன் பணிபுரிந்த பெங்காலி நண்பரும் அவரின் மனைவியும் எங்கள் வீட்டுக்கு டின்னருக்கு வரவே அவர்களுக்காக இந்த ரோஸ்மில்க் புட்டிங் தயார் செய்து செட் செய்திருந்தேன்.

டின்னருக்காக செய்து வைத்திருந்த சுடச்சுட இட்லியும் குழிப்பணியாரமும் சட்னி சாம்பாருடன் பரிமாறிய பின் டெஸர்டுக்காக இதை கிண்ணங்களில் பரிமாறினேன். 

கடையில் வாங்கிய ஏதோ ஒரு இனிப்போ அல்லது ஐஸ்க்ரீமோ என்று நினைத்தவர்களிடம், 'என் ஒய்ஃப் வீட்டிலேயே பண்ணினது தான்! நேத்தே உங்களுக்காக prepare பண்ணி வெச்சிட்டா! இவ இந்த மாதிரி நிறைய பண்ணுவா!' என்று என்னவர் சொன்னதும் டெஸர்ட்டை  மிகவும்  விரும்பி சாப்பிட்டார்கள்! டேஸ்ட்டும் அருமையாக இருந்ததாகச் சொன்னார்கள்!

பாலுடன் சர்க்கரை, பால்பவுடர் மற்றும் அகர் அகர் சேர்ந்து நன்கு கொதிக்கும் போது ஃப்ளேவருக்காகவும் கலருக்காகவும் ரோஸ்மில்க் பவுடர் சேர்த்திருந்தேன். இதற்குப் பதிலாக ஏலக்காய் பொடியும் சேர்க்கலாம். மேலே கொஞ்சம் நட்ஸ் பொடி செய்து தூவியிருக்கேன்.

*******

Brussels Sprout - 12 ஃபிப்ரவரி 2024:

என்னக்கா! ரெண்டு வாரமா அண்ணன  அனுப்பிட்டு நீங்க வீட்டுலயே இருந்திட்டீங்களா?? உங்கள காணவே இல்ல!

சந்தையில் வழக்கமாக வாங்கும் காய்க்காரரின் விசாரிப்பு..:)

மற்றொரு காய்க்காரரிடம் வழக்கமான காய்கறிகளை விட புதுசாக மார்கெட்டுக்கு வரும் காய்கறிகளும் பழங்களும் இருக்கும்! ஸ்ட்ராபெர்ரி, கிவி, பேபிகார்ன், ட்ராகன் ஃப்ரூட், ப்ரொகோலி, டபுள் பீன்ஸ், சோயா போன்றவை இவரிடம் இருக்கும்!

இன்று 'இந்தக் காய் வாங்கிப் பாருக்கா! அப்புறம் வாராவாரம் வந்து கேட்ப! என்று சொல்லிக் கொண்டே இருக்கவே என்னவென்று பார்த்ததில்...

முட்டைக்கோஸின் மினியேச்சர் உருவம் கொண்டு கூடை நிறைய இருந்தது!

நம்ம துளசி டீச்சரின் நியூஸிலாந்து சமையலில் பார்த்தது நினைவுக்கு வந்தது! 

அந்தக் காய்க்காரரிடம் இது இந்த ஊர் காய் இல்ல! ஃபாரின் காய்! என்றேன்.

இல்லக்கா! இது ஃபாரின் காயெல்லாம் இல்ல! நம்ம ஊட்டில இருந்து தான் வருது! என்று அடுத்த வீட்டு கொல்லையில் இருந்து பறித்து வந்த மாதிரி சொல்றார்...:)

நீ இத ஃபோட்டோ புடிச்சு நெட்ல போட்டுப் பாரு! எவ்வளவு சத்து இருக்குன்னு தெரிஞ்சிட்டு வந்து வாங்கு! சமைச்சுப் பாரு! அப்புறம் விடவே மாட்ட!! என்றும் சொன்னார்..:)

வீட்டுக்கு வந்து கூகுள் லென்ஸ் வழியாக இணையத்தில் பார்த்ததில் அதன் பெயர் Brussels Sprout என்று சொல்லியது! முட்டைக்கோஸ் குடும்பத்தைச் சேர்ந்தது தான் என்றும் ஆனால் இது முட்டைக்கோஸ் அல்ல என்றும் விளக்கியது...:)

அடுத்த வாரம் கொஞ்சமா வாங்கி சோதித்துப் பார்க்கலாமா??

இப்போதெல்லாம் எல்லா இடத்திலும் எல்லாமே கிடைக்க ஆரம்பித்து விட்டது.

*******

எங்கே போகிறோம் - 13 ஃபிப்ரவரி 2024:

வெளிநாட்டில் பணிபுரியும் கணவன்! இங்கே பணிபுரியும் மனைவி! இவர்கள் இடையேயான அலைபேசி வழிக் காதலும்,  புரிதலுமாக நாட்கள் சென்று கொண்டிருக்க, மனைவியின் திடீர் கர்ப்பம் அவளை மிகவும்  குழப்புகிறது! கவலை கொள்ள வைக்கிறது! எப்படி என்று தெரியவில்லை! தனக்கே அறியாமல் ஏதோ ஒன்று நிகழ்ந்துள்ளது என்று மட்டும் அவளுக்குப் புரிகிறது!!

சிசிடிவியில் கூட பார்க்கிறாள் புதிதாக யாருமே வீட்டுக்கும் வரவில்லை! இதையெல்லாம்  கணவனிடம் என்னவென்று சொல்வது! அவன் எப்படி எடுத்துக் கொள்வான் என்று தன் தோழியிடம் சொல்லி குமுறுகிறாள்! அப்போது....

அம்மா! என்று ஒரு குரல்! நான் தான் உங்க குழந்தை பேசறேன் என்று வயிற்றிலிருக்கும் 45நாள் சிசு அம்மாவிடம் பேசுகிறது! விஷயத்தையும் விளக்குகிறது! வேற்றுக் கிரகவாசிகள் பூமியில் ஒரு உயிரை உருவாக்க நினைத்ததாகவும் அப்படி ஒரு உயிராக தான் உருவான வரலாற்றையும் அந்தக் குழந்தை சொல்லும் போது அதிர்ச்சியடைகிறாள் அந்தப் பெண்!!

இப்படியொரு கதையை நேற்று இரவு fmல் கேட்க நேர்ந்தது! எழுதியவர் யாரென்று கவனிக்கவில்லை! காதல் கதைகள் வாரத்தில் இப்படியொரு கதை!! அதைக் கேட்டதிலிருந்து நாம் எங்கே சென்று கொண்டிருக்கிறோம் என்று தான் தோன்றுகிறது??? இப்படியெல்லாம் கூட இயற்கைக்கு மாறாக நடந்துவிடுமா என்று தான் அசை போட்டுக் கொண்டிருந்தது மனது!

இதைப் பற்றி உங்கள் கருத்து என்ன??

*******

இன்றைய பதிவு குறித்த தங்களது எண்ணங்களை பின்னூட்டத்தில் சொல்லுங்கள். விரைவில் வேறொரு பதிவுடன் உங்கள் அனைவரையும் சந்திக்கும் வரை…

நட்புடன்

ஆதி வெங்கட்