வாசிப்பனுபவம் - தாசரதி - ரிஷபன்

அன்பின் நண்பர்களுக்கு, இனிய காலை வணக்கம். இந்த நாளில் மீண்டும் ஒரு பதிவுடன் உங்கள் அனைவரையும் சந்திப்பதில் மகிழ்ச்சி.   

இதற்கு முன்னர் வெளியிட்ட Quarantine from Reality பதிவினை படித்து கருத்துகள் தெரிவித்த அனைத்து வலையுலக நண்பர்களுக்கும் மனம் நிறைந்த நன்றி.  இந்த நாளை நல்லதொரு வாசகத்துடன் தொடங்கலாம் வாருங்கள். 

******

சற்றே நீண்ட இடைவெளிக்குப் பிறகு ஒரு வாசிப்பனுபவத்துடன் உங்கள் அனைவரையும் சந்திப்பதில் பெரு மகிழ்ச்சி.  அதிலும் நண்பர் திரு ரிஷபன் அவர்களின் கவிதை நூலான “தாசரதி” குறித்த வாசிப்பனுபவத்துடன் சந்திப்பதில் அதிக மகிழ்ச்சியும் ஆனந்தமும்.  பல முன்னணி இதழ்களில் இவரது கதைகள் பிரசுரமாகி இருக்கின்றன.  ஒன்றல்ல, இரண்டல்ல, சுமார் 2000 கதைகள் - ஒவ்வொரு கதையும் படிப்பவர் மனதைத் தொடும் விதமாகவே இருக்கும் என்பதில் எள்ளளவும் சந்தேமில்லை.  படித்து பல நாட்கள் ஆனாலும் அவரது படைப்பில் உருவான காதாபாத்திரங்கள் நம் மனதை விட்டு அகல்வதில்லை என்பது அவரது படைப்புகளின் சிறப்பு. 

சமீபத்தில் திருவரங்கம் சென்றிருந்தபோது அவர் கையாலேயே, அவரது கையொப்பம் இட்ட “தாசரதி” கவிதைத் தொகுப்பினை பெற்றுக் கொள்ள முடிந்ததில் மனதுக்கு பேருவகையும் மகிழ்ச்சியும் என்று சொன்னால் அது மிகையல்ல.  மூன்று தலைப்புக்கள் - கண்ணா, தாசரதி மற்றும் ரங்கா… மூன்று தலைப்புகளிலும் முப்பது முப்பது கவிதைகள்.  முப்பது முப்பது நாட்கள் தொடர்ந்து ஒவ்வொரு தலைப்பிலும் எழுதிய கவிதைகள்.  மூன்று தலைப்பிலும் எழுதிய கவிதைகள் ஒரே தொகுப்பாக “தாசரதி” என்ற பெயருடன் ஒரே புத்தகமாக வெளியிட்டு இருக்கிறார்.  புத்தகத்தின் விலை ரூபாய் 150/-.  புத்தகத்தினைப் பெற அணுக வேண்டிய மின்னஞ்சல் முகவரி - rsrinivasanrishaban@gmail.com.

கவிதைக்கான பாடுபொருள் கண்ணன், ராமன் மற்றும் திருவரங்கத்தின் அரங்கன்… ஒவ்வொருவர் மீதும் முப்பது கவிதைகள். அடடா…   பாடுபொருளாக அமைந்தவர்கள் மீது என்ன ஒரு பேரன்பு.  இறைவனை விதம் விதமாக கொண்டாடுவது, நட்பாக கருதுவது, அன்புடன் பேசுவது, இறைஞ்சுவது என ஒவ்வொரு கவிதையிலும் மனதைத் தொடுகிறார் நூலாசிரியர் திரு ரிஷபன் அவர்கள்.  மூன்று தலைப்புகளிலிருந்தும் ஒவ்வொரு கவிதையை உதாரணத்திற்கு இங்கே தருகிறேன். மற்ற கவிதைகளை நூலில் படித்தால் அவருக்கும் மகிழ்ச்சி, உங்களுக்கும் நிச்சயம் படிக்கும்போது மனதில் மகிழ்ச்சியும் பூரிப்பும் உண்டாகும் என்பதில் சந்தேகமில்லை. வாருங்கள் மாதிரி கவிதைகளுக்குச் செல்வோம். 

கண்ணா….

பித்து பிடிக்கட்டும்

அப்போதும் 

உன் பெயர் மட்டுமே

உச்சரிக்கும் வரம் வேண்டும்.

அவதாரங்களில்

வேஷம் ஏற்பதில்

அழ விட்டு

வேடிக்கை பார்ப்பதில்

அழைக்காதவர் முன்

போய் நிற்பதில்

ஆகச் சிறந்த நடிகன் நீ.

சுற்றிச் சுற்றி வந்தால்

கண்டு கொள்வதே இல்லை.

வேண்டாம் போ என்று

விலகினால் அனுப்புகிறாய்

சந்நிதி பிரசாதம்.

உனக்கும் வேண்டியிருக்கிறது

ஓர் விளையாட்டு.

தாசரதி….

தாள் கண்டார்

தாளே கண்டார்..

கல்லைப் பெண்ணாக்கினாய்.

ஓடத்தில் கால் வைக்குமுன்

சற்றே நில்லென்று சொல்லி

திருவடி சோதித்தான் குகன்.

'என் சொத்தே இந்த ஓடம்தான்..

பெண்ணாக்கி விட்டால்

என் செய்வேன்'

பாதம் பற்ற எத்தனை

சூட்சமமாய் புத்தி..

பாறையாய்க் கிடக்கும்

என் மனதிலும்

பாதம் பதியேன் ராமா..

பக்தி துளிர்க்கட்டும்

அப்படியாவது !

ரங்கா…

திரைக்கு முன்

காக்க வைக்கிறாய்.

அமுது செய்கிறாய் என்று

காத்திருந்தேன்.

திருவாராதன சப்தம் ஏதும்

கேட்கவில்லை.

அலங்காரம் ஆகிறதோ

எதற்கும் பொறுக்கலாம்.

நாழிகை அதன் போக்கில்

போய்க் கொண்டிருந்தது.

திரையோ விலகியபாடில்லை.

என்னாச்சு இன்று

ஏனிந்த சோதனை

பரிதவிப்பில் பரபரப்பில்

போய் விடலாமா என்று

திரும்ப யத்தனிக்கையில்

மாயத்திரை விலகுகிறது.

'இப்போது சொல்..

நேரம் ஒதுக்க வேண்டியது

நீயா, நானா?'

ரங்கனின் கேலிப்பார்வை !

இறைவன் மீது எத்தனை அன்பிருந்தால் இப்படியெல்லாம் எழுத முடியும் என்பதை இவரது கவிதைகளே நமக்கு உணர்த்துகின்றன.  ஒவ்வொரு கவிதையுமே நமது எண்ணங்களை இறைவனை நோக்கிச் செலுத்தும் விதமாக அமைந்திருக்கிறது என்று சொல்ல வேண்டும்.   இந்த நூலை வாங்கி எல்லா கவிதைகளையும் படித்து இன்புறுங்களேன்.  மீண்டும் வேறு ஒரு வாசிப்பனுபவத்துடன் சந்திக்கும் வரை….

*******

இன்றைய பதிவு குறித்த தங்களது எண்ணங்களை பின்னூட்டத்தில் சொல்லுங்கள். விரைவில் வேறொரு பதிவுடன் உங்கள் அனைவரையும் சந்திக்கும் வரை…

நட்புடன்

வெங்கட் நாகராஜ்

புது தில்லி

20 நவம்பர் 2024.

குறிப்பு: படங்கள் ரிஷபன் ஜி அவர்களின் முகநூல் பக்கத்திலிருந்து...