அபலைகள் – திரு. கல்பட்டு நடராஜன்

திரு. கல்பட்டு நடராஜன் அவர்கள் ஒரு மிகச்சிறந்த புகைப்படக் கலைஞர். தமிழில் புகைப்படக்கலை வலைப்பூவில் அவரது அனுபவங்களை பகிர்ந்து கொண்ட போது படித்து பல விஷயங்களை அறிய வாய்ப்பு கிடைத்தது. சமீபத்தில் மறைந்த அவரது ஒரு கவிதை/கதைத் தொகுப்பினை படிக்கும் வாய்ப்பு கிடைத்தது. WWW.FREETAMILEBOOKS.COM தளத்தில் அவரது அபலைகள் கவிதை/கதைத் தொகுப்பை மின்புத்தகமாக வெளியிட்டு இருக்கிறார்கள். அத்தொகுப்பினை வாசித்த அனுபவமும், மின்புததகத்திலிருந்து நான் ரசித்த சில கவிதைகளும் கதைகளிலிருந்து சில வரிகளையும் இப்பதிவில் பார்க்கலாம். 

"பெண்கள் வாழ்ந்திடும் தியாக வாழ்க்கையினையும், அவர்களுக்கு எதிராய் ஆண்கள் புரிந்திடும் குற்றங்களை எதிர்த்துப் போரிடும் சக்தி அற்ற தன்மையையும் மனதில் கொண்டு அவர்களை அபலைகள் என்று சொல்கிறோம். [அ + பலை = பலம் அற்றவர்]" என்று தனது முன்னுரையில் சொல்கிறார் திரு கல்பட்டு நடராஜன்.

அபலையின் கண்ணீர்-1 கவிதையில் இருந்து சில வரிகள்....

சொரம் ஒண்ணு வந்திருச்சு

சுருண்டேதான் படுத்திருக்கேன்

வந்திருவான் இபபோ மொடாக்குடியன்

காசுக்கு எங்கே போவேன் நான்

குடுக்கத்தான் அவனுக்கு

வாய் கூசாம ஏசிடுவான்

ஆரு கூட நீ படுத்தே

கைதுட்ட கொடுத்திட்டேனே

கொள்ளி கொண்டே போவோணும்

இந்த கள்ளு சாராயம் விக்குற

ஆளுங்களை எல்லாம்.....

என்ன குற்றம் புரிந்தார் இவர்? கவிதையில் இருந்து....

வீதியிலே பலாத்காரம்

ஓடும் பேருந்திலே பலாத்காரம்

இல்லையோ முடிவேதும் இவற்றுக்கே

முக்கண் கொண்டவன் சிவன் என்பார்

எரித்திடுவான் அவன் குற்றங்கள் புரிவோரை என்பார்

மூடினானோ அவனும் தன கண்களையே

காணச் சகித்திடாத இவ்வவலங்களை

என்ன குற்றம் புரிந்தார் பெண்கள்

பெண்ணாய்ப் பிறந்தது

பெரும் குற்றமா அன்றி.....

குமுறுது ஒரு பெண் சிசு....

தாயிற் சிறந்த கோயிலுமில்லை

தந்தை சொல்மிக்க மந்திரமில்லை

என்றார் சான்றோர் அன்று.....

ஓதுகின்றார் என் தந்தை

சாவு மந்திரம் இன்று

கோயிலில்லை நீ

கருங் கல்லால் ஆன கல்லறை நீ

கூசாமல் பாலுடன் கலந்தே

போட்டிட முனைகிறாயே

கள்ளிப் பாலினை எனக்கு

அம்மாவா நீ!

இதயத் தீ – சிறு கதையிலிருந்து....

ஆயிரத்துத் தொள்ளாயிரத்து நாற்பத்தி ஏழு ஆகஸ்ட் பதினைந்து இந்தியர்கள் மறக்க முடியாத தினம். இந்தியா சுதந்திரம் பெற்ற தினம். நானும் ஒரு இந்தியக் குடிமகள் தானே. என்னால் மட்டும் எப்படி மறக்க முடியும் அந்த நாளை? மேலும் அன்று தானே என் சுதந்திரம் பறிபோன நாள்......

அன்று தான் கதையின் நாயகியான சௌந்தர்யாவிற்கு திருமணம் ஆனது. புகுந்த வீட்டிற்குச் சென்ற பிறகு தான் தெரிந்திருக்கிறது தான் அந்த மணமகனுக்கு மூன்றாவது மனைவி என்பது! தோசை ஒழுங்காக வரவில்லை என்று சூடான தோசைக்கல்லில் நாயகியின் கையை வைத்து தேய்த்தாளாம் அவளது மாமியார். படிக்கும் போதே மனசும் கையும் சுடுகிறது நமக்கு! எத்தனை கொடுமைகள்! வயிற்றில் மூன்று மாதக் குழந்தையோடு அப்பா வீட்டிற்கு வந்தவரை திரும்பி அழைத்துப் போகவில்லையாம் – தோசை கூட வார்க்கத் தெரியவில்லை என்பது காரணமாம்! முழுக் கதையும் படித்துப் பாருங்களேன்.....

தப்புத் தாளம் – சிறு கதையிலிருந்து....

சின்ன வயதிலிருந்தே பாட்டில் ஆர்வம் உள்ள பெண். கல்யாணம் வரை பாட்டுக் கற்றுக் கொண்டு பாடியவர்.  பாட்டு கற்றுக் கொண்டபோது கிடைத்த அனுபவங்கள் சுவைபடச் சொல்லி இருக்கிறார் ஆசிரியர். திருமணத்திற்குப் பிறகு அவரது பாட்டு ஆசைக்கு தடை வருமா? கணவர் பாட அனுமதிப்பாரா? "மனைவி அமைவதெல்லாம் இறைவன் கொடுத்த வரம்"னு பாடினாரே கண்ணதாசன், "கணவன் அமைவதெல்லாம் யார் கொடுத்த வரம்?" என்று சொல்லாமல் விட்டாரே!

ஒரே மின்புத்தகத்தில் கவிதைகள், கதைகள் என இரண்டுமே படிக்கும் வாய்ப்பு! புத்தகத்தினைப் படிக்க விரும்புவர்கள் இங்கே  தரவிறக்கம் செய்து படிக்கலாமே! மொத்தப் பக்கங்கள் 47 மட்டுமே.

நாளை வேறு பதிவில் சந்திக்கும் வரை....

நட்புடன்

வெங்கட்

புது தில்லியிலிருந்து......

அலைபேசி மூலம் தமிழ்மணத்தில் வாக்களிக்க....