வாங்க பேசலாம் – ஒன் பாட் சமையல் மோகம்

படம்: இணையத்திலிருந்து...

அனைத்து நண்பர்களுக்கும் இனிய காலை வணக்கம். இன்றைக்கு சனிக்கிழமை. அலுவலகம் விடுமுறை என்பதால் பொறுமையாக எழுந்திருக்கலாம். ஆனாலும் மற்ற நாட்களில் வராத விழிப்பு, விடுமுறை நாட்களில் சற்று சீக்கிரமாகவே வந்து விடுகிறது! அதுவும் எல்லா சனி, ஞாயிறுகளிலும் இப்படியே என்றால் என்னாவது! விழித்தெழுந்து காஃபி/தேநீர் அருந்திய படியே கொஞ்சம் வலை மேய்ந்தால் மீண்டும் தூக்கம் கண்களை இழுக்க, அப்படியே தூங்கி விடுகிறேன் – பல சமயங்களில் இப்படித் தூங்கி எழும்போது காலை பத்து மணிக்கு மேல் ஆகிவிடுகிறது! ”டேய்… சோம்பேறி… எழுந்திருடா, எழுந்து வேலையைப் பாரு..” என எனக்கு நானே சொல்லிக் கொண்டு எழுந்து கடகடவென வேலைகளைப் பார்ப்பது நடக்கிறது! சரி நான் தூங்குவது ஒரு புறம் இருக்கட்டும். இன்றைக்கு சமீபத்தில் என்னைப் பிடித்திருந்த ஒரு மோகம் பற்றி பேசலாம் வாங்க…

 

ஒன் பாட் சமையல் மோகம்:

வாரத்தில் இரண்டு மூன்று நாட்களில் அலுவலகத்திலிருந்து வீடு திரும்பும் போதே எட்டு மணிக்கு மேல் ஆகிவிடுகிறது. கொஞ்சம் ஆஸ்வாசப்படுத்திக் கொண்டு, சாதம் வைத்து, குழம்பு/ரசம், பொரியல் என சமைத்து சாப்பிட வேண்டும் என்றால் கொஞ்சம் கஷ்டம் தான். கடும்கோடையில் சமையலறையில் சமைத்து முடிப்பதற்குள் வியர்வை மழையில் குளிக்க வேண்டியிருக்கிறது.  அப்படி வியர்வையில் குளித்ததற்கு மீண்டும் ஒரு குளியல் போட்டால் தான் நிம்மதியாகச் சாப்பிட முடியும்! கொஞ்சம் சோம்பேறித்தனம் வந்தாலும் போச்சு! வெளியில் சாப்பிடலாமா, இல்லைன்னா பால்/பழம் சாப்பிட்டு தூங்கி விடலாமா என மனதில் எண்ண ஓட்டம் வந்து விடும். அப்படி பால்/பழம் மட்டும் சாப்பிட்டுத் தூங்கினால் நள்ளிரவில் பசி வந்து வயிறு சபிக்கும் – “ஏண்டா பாவி, சரியான சோம்பேறியா இருக்கியே… ஏண்டா என்னை காயப் போட்டு கஷ்டப் படுத்தற?” என்று கேள்விக் கணைகள் தொடுக்கும்!

நள்ளிரவில் விழிப்பதில் இன்னுமொரு கஷ்டம் – மனது அலைபாயும். தேவையற்ற சிந்தனைகள் தூங்க விடாது! ஏற்கனவே பசி, இதில் சிந்தனைகளும் சேர்ந்து கொண்டால், விடிய விடிய விழிப்பு தான் – அர்த்த ராத்திரியில் விளக்கை போட்டுக் கொண்டு வலை மேய்ந்தால், அடுத்த நாள் அலுவலகத்தில் 1000 என எழுதுவதாக நினைத்து 10000 என எழுதி விட வாய்ப்புண்டு! ஒரு சைஃபர் தானே அதிகமா போச்சு அதனால் என்ன என சும்மா இருந்து விடமுடியாது! அதனால் சோம்பேறித்தனத்தை தள்ளி வைத்து விட்டு சமைத்து விடுவது தான் வழக்கம். இது பற்றி இல்லத்தரசியிடம் பேசிக் கொண்டிருந்த போது “ஒன் பாட் சமையல்” செய்யறது சுலபம். அப்படிச் செய்து சாப்பிடலாமே எனச் சொன்னதோடு எனக்காக நிறைய ஒன் பாட் சமையல் காணொளிகளை வாட்ஸ்-அப்பில் அனுப்பி வைத்தார்.

படம்: இணையத்திலிருந்து...

Hebber’s Kitchen, Padhu’s Kitchen, Archana’s Kitchen, Manjula’s Kitchen என பலப் பல வீடுகளின் சமையலறையில் அவர்கள் அழைப்பில்லாமலேயே நுழைந்து வெளி வர முடிகிறது! எல்லா தளங்களிலுமே ஒன் பாட் என்று சொல்கிறார்களே தவிர – ஒரே ஒரு பாத்திரத்தில் சமைக்கும் சமையல் வகைகள் ரொம்பவே குறைவு! பத்து பாத்திரம் தேவையாக இருக்கிறது! சரி அதை விடுங்கள் ஒன் பாட் என்று சொல்லி மின்சாரம் மூலம் இயங்கும் ”Wonder Chef” குக்கர்களின் விளம்பரம் வருகிறது – அதிக விலையில்லை லேடீஸ் அண்ட் ஜெண்டில்மேன் – 6999/- மட்டுமே! அதை ஏழாயிரம்னு சொன்னா சாமிக்குத்தம் ஆயிடுமாம்! அந்த ராத்திரி வேளையில, புதுசா வொண்டர் செஃப் வாங்கி அதற்கப்புறம் தான் சமைக்கணும்னா முடியுமா?  சரி நம்ம கிட்ட தான் சாதாரண குக்கர் இருக்கே அதுல சமைக்கலாம்னு கோதாவுல இறங்கிட வேண்டியது தான்!

இப்படி ஒன் பாட் சமையல் வீடியோ அனுப்பினதுல இருந்து, ஒரே ஒன் பாட் சமையல் ஆராய்ச்சி தான். இணையத்தில் தேடித் தேடி ஒவ்வொரு நாளும் ஏதோ ஒன்று சமைத்து சாப்பிடுவது கடந்த சில நாட்களாக நடக்கிறது! ஆலு-பீன்ஸ் சாதம், மூங்க் தால் கிச்சடி, தால் சாவல், சோளே சாவல் என என்னென்னமோ சமைத்துப் பார்த்துக் கொண்டிருக்கிறேன். சில சமையல் வகைகளின் பெயரே வாயில் நுழைவதில்லை –எல்லாமே ஒன் பாட் சமையல் தான். கொஞ்சம் தண்ணீர் அதிகமா இருந்தா குழம்பு மாதிரி ஆயிடும், இல்லை தண்ணீர் குறைந்து விட்டால் ஒழுங்கா வேகாமல், கஞ்சி போட்ட துணி கணக்கா விறைப்பாக இருந்து தொண்டையைக் கிழிக்கும்! தொடர்ந்து இப்படி இரண்டு மூணு நாள் சாப்பிட்ட பிறகு வயிறு சொன்னது – “இப்படி என்னைப் போட்டு படுத்தறதுக்கு, பேசாம பால் பழமே கொடுத்திருக்கலாம்!”

”தன் முயற்சியில் சற்றும் மனம் தளராத விக்ரமாதித்தன்” மாதிரி நானும் ஒன்பாட் சமையல் வகைகளை செய்து பார்த்துக் கொண்டிருந்தேன் – பத்து நாளுக்குப் பிறகு தான் ஞானோதயம் வந்தது – இந்த ஒன் பாட் சமையல்லாம் கதைக்கு உதவாது! அதனால ஒழுங்கு மரியாதையா எப்பவும் போல சமையல் செய்யறது தான் நல்லதுன்னு ஞானோதயம் வந்தது. புதுசு புதுசா முயற்சி செய்யறது நல்லது தான். ஆனால் நமக்கு நன்கு பழகிவிட்ட சமையலிலிருந்து மாறுபட்டுச் செய்வது என்பது அனைவருக்கும் ஒத்துக் கொள்வதில்லை. ஒன் பாட் சமையல் என்று சொன்னாலும் ஒன்பது பாத்திரங்கள் வந்து விடுகிறது தேய்க்க – சமைப்பதை விட பாத்திரம் தேய்ப்பது நிறைய பேருக்கு பிடிக்காத வேலை! அம்மணிகிட்ட சொன்னா, ”எல்லா சமையலையும் ஒரே பாத்திரத்தில் சமைக்க முடியுமா என்ன?, பாத்திரம் விழத்தான் செய்யும் – பேருக்கு ஒன் பாட்னு சொன்னா, ஒரு பாத்திரத்துக்கு மேல் கூடவே கூடாதுன்னு எப்படி?” ந்னு நம்மளையே ஓட்டறாங்க!

நீங்களும் ஒங்க ஒன் பாட்டும் – போங்கம்மான்னு என் பழைய சமையலுக்கு திரும்பிட்டேன்! நேத்து மெனு – கத்திரிக்காய் கள்ளப்பருப்பு கூட்டு, சாதம், உருளைக்கிழங்கு ஃப்ரை, தயிர், ஊறுகாய்! இன்னிக்கு என்ன மெனு? சேப்பங்கிழங்கு போட்டு மோர்க்குழம்பு, வெண்டைக்காய் பொரியல், செய்யலாம்னு இருக்கேன்! சாப்பிட வாங்களேன்!

மீண்டும் சந்திப்போம்… சிந்திப்போம்…

நட்புடன்

வெங்கட்

புது தில்லி