கதம்பம் - தண்ணீர் தினம் - ரங்கன் - ஓவியம் - பிறந்தநாள் - அரிசி வடாம் - கீ ஹோல்டர்

அன்பின் நண்பர்களுக்கு, இனிய காலை வணக்கம். இந்த நாளில் ஒரு பதிவுடன் உங்கள் அனைவரையும் சந்திப்பதில் மகிழ்ச்சி.   

நேற்று வெளியிட்ட பதிவினை படித்து கருத்துகள் தெரிவித்த அனைத்து வலையுலக நண்பர்களுக்கும் மனம் நிறைந்த நன்றி.  இந்த நாளை நல்லதொரு வாசகத்துடன் தொடங்கலாம் வாருங்கள். 

LIFE IS GOOD, MAKE IT BEAUTIFUL.  FIGHT WITH YOUR STRENGTH, BUT NOT WITH OTHER’S WEAKNESS! BECAUSE TRUE SUCCESS LIES IN YOUR EFFORTS, NOT IN OTHERS DEFEATS.

******

உலக தண்ணீர் தினம் - 22 மார்ச் 2021: 

தங்கத்தை விட விலை மதிப்பானது தண்ணீர் என்பது சொல்வழக்கு! நவீன யுகத்தில் தண்ணீரின் உபயோகம் அதிகம் தான். முடிந்த வரை தண்ணீரை சிக்கனமாக பயன்படுத்துவதை வழக்கமாக்கிக் கொள்வோம்! இருக்கும் நீர்நிலைகளை மாசடையாமல் பாதுகாப்போம்! அடுத்த தலைமுறைக்கு தண்ணீரை சொத்தாக வைத்து விட்டு செல்வதை உறுதியாக மனதில் வைப்போம்!  தண்ணீர் சிக்கனம்! தேவை இக்கணம்!

ரங்கனின் தரிசனம் - 22 மார்ச் 2021:

நேற்றைக்கு இரவு 10:30 மணியளவில் எங்கள் அபார்ட்மெண்ட் வாசலில் ரங்கனின் தரிசனம் கிடைக்கப் பெற்றது. ஒரு நிமிடம் தான்! கொரோனா கிருமி உலகத்தை விட்டு போகணும் என்று தான் பிரார்த்திக்கத் தோன்றியது! வேற எதுவுமே தோன்றவில்லை..

கூடவே வரும் மக்கள் வெள்ளத்தைப் பார்க்கையில் பக்தி தான் நம் பாரத தேசத்தின் வலிமை என்பது தெள்ளத் தெளிவாக உறுதியாகிறது. நல்லதே நடக்கட்டும்!

காத்திருந்த நேரத்தில் அண்டை வீட்டாருடன் சிறிது நேரம் பேசிக் கொண்டிருந்தேன். வெளியே சென்று அரட்டை அடிக்கும் பழக்கம் எனக்கு  இல்லாததால், இப்படி பார்க்கும் சந்தர்ப்பங்களில் தான் பேசிக் கொண்டிருப்பேன்.

ரோஷ்ணி கார்னர் - ஓவியம் - 24 மார்ச் 2021:

மகள் சமீபத்தில் colours of India என்ற தலைப்பிற்காக வீட்டில் வரைந்து பார்த்த ஓவியம்! JSW paints Future scapes & The Hindu young world சேர்ந்து நடத்திய Painting competitionல் பங்கேற்பதற்காக.

செகண்ட் இன்னிங்க்ஸ் - 25 மார்ச் 2021:

மருதாணியால் சிவந்த கைகள், கோவிலில் அர்ச்சனை, அம்மா கையால் குலாப்ஜாமூன், அக்கம் பக்கத்தினருக்கும் தோழிகளுக்கும் சாக்லேட் விநியோகம், சில வருடங்கள் அன்றைய நாளில் என் கையால் இல்லாதோருக்கு உணவு பொட்டலங்கள் விநியோகம் என்று இருந்தது அன்றைய நாட்கள்!!!

அலைபேசியில், குறுஞ்செய்தியில், முகநூலில், வாட்ஸப்பில் என வாழ்த்து மழை!!  'நமக்கு நாமே' என்ன இனிப்பு செய்து கொண்டாடுவது என்று தவிர்க்கப்பட்டது..🙂 புத்தாடைகள் எப்போது வேண்டுமானாலும் வாங்கிக்கலாம் என்பதால் அதை உடுத்துவதில் ஈர்ப்பும் பெரிதாக இருப்பதில்லை..🙂 யாராவது ஒருநாள் ரெஸ்ட் கொடுக்க மாட்டார்களா என்பதே இன்றைய நாளுக்கான ஏக்கமாக மாறியது! இப்படியாக இருக்கின்றன இன்றைய நாள் கொண்டாட்டங்கள்!!

வருடங்கள் உருண்டோடிக் கொண்டே தான் இருக்கின்றன. கேசத்தில் ஆங்காங்கே தென்படும் வெள்ளிக் கம்பிகளையும், வயதையும் மறைத்துக் கொள்வதில் எனக்கு  உடன்பாடில்லை...🙂 மனம் பக்குவப்பட வேண்டும்! தாமரை இலைத் தண்ணீராய் மாற வேண்டும்..!! எதிர்பார்ப்பே வைத்துக் கொள்ளாத  மனம் வேண்டும்! நிதானம் வேண்டும்!

இன்றைய நாளில் வாழ்த்திய, வாழ்த்திக் கொண்டிருக்கிற அனைவருக்கும் என் நெஞ்சார்ந்த நன்றிகள். உங்கள் வாழ்த்துகளால் இன்றைய நாள் சிறப்பானது!

அரிசி வடாம் - காணொளி - 27 மார்ச் 2021:

கோடை வெயில் கொளுத்த துவங்கி விட்டது. வேர்க்குரு, உடலில் ஆங்காங்கே கொப்புளங்கள் என வெயிலின் தாக்கத்தால் வரும் இடையூறுகள் துவங்கி விட்டன.

இந்த சமயத்தில் தாகத்தைத் தணிக்க நீர்மோர், இளநீர், பானகம், பழச்சாறு, நன்னாரி சர்பத்  என்று பருகலாம். வீட்டிற்கு வரும் விருந்தினர்களுக்கும் இதையே கொடுக்கலாம். பாட்டிலில் அடைத்து விற்கும் குளிர்பானங்களை தவிர்க்கலாம்.

அடிக்கின்ற வெயிலை வீணாக்காமல் வத்தல், வடாம் செய்து வைத்துக் கொள்ளலாம்.. காலையில் வெயிலுக்கு முன்பே சென்று காயவைத்து விட்டால் மாலை வரை காய்ந்து கொண்டிருக்கும்..காய்கறி இல்லாத நாட்களிலோ, மாலை நேரத்தில் ஸ்நாக்ஸாகவும் பயன்படுத்திக்கலாம்.

இன்று Adhi's kitchen சேனலில் சம்மர் ஸ்பெஷலாக  'அரிசி வடாம்' செய்முறை பகிர்ந்துள்ளேன். இது வடாம் சீரீஸ்ஸில் இரண்டாவது செய்முறை.. மிகவும் எளிதானது தான். பொதுவாக என் அம்மாவும் சரி, மாமியாரும் சரி மிஷினில் அரைத்து வந்த உதிரி மாவில் தான் செய்வார்கள். அப்படிச் செய்யும் போது அதில் மாவு கட்டி தட்டும் வாய்ப்புகள் அதிகம்..பின்பு அதையெல்லாம் எடுத்து விட்டோ இழுத்து பிசைந்தோ தான் பிழிய வேண்டியிருக்கும். கைகளும் மிளகாய் காரத்தால் எரியும்! தெரிந்த ஒருவரிடமிருந்து எளிதான வழியை கற்றுக் கொண்டேன். அந்த முறையைத் தான் சில வருடங்களாக பின்பற்றி வருகிறேன். அந்த முறையை வீடியோவில் செய்து காண்பித்திருக்கிறேன்.

அரிசி வடாம்

ரோஷ்ணி கார்னர் - காணொளி - Key Holder - 27 மார்ச் 2021:

மகளின் சேனலிலும் இன்று வீடியோ பகிர்ந்திருக்கிறாள்..வீட்டிலேயே செய்யும் சாவி ஹோல்டர்.

Key Holder

இரண்டு வீடியோக்களையும் பார்த்துவிட்டு உங்கள் கருத்துக்களை பகிர்ந்து கொள்ளுங்களேன்.

நண்பர்களே, இந்த நாளின் கதம்பம் பதிவு குறித்த உங்கள் கருத்துகளை பின்னூட்டத்தில் பகிர்ந்து கொள்ளுங்கள். மீண்டும் வேறொரு பதிவின் வழி சந்திக்கும் வரை...

நட்புடன்

ஆதி வெங்கட்