கிண்டில் வாசிப்பு – ரம், ரம்மி, ரம்பா – கில்லர்ஜி

 

அனைத்து நண்பர்களுக்கும் இனிய காலை வணக்கம். இன்றைய நாளை, நல்லதொரு வாசகத்துடன் ஆரம்பிக்கலாம். 

ஒரு பறவை மரத்தின் கிளையில் அமரும்போது அது எந்த நேரத்திலும் முறிந்து விடும் என்ற பயத்தில் அமருவதில்லை; ஏன் என்றால், பறவை நம்புவது அந்தக் கிளையை அல்ல! அதன் சிறகுகளை மட்டுமே! 

எந்தவொரு பதிவு/கதை/கவிதை/கட்டுரையாக இருக்கட்டும்! அதற்கு நீங்கள் வைக்கப் போகும் தலைப்பு மிகவும் முக்கியமானது! தலைப்பைப் பார்த்து மட்டுமே நூலை வாங்கும் சிலர் உண்டு! படித்தவுடன் கவரும் விதமாக தலைப்பினை வைப்பது என்பது எல்லோருக்கும் வாய்த்து விடுவதில்லை! நண்பர் கில்லர்ஜி அவரது பதிவுகளுக்கு வைக்கும் தலைப்பினைப் போலவே அவரது இரண்டாவது மின்னூலிற்கு வைத்திருக்கும் தலைப்பு கண்களை, கருத்தினைக் கவரும் விதமாக அமைந்திருக்கிறது – என்ன தலைப்பு? ரம், ரம்மி, ரம்பா!!! படிக்கும் போதே ஏதோ ஜிவ்வென்று உங்களை உள்ளே இழுப்பது போல தோன்றுகிறது அல்லவா! அது ரம்மா, ரம்மியா இல்லை ரம்பாவா? அல்லது மூன்றுமேவா? எதுவாக இருந்தாலும் உள்ளே, மின்னூலினுள்ளே, அதன் தலைப்பு உங்களை இழுப்பது உறுதி! 

இந்த மின்னூல் வழி அவரது கவிதைகளை நம்முடன் பகிர்ந்து கொண்டிருக்கிறார் நூலாசிரியர் கில்லர்ஜி அவர்கள். முன்னுரையாக அவர் குறிப்பிட்டதிலிருந்து இந்தக் கவிதைத் தொகுப்பு – ”என் எண்ணங்களில் உதித்த கவிதை மட்டுமல்ல, மண்ணுள் மறைந்த என்னவளுக்கான எமது பூமாஞ்சலியும் கூட” என்பதை நீங்கள் தெரிந்து கொள்ள முடியும்! சின்னச் சின்ன வரிகளில் கூட நம் நெஞ்சைத் தொட்டுவிடக்கூடிய கவிதை வரிகள் அவருடையது! மின்னூலின் அறிமுகப் பகுதியில் குறிப்பிட்ட சில கவிதை வரிகளில் மிகவும் தொட்டது இந்த இரண்டு வரிகள்! 

விலைமாதரின் விசும்பல்! 

இரவே நீ விடிந்து விடு!! 

அவ்வளவு தான் அவ்வளவே தான்! இரண்டு வரிகள், ஆறே வார்த்தைகள் – ஆனால் அந்த வார்த்தைகள் சொல்லும் விஷயம் மிகப் பெரியது! எத்தனை துயரம் அப்படியான விலை மாதர்களின் வாழ்க்கையில்! 99.99% பெண்கள் விரும்பி இந்தத் தொழிலுக்கு வருவதில்லை – அவர்கள் அனைவருமே இதில் தள்ளப்பட்டவர்களே! 

”அன்னை” என்ற தலைப்பிட்ட ஒரு கவிதையிலிருந்து சில வரிகள் உங்கள் பார்வைக்கு!

என் அசைவிற்கு உயிர் கொடுத்த அன்னையே 

என் உயிர் உள்ளவரை மறவேன், உன்னையே 

உனக்காக, தகனமும் கொடுப்பேன் என்னையே!

… 

என் உணவுக்கு நீ கொடுத்தது, ரத்தமே 

நீ உறங்கும்போதும் கொடுத்தேன் சத்தமே 

எனக்காக, சகித்துக் கொண்டாய் நித்தமே!

”எழுச்சியோடு, எழுந்திரு பெண்ணே” என்ற கவிதை வழி பெண்களை அழைத்து வீரம் கொண்டு எழுந்திட வேண்டிய அவசியத்தினைச் சொல்கிறார்! அந்தக் கவிதையிலிருந்து பிடித்த வரிகள் சில!

வஞ்சக உலகமடி பெண்ணே 

வஞ்சகர்கள் கவ்வட்டும் மண்ணே 

வலையை வீசுவார்கள் முன்னே 

வலையை கிழித்து எறி பெண்ணே! 

பஞ்சமில்லை! கவிதையிலிருந்து சில வரிகள் உங்களுக்காக! 

எங்கள் நாட்டில், கட்சிகளுக்கு பஞ்சமில்லை.

பட்டினிச்சாவின் காட்சிகளுக்கும் பஞ்சமில்லை. 

எங்கள் நாட்டில், அரசியல்வாதிகளுக்கு பஞ்சமில்லை. 

இலவச அரிசியை, நம்பி வாழ்பவர்களுக்கும் பஞ்சமில்லை! 

இரையாக இறைவா… என்ற கவிதை பற்பல எண்ணங்களைத் தூண்டும் விதமாக இருந்தது. யானை, குதிரை, காளை, பசு, ஆடு, நாய், ஒட்டகம், கழுதை, கோழி, சேவல், மயில், குயில், புறா, காகம், பூனை, கிளி, பல்லி, மீன், சிங்கம் என ஒவ்வொன்றாகச் சொல்லி, அதுவாகப் பிறந்திருந்தால் எப்படி இருந்திருப்பேன் என்று சொல்லிய ஆசிரியர், கடைசியாகச் சொன்னது… 

ஆனால் என்னை புழுவாக பிறக்க வைத்து, பாவங்களைச் செய்து முடித்த பாழாய்ப் போன மனிதனின் பாழும் உடம்பை இரையாக தின்ன வைத்து விட்டாயடா… இறைவா நான் என்ன பாவம் செய்தேன்… போன பிறவியில் மனிதனாக பிறந்தேனா? 

எல்லா கவிதைகளையும் இங்கே குறிப்பிட முடியாது என்பதால், மின்னூலில் எனக்குப் பிடித்த சில வரிகளை மட்டுமே இங்கே பகிர்ந்து கொண்டிருக்கிறேன். மொத்தம் ஐம்பது கவிதைகள் கொண்ட இந்த மின்னூல் அமேசான் கிண்டில் வெளியீடாக வந்திருக்கிறது. மின்னூலின் விலை ரூபாய் 49/-. அமேசான் அன்லிமிட்டட் கணக்கு வைத்திருப்பவர்கள் இலவசமாகத் தரவிறக்கம் செய்து கொள்ள முடியும். தரவிறக்கம் செய்து கொள்ள கீழேயுள்ள சுட்டியைச் சுட்டலாம்! 

ரம், ரம்மி, ரம்பா 

நண்பர்களே, இன்றைய பதிவில் உங்களுடன் பகிர்ந்து கொண்ட விஷயங்கள் பற்றிய உங்கள் கருத்துகளைச் சொல்லுங்களேன். விரைவில் வேறு ஒரு பதிவுடன் மீண்டும் ச[சி]ந்திப்போம்... 

நட்புடன் 

வெங்கட் நாகராஜ் 

புது தில்லி