கதம்பம் - தில்லி டைரி – லிட்டி சோக்கா – விதம் விதமாய் உணவு

விதம் விதமாய் உணவு – 7 May 2019

பனீர் குல்ச்சா...

சமோசா....

பாதாம் மில்க்... 

அனைவருக்கும் இனிய காலை வணக்கம். காலை நேரத்தில் இவ்வளவு ஹெவியா சாப்பிட முடியாது! நாங்கள் மாலை நேரத்தில் சாப்பிட்ட சில சிற்றுண்டிகள் இவை! எஞ்சாய்!

National war memorial - 5 May 2019

நேற்று மாலை India gate அருகே புதிதாக திறந்திருக்கும் War memorial சென்றோம். 40 ஏக்கர் பரப்பளவில் போர்களில் உயிர் துறந்த 30,000 வீரர்களுக்கு மரியாதை செல்லும் வண்ணம் ஃபிப்ரவரி 20 ந்தேதி பிரதமரால் துவக்கி வைக்கப்பட்டுள்ளது.

சக்கரவியூகம் போன்ற அமைப்பில் பரம்வீர் சக்ரா வாங்கிய வீரர்களின் வெண்கலச் சிலைகளும், பலவித போர்களில் உயிர்துறந்த வீரர்களின் பெயர்கள் அவர்களின் எண் மற்றும் ஆண்டு, அவர்களின் ஊரோடு பொறிக்கப்பட்டுள்ளது.

இங்கு ஒரு ஸ்தூபியும், அமர் ஜோதியும் உள்ளது. வீரர்கள் இங்கு மலர்வளையம் வைத்து மரியாதை செலுத்துகின்றார்கள். இங்கு ஒரு Touchscreen வைக்கப்பட்டுள்ளது. அதில் நாம் வீரர்களுக்கு மரியாதை செலுத்தும் வண்ணம் அமைக்கப்பட்டுள்ளது சிறப்பு.

இந்தியா கேட்டிலும் நிறைய படங்கள் எடுத்துக் கொண்டோம். அவை தனிப்பதிவாக விரைவில்…

India gate – பேல் பூரி – லிட்டி சோக்கா - ஐஸ்க்ரீம் – 6 May 2019

சனியன்று மாலை War memorial க்கு சென்றதை பகிர்ந்து கொண்டேன் அல்லவா!! அது இந்தியா கேட்டின் அருகே தான் உள்ளது. அங்கே மாலை விளக்கொளியில் மூவண்ணத்தில் ஜொலித்த இந்தியா கேட்டின் அழகைப் பாருங்களேன்.

லிட்டி சோக்கா...

அங்கே சுவைத்த பேல்பூரி மிகவும் சுவையாக இருந்தது. பீகாரின் உணவான Litti chokha வும் வாங்கி சுவைத்தோம். அது ஏனோ எனக்கு பிடிக்கலை. அடுப்பு கரியின் மேல் பந்தாக உருட்டிய மாவை வைத்து வாட்டுகிறார்கள். அடுப்பிலிருந்து எடுத்து நெய்யில் முக்கித் தருகிறார்கள். தொட்டுக்கையாக உருளையில் ஒரு சப்ஜியும், அதன் மேல் விதவிதமான சட்னிகளும். அடுப்புத் தணலின் வாடை தூக்கலாக இருப்பதாலோ என்னவோ எனக்கு பிடிக்கலை :) அப்பாவும், மகளும் சாப்பிட்டார்கள் :)

அப்புறம் Kwality walls ன் Uni cornetto வும் சுவைத்துக் கொண்டே ராஷ்ட்ரபதி பவன் வரை சென்று திரும்பினோம். அன்றைய மாலைப் பொழுது இனியதாக இருந்தது.

ஸ்வெட்டரின் கதை – 3 May 2019

ஏறக்குறைய பதினாறு வருடங்களுக்கு முன் நான் பின்னிய ஸ்வெட்டர் இது. அப்போது எனக்கு திருமணமாகி ஒன்றரை வருடம் இருக்கும். நான் தில்லியில் தான் இருந்தேன் அது ஒரு குளிர்காலம். .இங்குள்ள என் தோழி (தற்போது மும்பையில் இருக்கிறார்) ஒருவர், ஒருநாள் தன் பக்கத்து வீட்டு ஆண்ட்டியிடம் ஸ்வெட்டர் பின்னக் கற்றுக் கொள்ளப் போவதாகவும், நீயும் வந்தால் இருவரும் கற்றுக் கொள்ளலாம் என்றும் சொன்னார்.

மறுநாளே என்னவர் அலுவலகம் சென்றதும் வேலைகளை முடித்துக் கொண்டு தோழியைப் பார்க்கச் சென்றேன். தோழிக்கு அப்போது தான் முதல் குழந்தை பிறந்து ஒரு வருடம் இருக்கும். அந்த ஹிந்தி ஆண்ட்டி வகுப்பை துவக்கினார். என்னிடம் வுல்லன் கூட இல்லை :)

தோழி தனக்காக வாங்கி வைத்திருந்த வுல்லனில் ஆரம்பித்தார். நாலு பின்னலை போடுவதற்குள் குழந்தை அழத் துவங்கியது :) அவ்வளவு தான் கையில் வைத்திருந்த வுல்லனை என்னிடம் கொடுத்து விட்டுச் சென்றார் :) நான் தான் அதில் பின்னினேன் :)

நீங்க நாளை வுல்லன் வாங்கிக் கொண்டு வாங்க. ஆரம்பித்து தரேன். கணவருக்காக பின்னிக் குடுங்க என்றார் ஆண்ட்டி் :) என்னவரோ, எனக்கு வேண்டாம்! உனக்கு வேணா போட்டுக்கோ!! என்று சொல்ல Vardhaman ல் மெரூன் நிற வுல்லனும், பின்ன Needleம் வாங்கிக் கொண்டேன் :)

ஒவ்வொரு பகுதி ஆரம்பிக்கும் போதும் ஆண்ட்டியிடம் கேட்டுக் கொள்வேன். மற்றபடி வீட்டிலேயே ஒரு மாதம் போல பின்னினேன் :) இறுதியாக ஆண்ட்டியிடம் கொடுத்து முடித்து வாங்கினேன். பட்டன்களும் வைத்து தைத்தேன். என் கையால் பின்னிய கைகளில்லாத Half sweater தயார் :)

ஆண்ட்டி என்னிடம் எந்த கட்டணமும் வாங்கவில்லை. தென்னிந்திய உணவுகளின் ரெசிபிக்களை தான் கேட்டுத் தெரிந்து கொள்வார். நானும் எனக்கு தெரிந்த ஹிந்தியிலும், ஆங்கிலத்திலும் சொல்லி புரியவைப்பேன் :))

என்னை ஸ்வெட்டர் பின்னக் கற்றுக் கொள்ளலாம் என்று அழைப்பு விடுத்த தோழியால் அதன் பின்பு கற்றுக் கொள்ளவே முடியவில்லை :)

இந்த ஸ்வெட்டருக்கு பின்பு குழந்தைக்காக ஒரு ஸ்வெட்டரும், மஃப்ளரும் பின்னி பாதியிலேயே நிற்கிறது :)

நானும் இந்த ஸ்வெட்டரை இத்தனை வருடங்களாக பத்திரமாக வைத்திருக்கிறேன். இப்போதும் சரியாக இருக்கிறது. ஊருக்கு எடுத்துச் செல்ல துவைத்து பெட்டிக்குள் வைத்துள்ளேன் :) ஸ்வெட்டருடனான என் நினைவுகளும் பத்திரமாய் மனதுக்குள் :)

Ice cream soda - 9 May 2019

ஐஸ்க்ரீம் சோடா...

முதல்முறையாக கேள்விப்பட்டதும், சுவைத்ததும் :) முக்கால் அடிக்கும் குறையாத டம்ளரில் சோடாவுடன் ஐஸ்க்ரீம் சேர்த்து பரிமாறப்பட்டது :) ஒரு டம்ளர் 120 ரூ!! வேண்டுமானால் சேர்த்துக் கொள்ள தனியே சோடாவும் தரப்பட்டது :)

ஊருக்குச் சென்ற பின் இதை பன்னீர் சோடாவுடன் முயற்சித்துப் பார்க்க குறித்துக் கொண்டேன்.

தற்சமயம் வாசிப்பில்!! எப்போதும் பெண் – 9 May 2019

ஒவ்வொரு முறை வாசிக்கும் போதும் ஒவ்வொரு வித உணர்வுகள்.

சில வருடங்களுக்கு முன் என் வலைப்பூவில் எழுதிய வாசிப்பனுபவத்தின் இணைப்பு…

Birla mandir! (Lakshmi Narayan Temple) – 10 May 2019

பிர்லா மந்திர்...

நேற்று இரவு எங்கள் குடியிருப்புக்கு பின்புறச் சாலையில் இருக்கும் புகழ்பெற்ற பிர்லா மந்திர் வரை அப்படியே நடந்து சென்றோம். செல்ஃபோன் போன்ற எதற்கும் அனுமதியில்லை. நம்முடைய பொருட்களை வாங்கி லாக்கரில் வைத்து பூட்டி சாவியையும் நம்மிடம் கொடுத்து விடுவார்கள்.

அதே போல் டெல்லியில் எல்லா இடங்களையும் போல் இங்கும் சோதனைக்குப் பிறகே உள்ளே அனுமதிக்கப்படுவீர்கள். உள்ளே சென்று தரிசித்து விட்டு வெளியே வந்து சிறிது நேரம் அமர்ந்து புகைப்படம் எடுத்தேன்.

அங்கே வாசலில் தண்ணீருக்காக ஒரு ஏற்பாடு செய்யப்பட்டிருந்தது. dr.water. உங்கள் பாட்டிலை வைத்து 5ரூ போட்டால் தண்ணீர் கிடைக்கும்.

அப்படியே நடந்து வரும் வழியில் ஆளுக்கொரு ஐஸ்க்ரீமை வாங்கி ருசித்து அதைப் பற்றிய நினைவுகளையும் பகிர்ந்து கொண்டு வீடு திரும்பினோம்.

என்ன நண்பர்களே, இந்த நாளில் பகிர்ந்து கொண்ட கதம்பம்/தில்லி டைரி பதிவு உங்களுக்குப் பிடித்திருக்கிறதா? பின்னூட்டத்தில் சொல்லுங்களேன்....

நட்புடன்

ஆதி வெங்கட்