அரச மரத்தடியில் - மஸ்தூர் சௌக் - நடை நல்லது - பகுதி மூன்று

அன்பின் நண்பர்களுக்கு, இனிய காலை வணக்கம். இந்த நாளில் மீண்டும் ஒரு பதிவுடன் உங்கள் அனைவரையும் சந்திப்பதில் மகிழ்ச்சி.   

இதற்கு முன்னர் வெளியிட்ட அழகிய படங்களும் சில வரிகளும் - பகுதி ஒன்பது பதிவினை படித்து கருத்துகள் தெரிவித்த அனைத்து வலையுலக நண்பர்களுக்கும் மனம் நிறைந்த நன்றி.  இந்த நாளை நல்லதொரு வாசகத்துடன் தொடங்கலாம் வாருங்கள். 

******

நடை நல்லது வரிசையில் இதோ இன்றைக்கு மூன்றாம் பகுதி! 

அரச மரத்தடியில் - 26 ஆகஸ்ட் 2024:

எனது வீட்டின் அருகே இருக்கும் சாலையின் பெயர் மந்திர் மார்க் என்பது. இந்த சாலையில் தான் பிரபல Bபிர்லா மந்திர், காளி Bபாரி (காளி கோவில்), புத்தர் கோவில், வால்மீகி மந்திர் என பல வழிபாட்டுத் தலங்கள் இருக்கின்றன. சாலையின் இருமருங்கிலும் பெரிய பெரிய அரச மரங்கள் (ஹிந்தியில் பீப்பல் கா பேட்d) சாலைக்கு அழகு சேர்க்கின்றன. அரச மரத்திற்கு இந்த ஊர் மக்களும் அதிக மரியாதை செலுத்துவது வழக்கம். 

பண்டிகை நாட்களில் அரச மரத்தைச் சுற்றி வந்து சிவப்பு மஞ்சள் (குங்குமம் மற்றும் மஞ்சள் பொடி கலந்த தண்ணீரில் நனைத்து காயவைக்கப்பட்ட நூல்கள்) வண்ண நூல்களைச் சுற்றி வருவார்கள். அடிமரத்தில் தங்களிடம் வைத்திருக்கும் லோட்டாவிலிருந்து நீர் வார்ப்பதும் உண்டு. பண்டிகை நாட்கள் என்றில்லாமல் மற்ற நாட்களில் காலை நேர நடையின் போது கொஞ்சம் தானியம் எடுத்துவந்து மரத்தடியில் போடுவதும் மண்பாண்டங்களில் தண்ணீர் விட்டு மற்ற உயிரினங்களுக்கு என வைப்பதும் உண்டு. 

அதைப்போலவே தானியங்களுக்கு பதிலாக ஒரு சிலர் வீட்டிலிருந்து வரும்போதே ஒரு கைப்பிடி அளவு கோதுமை மாவு எடுத்துக்கொண்டு வந்து அரசமரத்தடியில் தூவிவிட்டு செல்வார்கள்…… எறும்பு போன்ற சிற்றுயிர்களும் சாப்பிட வேண்டும் என்ற நல்ல எண்ணம் தான். ஏதோ ஒரு விதத்தில் மற்ற உயிர்கள் மீது அன்பு செலுத்துவது என்பதை இன்னும் கடைபிடிக்கிறார்கள் என்று பார்க்கும்போது மனதில் ஒரு மகிழ்ச்சி. அவர்களைப் பார்த்து நானும் இப்படி கொஞ்சம் கோதுமை மாவு எடுத்துச் சென்று அரச மரத்தடியில் போடுவது உண்டு. இன்றைக்கும் அப்படியே ஆயிற்று…… 

இந்த அவசர உலகத்தில் இன்னும் இதையெல்லாம் கடைபிடித்து வருகின்றனர் என்பதே நல்ல விஷயம் தானே….. உங்கள் எண்ணம் என்னவோ? சொல்லுங்களேன் :)

மஸ்தூர் சௌக் - 27 ஆகஸ்ட் 2024:

வடக்கில் உள்ள மாநிலங்கள் அனைத்திலும் உள்ள பெரிய ஊர்களில் மஸ்தூர் சௌக் அல்லது லேபர் சௌக் என்ற பெயரில் சில சாலை சந்திப்புகள் அழைக்கப்படுவது வழக்கம். ஒவ்வொரு நாளும் காலை வேளையில் இந்த மாதிரி மஸ்தூர் வேலை செய்யும் உழைப்பாளிகள் - கொத்தனார், சித்தாள், பிளம்பர் என அனைத்து உழைப்பாளிகளும் இந்த இடத்தில் வந்து சேர்ந்து விடுவார்கள். யார் வீட்டில் இந்த மாதிரி வேலைகளுக்கு ஆள் தேவையோ அவர்கள் இங்கே வந்து அவர்களுக்கான கட்டணத்தை பேசி அழைத்துச் செல்வார்கள். 

இப்படி கிடைக்கும் வேலையாட்கள் உண்மையாகவே அவர்கள் சொல்லும் வேலைக்கு தகுந்தவர்களா, திறமை உள்ளவர்களாக இருப்பார்களா என்ற கேள்விகளுக்கு நமக்கு விடை அவர்களது வேலையைப் பார்த்த பின்னர் தான் தெரியும் என்பது இதில் உள்ள பெரிய சவால். அதனால் சின்னச் சின்ன வேலைகளுக்கு அழைத்துச் செல்லலாமே தவிர பெரிய வேலைகளுக்கு அழைத்துச் செல்ல முடியாது. 

இன்றைய காலை நடையில் வீட்டின் அருகே அப்படி அமைந்துள்ள லேபர் சௌக் வழியாகச் செல்லும்போது எனக்கும் அவர்களது சேவை தேவை போல என நினைத்துக் கொண்டு என்னை சூழ்ந்து கொண்டார்கள். இது ஒரு பெரிய போட்டி. ஆட்கள் வந்தவுடன் பாய்ந்து சென்று கிராக்கி பிடிக்கவேண்டும். இல்லை என்றால் அன்றைக்கு வேலை இருக்காது…. வேலை இல்லை என்றால் சம்பாத்தியமும் இருக்காது என்பது நிதர்சனம். இப்படியானவர்களின் வாழ்க்கையும் எப்படியோ ஓடிக்கொண்டிருக்கிறது…… 

ஒவ்வொரு நாளும் நடைப்பயனத்தில் சந்திக்கும் மனிதர்களும் அவர்களது வாழ்க்கை நிலையும் நமக்கு இருக்கும் பிரச்சனைகள் ஒன்றும் இல்லை என்று உணர வைப்பவை….. இது குறித்த உங்கள் எண்ணங்களையும் சொல்லுங்களேன்……

மேலும் நடப்போம்…… மேலும் பேசுவோம்……

*******

இன்றைய பதிவு குறித்த தங்களது எண்ணங்களை பின்னூட்டத்தில் சொல்லுங்கள். விரைவில் வேறொரு பதிவுடன் உங்கள் அனைவரையும் சந்திக்கும் வரை…

நட்புடன்

வெங்கட் நாகராஜ்

புது தில்லி

17 செப்டம்பர் 2024