தங்கச்சிலை மனிதன் - மழையும் தில்லியும் - நடை நல்லது - பகுதி நான்கு

அன்பின் நண்பர்களுக்கு, இனிய காலை வணக்கம். இந்த நாளில் மீண்டும் ஒரு பதிவுடன் உங்கள் அனைவரையும் சந்திப்பதில் மகிழ்ச்சி.   

இதற்கு முன்னர் வெளியிட்ட கதம்பம் பதிவினை படித்து கருத்துகள் தெரிவித்த அனைத்து வலையுலக நண்பர்களுக்கும் மனம் நிறைந்த நன்றி.  இந்த நாளை நல்லதொரு வாசகத்துடன் தொடங்கலாம் வாருங்கள். 

******

நடை நல்லது வரிசையில் இதோ இன்றைக்கு நான்காம் பகுதி! என்னதான் முகநூலில் ஒவ்வொரு தினமும் நடை நல்லது என்ற தலைப்பில் இந்த விஷயங்களை பகிர்ந்து கொண்டேன் என்றாலும், இங்கே, வலைப்பூவில் பகிர்ந்து கொள்வதில் இருக்கும் மகிழ்ச்சி அங்கே இல்லை என்பது என் எண்ணம்.  எனக்கான சேமிப்பாகவும், முகநூலில் இல்லாதவர்கள் படிக்க வசதியாகவும், நடை நல்லது பதிவுகள் இங்கேயும்!

தங்கச்சிலை மனிதன் - 28 ஆகஸ்ட் 2024:

அலுவலக நாட்களில் காலை நேரம் சற்றே தாமதமாக எழுந்துவிட்டால் தினசரி நடை செல்வதில் பிரச்சனைகள் வந்துவிடுகிறது. அப்படியான நாட்களில் மாலை நேரம் அலுவலகத்தில் இருந்து வீடு திரும்பும் வழியில் உள்ள கனாட் பிளேசில் இறங்கி வீடு வரை நடப்பதுண்டு. அப்படி நடக்கும்போது காலை வேளையில் நடக்காததை ஈடு செய்துவிடமுடியும் என்பதோடு இன்னும் நிறைய காட்சிகளையும் பார்க்க முடியும். அப்படி அடிக்கடி பார்க்கும் ஒரு விஷயம் தான் தங்கச் சிலை மனிதன்….

உத்திரப் பிரதேசத்தைச் சேர்ந்த ரஜ்நீஷ் தில்லியில் தங்கி பல வேலைகளைச் செய்து அதில் பிரச்சினைகளைச் சந்தித்தவர். பிறகு தனக்குள் இருக்கும் கலைஞனை வெளிப்படுத்தும் விதமாக தங்க வண்ண உடை, உடம்பு முழுவதும் தங்க வண்ணம் பூசிக்கொண்டு சிலை போலவே நிற்க ஆரம்பித்து விட்டாராம். இப்படி நிற்கும் இவருடன் படம் எடுத்துக்கொள்ளும் பலர், இவர் தனக்கு முன்னால் வைத்திருக்கும் டப்பாவில் காசு போட்டுச் செல்வதை நம்பியே இருக்கிறார். தானாக வாய் திறந்து கேட்கவில்லை என்றாலும் ஒவ்வொரு நாளும் முன்னூறு நானூறு ரூபாய் வரை சம்பாதித்து விடுகிறாராம். 

திருமணம் ஆகி குழந்தைகளும் இருக்கும் இவர் வாழ்க்கை இப்படி சிலை மனிதனாக உருவெடுப்பதில் வரும் பணத்தை நம்பி தான் இருக்கிறது. இணையத்தில் இவர் குறித்த தகவல்களை இவராகவே ஒரு யூடியூப் சேனல் மூலமும் பதிவு செய்திருக்கிறாராம். நாளிதழ்கள் போன்றவற்றிலும் இவர் குறித்த கட்டுரைகள் உண்டு. இவருக்கும் வாழ்க்கை ஓடுகிறது. எனது சிறு வயதில் படித்த விஜிபி சிலை மனிதன் குறித்த தகவல்கள் நினைவுக்கு வந்தன - அவரின் வேஷமும் இவரின் வேஷமும் மாறுபட்டு இருந்தாலும் செயல் ஒன்றே…..

மனம் இருந்தால் மார்க்கம் உண்டு என்று சொல்லாமல் சொல்கிறார் இந்த தங்கச் சிலை மனிதன்…..

மழையும் தில்லியும் - 29 ஆகஸ்ட் 2024:

அதிகாலையிலிருந்தே தலைநகரில் மழை பொழிந்து கொண்டிருக்கிறது. அதனால் இன்றைய காலை நடை அம்பேல்! நான் தொடர்ந்து நடக்கலாம் என நினைத்தாலும், இயற்கை சதி செய்கிறது. ஆனாலும் எப்போதும் போல நேரத்தில் எழுந்து விட்டேன். வீட்டின் பால்கனியில் நின்று மழைப்பொழிவை ரசித்துக் கொண்டிருந்தேன்.  தலைநகரில் மழைப்பொழிவின் அளவு கொஞ்சம் கொஞ்சமாக மாறிவிட்டது. முன்பெல்லாம் மழை என்பது ஒன்றிரண்டு நாள் மட்டுமே இருப்பதாக இருக்கும்! பெரிதாக மழைப்பொழிவு கிடையாது. அப்படியே பொழிந்தாலும் அதிக பட்சம் பத்து பதினைந்து நிமிடங்கள் தான். ஆனால் சமீப வருடங்களில் அதிக அளவில் மழைப்பொழிவு இருக்கிறது. அதனால் அதன் உடனான பிரச்சனைகளும் இருக்கின்றன.  

சரியான அளவில் பாதாள சாக்கடைகள் பராமரிக்கப்படாமல், பிளாஸ்டிக் கழிவுகள் அடைபட்டுக் கொண்டு ஒரு மணி நேர மழைப்பொழிவிலேயே சாலையெங்கும் வெள்ளக்காடு. முன்பெல்லாம் மிண்டோ ப்ரிட்ஜ் என அழைக்கப்படும் இரயில் பாதையின் கீழ் மட்டுமே தண்ணீர் தேங்கி பேருந்துகள் வாகனங்கள் மாட்டிக்கொள்ளும்! இப்போது இப்படியான இடங்கள் அதிகமாகிவிட்டது.  அதிலும் இந்த ஊர் பேருந்து/வாகன ஓட்டுனர்கள் கொஞ்சம் முரட்டு முட்டாள் வகையைச் சேர்ந்தவர்கள்! தங்கள் திறமை மீதும் வாகனத்தின் செயல் திறன் மீதும் அதிக நம்பிக்கை வைத்திருப்பவர்கள் என்பதால் இடுப்பளவு தண்ணீரில் கூட வாகனத்தைச் செலுத்தி தண்ணீர் நிரம்பி இருக்கும் பகுதியை கடந்துவிடலாம் என முயற்சி செய்வார்கள் - விளைவு மாட்டிக் கொண்டு அப்புறம் வாகனத்தில் இருப்பவர்களை காப்பாற்ற வேண்டியிருக்கும். 

இன்றைக்கும் அப்படியான சூழல் தான். கொஞ்சம் மழை நின்ற வேளையில் வீட்டிலிருந்து பேருந்து நிலையத்திற்கு சில அடிகள் நடக்க வேண்டியிருக்கும் என்பதால் புறப்பட்டு விட்டேன் - அலுவலகத்தின் அருகே இருக்கும் பேருந்து நிறுத்தத்தில் இறங்க மழை வலுத்தது! பத்து பதினைந்து நிமிடங்கள் காத்திருந்த பிறகு தான் அலுவலகத்திற்குள் நுழைய முடிந்தது! பேருந்து நிலையத்தில் காத்திருந்த போது ஒரு வீடற்றவர் தன்னிலை மறந்து அரைகுறை உடையில் பேருந்து நிலையத்தில் படுத்து உறங்கிக் கொண்டிருந்தார்! அவருக்கு யார் குறித்த கவலையும் இல்லை. வேட்டியை அவிழ்த்து போர்த்திக் கொண்டிருந்தார் - உடலின் பெரும்பாலும் துணியில்லை! சாலையில் விழுந்து தெறிக்கும் தண்ணீர் திவலைகள் உறங்கிக் கொண்டிருக்கும் அந்த நபர் மீதும் தெளித்துக் கொண்டிருந்தது! அவர் நல்ல ஆழ்ந்த உறக்கத்தில் அல்லது மயக்கத்தில்.  யாருக்கும் அவரை எழுப்பவும் மனதில்லை. நிறைய போதை ஆசாமிகள் இங்கேயும் உண்டு என்பதால் எனக்கும் தயக்கம். இவர்களைப் போன்றவர்களிடம் போதைப் பழக்கம் அதிகம் உண்டு - அது குறித்து பிறகொரு பதிவில் எழுதுகிறேன். 

என்னதான் தேசத்தின் தலைநகர் என்றாலும் இங்கேயும் நிறைய பிரச்சனைகள் உண்டு.  எல்லாவற்றையும் பார்த்துக் கொண்டபடியே தனது வேலையைத் தொடர்கிறது இயற்கையும். 

மேலும் நடப்போம்…… மேலும் பேசுவோம்……

*******

இன்றைய பதிவு குறித்த தங்களது எண்ணங்களை பின்னூட்டத்தில் சொல்லுங்கள். விரைவில் வேறொரு பதிவுடன் உங்கள் அனைவரையும் சந்திக்கும் வரை…

நட்புடன்

வெங்கட் நாகராஜ்

புது தில்லி

24 செப்டம்பர் 2024