சாப்பிட வாங்க – காஞ்சிபுரம் இட்லி

காஞ்சிபுரம் இட்லி உலக ப்ரசித்திப் பெற்றது. பெருமாளுக்கு அன்றாடம் பூக்குடலையில் செய்து நிவேதனம் செய்வார்களாம். இதுவரை காஞ்சிபுரத்துக்கும் சென்றதில்லை, காஞ்சிபுரம் இட்லியும் ருசித்ததில்லை! ஆனால் தெரிந்த ஒரு மாமியிடமிருந்தும், இணையத்தில் பார்த்தும் கற்றுக் கொண்டு இன்று செய்தாச்சு.

பூக்குடலையிலும், விறகு அடுப்பிலும் செய்து பெருமாளுக்கும் அர்பணிப்பதால் அதன் சுவை கூடுதலாக இருக்கும்.

நான் எனக்குத் தெரிந்த முறையில் செய்துள்ளேன். செய்முறையும் மிகவும் எளிது. சுவையும் அபாரம். நீங்களும் வாய்ப்பு கிடைத்தால் முயற்சி செய்து பார்க்கலாம்.

செய்முறை:-

பச்சரிசி, புழுங்கலரிசி, உளுந்து மூன்றும் சம அளவில் எடுத்து ஊறவைத்து அரைக்கவும். கொஞ்சம் ரவை பதத்தில் அரைத்து எடுக்கவும். உப்பு போட்டு கரைத்து 8 மணி நேரம் புளிக்க விடவும்.

மாவில் சுக்குப் பொடி 1 ஸ்பூன் அளவு சேர்க்கவும். சிறிதளவு நெய்யில் மிளகு, சீரகம், பெருங்காயம், கறிவேப்பிலை சேர்த்து பொரிந்ததும் மாவில் கொட்டவும். கலந்து இட்லி தட்டிலோ, கிண்ணங்களிலோ 20 நிமிடம் ஆவியில் வைத்து எடுக்கவும். சட்னி, சாம்பார் மற்றும் மிளகாய்ப்பொடியுடன் பரிமாறலாம்.

விரைவில் வேறு ஒரு பதிவில் மீண்டும் ச[சி]ந்திப்போம்….

 

நட்புடன்

ஆதி வெங்கட்