குடும்பத்தில் பிரச்சனை – கொலை ஒரு முடிவா?

படம்: இணையத்திலிருந்து....

எந்த நாளிதழ் எடுத்தாலும், எந்த செய்தி ஊடகங்களைப் பார்த்தாலும் கொலை பற்றிய செய்தி இல்லாது இருப்பதில்லை. அதனாலேயே நான் தொலைகாட்சி பார்ப்பதில்லை – செய்தித் தாளும் மேலோட்டமாகப் பார்ப்பதோடு சரி. தலைப்பைப் படித்து எனக்குப் பிடித்ததாக இருந்தால், முழுவதும் படிக்க முயற்சிப்பேன். அவ்வளவு தான். ஆனாலும் சில சமயங்களில் இந்த மாதிரி செய்திகள் தலைப்பைப் பார்த்ததுமே அந்தக் குடும்பத்தினர் மீதான எண்ணங்கள் மனதில் மெதுவாக ஓட ஆரம்பிக்கிறது. மனதில் தோன்றும் எண்ணங்களைக் கட்டுப்படுத்துவது ரொம்பவே கடினமான விஷயம் தானே!

சமீபத்தில் எங்கள் பகுதியில் ஒரு விழா நடந்தது. அந்த விழாவில் வந்திருந்த பலரும் தங்களது விழாவிற்கான தங்களது பங்களிப்பை அளித்துக் கொண்டிருந்தார்கள் – சிலர் பணத்தாலும், சிலர் உடலுழைப்பாலும். இங்கே அப்படி ஒரு பெண்மணி, விழா ஏற்பாடு செய்தவர்களிடம் ”நான் இந்த வேலை செய்யவா” என்று கேட்டுக் கேட்டு வேலை செய்து கொண்டிருந்தார். அப்படிச் செய்த ஒரு வேலை அனைவருக்கும் உணவு பரிமாறுவது. இந்த உணவு பரிமாறும் வேலை பார்க்கச் சுலபமான ஒன்றாக இருந்தாலும் கொஞ்சம் கடினமானது. குனிந்து நிமிர்ந்து உணவு அளிப்பதில் அப்போது மகிழ்ச்சியாக இருந்தாலும், முடிந்த பிறகு முதுகு வலி தான். இந்தக் கடினமான வேலையையும் செய்து கொண்டிருந்தார் அந்தப் பெண்மணி.

அன்றைக்கு அந்தப் பெண்மணி விழாவில் வேலை செய்ததைப் பற்றி யாரும் பெரிதாகப் பேசவில்லை. விழா முடிந்து இரண்டு நாட்களுக்குப் பிறகு அவர் செய்த ஒரு வேலை தான் அவரைப் பற்றி பேச வைத்தது! அந்த வேலை.....

கணவன், மனைவி – அவர்களுக்கு இரண்டு குழந்தைகள் – ஒரு மகனும், ஒரு மகளும். பார்க்க சந்தோஷமான குடும்பமாகத் தான் எல்லோருக்கும் தெரிந்தது. கணவன், மனைவி இருவருமே பணிபுரிகிறார்கள். நல்ல வேலை, இரண்டு பேருமே சம்பாதிப்பதால் பணப் பிரச்சனை இருக்கக் கூடாது. ஆனாலும் இருந்திருக்கிறது. கணவன் – மனைவிக்குள் தொடர்ந்து பிரச்சனை இருக்க, மனைவி ஒரு விபரீத முடிவை எடுத்திருக்கிறார். அந்த முடிவு – தனது கணவரைக் கொலை செய்து விடுவது! அவருடைய அலுவலகத்தில் பணிபுரியும் ஒருவர் ஒரு ஏமாற்றுப் பேர்வழியிடம் அழைத்துச் சென்று பணம் கொடுத்து ஏதோ விஷத்தினை விபூதியில் கலந்து கொடுக்க, அந்த விபூதியைப் பாலில் கலந்து கணவரிடம் கொடுத்து விட்டார்.

கணவர் அந்தப் பாலைக் குடித்த பிறகு உடல் நிலை சரியில்லாது போக, தனது வாகனத்திலேயே அவரை ஏற்றிக்கொண்டு பக்கத்தில் இருக்கும் அரசு மருத்துவமனையில் கொண்டு போய், தான் வாகனத்தில் வந்து கொண்டிருந்தபோது ”இந்த நபர் சாலையோரத்தில் மயக்கம்போட்டுக் கிடந்தார்!” என யாரோ மூன்றாவது மனிதர் போலக் காண்பித்து மருத்துவமனையில் விட்டிருக்கிறார். மருத்துவமனையில் ஊழியர்கள், இவரது முகவரி, தொடர்பு எண் கேட்க, தவறான முகவரியும், தொடர்பு எண்ணும் கொடுத்து அங்கிருந்து சென்று விட்டாராம். இரண்டு நாள் கழித்து கணவர் நினைவு வராமலேயே இறந்துவிட, காவல் துறை விசாரிக்கத் துவங்கியிருக்கிறது. இவரை மருத்துவமனையில் கொண்டு சேர்த்தது யார் என விவரம் பார்த்தபோது, தவறான முகவரி, மற்றும் தொடர்பு எண் தந்த விவரம் தெரிந்திருக்கிறது!

காவல்துறை தீர விசாரித்து, மருத்துவமனை கண்காணிப்பு கேமராவில் பார்க்க, வாகன எண் கிடைத்திருக்கிறது. அதை வைத்து முகவரி கண்டுபிடித்து வீட்டுக்கு வந்தால், மனைவி தந்த பதில்கள் சரியாக இல்லை. விசாரிக்கும் விதத்தில் விசாரிக்க, தனது கணவரைக் கொலை செய்ததை ஒப்புக் கொண்டிருக்கிறார் அந்தப் பெண்மணி. இப்போது அவரை கைது செய்து விட்டார்கள். பெண்மணி அரசுப் பணியில் இருந்ததால், அவரை தற்காலிக பணி நீக்கம் செய்திருக்கிறார்கள். கணவன் மனைவிக்குள் இருந்த பிரச்சனையினால் இப்போது அவர்கள் பெற்றெடுத்த குழந்தைகள் இருவரின் எதிர்காலமும் பெரிய கேள்விக்குறியாக ஆகி இருக்கிறது – தந்தை மீளாத்துயிலில்.... தாயோ ஜெயிலில்!

அந்தப் பெண்மணியின் மகன்/மகள் இருவருடைய முகமும் மனதை விட்டு அகல மறுக்கிறது. என்னதான் பிரச்சனை என்றாலும், பிரச்சனையிலிருந்து விடுபட எத்தனையோ வழிவகைகள் இருக்க, கொலை செய்வதை ஒரு வழியாக ஏன் தேர்ந்தெடுத்தார், அந்தக் குழந்தைகளின் எதிர்காலம் என்ன ஆகும் என்ற கேள்விகள் இப்போது பலரின் மனதிலும். அக்கம் பக்கத்தில், எங்கள் பகுதியில் இருக்கும் அனைவருடைய பேச்சும் வித்தியாசமாக இருக்கிறது – அவர் குடிகாரர், நிறைய கடன் வைத்திருக்கிறார், அவர்களுக்குள் சண்டை, அந்தப் பெண்மணியின் நடத்தை சரியில்லை - உண்மையோ, பொய்யோ, அந்தக் குடும்பத்தினரைப் பற்றி இப்படி பலதும் பேசுகிறார்கள். ஊர் வாய்க்கு யார் பூட்டு போட முடியும். 

பிரச்சனைக்கு முடிவு என நினைத்து, இன்னும் ஒரு பெரிய பிரச்சனையை இழுத்து விட்டுக் கொண்டிருக்கிறார் – வேறு என்ன சொல்ல! குழந்தைகளை நினைத்தால் தான் மனம் ஆற மறுக்கிறது.....

மீண்டும் ச[சி]ந்திப்போம்…

நட்புடன்

வெங்கட்

புது தில்லி