Middle Class – கவிதை – ஆர். சுப்ரமணியன்

அனைத்து நண்பர்களுக்கும் இனிய காலை வணக்கம். இன்றைய பொழுதை, படித்ததில் பிடித்த ஒரு வாசகத்துடன் ஆரம்பிக்கலாம்.

கடன் வாங்கி வெளி ஊர்ல போய் படிக்கிற ”மிடில் கிளாஸ்” பையனுக்குத் தெரியும்… ஃபோன்ல அப்பா பேசும்போது அவரோட குரல்ல தெரியற வலி என்னன்னு….

இந்த வாரம் ஒரு ஹிந்தி கவிதையுடன் உங்களைச் சந்திக்கிறேன்.  என்னது ஹிந்தில கவிதையா?  பேசினாலே புரியாது! இதுல கவிதை வேறயா!  நான் வரல இந்த விளையாட்டுக்குன்னு அவசரப் பட்டு நகர்ந்துடாதீங்க!  ஹிந்தி புரியாம இருக்கற அவஸ்தை தில்லில வந்த நாள்ல நானும், என்னைப் போல பல நண்பர்களும் பட்டு இருக்கோமே!  ஹிந்தில கேளுங்க…. ரொம்பவே சிறப்பான குரல்ல இருக்கு இந்த கவிதை. கவிதை - பவன் மாலு... குரல் - ஷ்ரேயஸ் அனில் தால்பாடே...  கூடவே அதில் வரும் ஓவியங்களும் நன்றாகவே இருக்கிறது. முதலில் காணொளியைப் பார்த்து/கேட்டு விட்டு பிறகு தமிழிலும் படிக்கலாம்…

 

காணொளியாக இணைத்திருந்தாலும், சில சமயங்களில் யூவில் சென்று தான் பார்க்க வேண்டும் என இணையம் அடம் பிடிக்கலாம்! அதனால் கீழே யூட்யூப் சுட்டியும் கொடுத்திருக்கிறேன். அங்கேயும் சென்று பார்க்கலாம்!

Middle Class

கேட்டீங்களா?  சரி அந்த கவிதைக்கு என்ன அர்த்தம்னு புரியலைன்னு கஷ்டப்படாதீங்க…..  இதோ நம்ம தில்லி நண்பர் சுப்ரமணியன் தமிழில் அதை மொழிபெயர்த்து இருக்கிறார் – ஹிந்தி தெரியாதவர்களுக்காக!  வாருங்கள் படிக்கலாம்!

நடுத்தர வர்க்கம்….

இவர் ஒரு நாயகன் அல்ல!

            இவரால் வில்லனாகவும் ஆகமுடிவதில்லை…

வாழ்க்கை என்னும் ஓட்டப்பந்தயத்தில்,

            பெரும்பாலும் இடையிலேயே நின்றுவிடுகிறார்.

கனவுகளை நனவாக்கவும் இவரால் முடிவதில்லை…

            கனவுகளிலிருந்து விலகி நிற்கவும் முடிவதில்லை..

இருப்பினும் தராசின் முள்ளைப் போல,

            சமுதாயத்தின் நடுநிலையாய் இருந்துவிடுகிறார்.

இவரைத்தான் நடுத்தர வர்க்கம் என அன்போடு அழைக்கிறார்கள்….

            நடுத்தர வர்க்கம் என அழைக்கிறார்கள்….

இவருக்கு நடுநடுங்கவும் தெரியாது….

            அடுத்தவரிடமிருந்து அபகரிக்கவும் தெரியாது.

இவருக்கு தன்னுடைய தேவைகளை மட்டுமே

            அன்போடு கவர்ந்திழுக்கத் தெரியும்….

சில நேரம் செல்வந்தர்களின் சாரதி ஆகிறார்….

சிலநேரம் ஏழைகளின் தோழன் ஆகிறார்…

ஆனால் தனது தேவைகளுக்கென்று…

யாரிடமும் எதையும் கேட்க முடிவதில்லை.

சுயமரியாதையுள்ள இவரை…

நடுத்தர வர்க்கம் என அழைக்கிறார்கள்….

            நடுத்தர வர்க்கம் என அழைக்கிறார்கள்….

தேவைகள் இவருக்கும் உண்டு…

ஆனால் கேட்பார் தான் யாருமில்லை.

கேள்விகள் இவருக்கும் உண்டு….

ஆனால் விடை அளிப்பவர் எவருமில்லை.

கஷ்டங்கள் இவருக்கும் உண்டு…

ஆனால் இவர் பிரபலம் அல்ல….

அதனால் தானோ என்னவோ…

இவருக்கும் பிரச்சனைகள் உண்டு….

ஆனால் செய்திகளில் இவர் இல்லை….

கூட்டத்தில் சிக்கி தவித்து விடுவதுண்டு….

வரும்படியின் கதைகளைக் கேட்டுவிடுவதுண்டு…

சோர்வுடனேயே வாழ்ந்து விடுகிறார்.

கசந்த உண்மைகளை விழுங்கி விடுகிறார்.

சற்றே அதிர்ஷ்டத்தை கடிந்து கொள்வார்

மனதிற்குள்ளேயே அழுது விடுகிறார்.

தவணைகளில் வாழும் வாழ்க்கையிலிருந்து…

            விடுபட முடியாமல் இருந்து விடுகிறார்.

தராதரத்தின்(status) விளிம்பில் கூட…

புன்னகையில் அனைத்து இன்னல்களையும் மறந்துவிடுவார்.

சகிப்புத்தன்மை என்பது நாடி நரம்பெல்லாம் உள்ளது.

சகிப்புத்தன்மை என்பது நாடி நரம்பெல்லாம் உள்ளது….

தைரியத்துடன் மனதைத் தேற்றி விடுவார்….

தைரியமானவர் தான் இவர்…

நடுத்தர வர்க்கம் என அழைக்கிறார்கள்….

புரிதலுள்ளவர் தான் இவர்….   

நடுத்தர வர்க்கம் என அழைக்கிறார்கள்….

மொழிபெயர்ப்பு:  ஆர். சுப்ரமணியன், தில்லி.

நண்பர்களே, இந்த ஞாயிறில் உங்களுடன் பகிர்ந்து கொண்ட கவிதை உங்களுக்குப் பிடித்ததா? பதிவு பற்றிய உங்கள் கருத்துகளைச் சொல்லுங்களேன். விரைவில் வேறு ஒரு பதிவுடன் மீண்டும் ச[சி]ந்திப்போம்...

 

நட்புடன்

 

வெங்கட் நாகராஜ்

புது தில்லி