தூணிலும் இருப்பான் – பா. ராகவன் – வாசிப்பனுபவம்

 

அன்பின் நண்பர்களுக்கு, இனிய காலை வணக்கம்.  இன்றைய நாளை, நல்லதொரு வாசகத்துடன் ஆரம்பிக்கலாம்…

அறியாமையுடன் நூறு ஆண்டுகள் வாழ்வதை விட அறிவுடன் ஒரு நாள் வாழ்வது மேல் – கணித மேதை ராமானுஜன்.

பா. ராகவன் மற்றும் என். கணேசன் இவர்கள் இருவரின் மேல் எனக்கு ஒரு ஆச்சர்யமான பிரியம் உண்டு – எத்தனை புத்தகங்களை எழுதிக் கொண்டே இருக்கிறார்கள்.  பா. ராகவன் அவர்களின் ஒரு சில நூல்களை வாசித்திருக்கிறேன்.  அப்படியே என். கணேசன் அவர்களின் சில நூல்களும்.  அமேசான் கிண்டிலில் பா. ராகவன் அவர்களுடைய சில நூல்களை வாசித்ததுண்டு.  இன்றைக்கு நண்பர் அரவிந்த் அவர்கள் சொல்லப் போகும் வாசிப்பனுபவம் கூட திரு பா. ராகவன் அவர்களுடைய “தூணிலும் இருப்பான்” புத்தகம் பற்றிய வாசிப்பனுபவம் தான்.  நானும் தரவிறக்கம் செய்து கொள்ளலாம் எனப் பார்த்தபோது விலை ரூபாய் 99/- என்றது அமேசான் – கிண்டில் Unlimited வசதி இல்லை என்பது ஒரு குறையாகவே தோன்றியது எனக்கு.  Sample மட்டும் இலவசமாக தரவிறக்கம் செய்து படித்தபோது விறுவிறுப்பாகவே இருந்தது. சென்னை பர்மா பஜார் பகுதியில் நடக்கும் கதை. ஏற்கனவே தரவிறக்கம் செய்து வைத்திருக்கும் பதினைந்து நூல்களை முடித்தபிறகு இந்தப் புத்தகத்தினையும் தரவிறக்கம் செய்தாலும் செய்வேன் – முடிவு தெரிந்து கொள்வதற்காக! சரி வாசிப்பனுபவம் எப்படி இருந்தது என்பதை நண்பர் அரவிந்த் வழி தெரிந்து கொள்ளலாம் வாருங்கள்.  ஓவர் டு அரவிந்த் – நட்புடன் – வெங்கட் நாகராஜ், புது தில்லி.

*****

தூணிலும் இருப்பான்: நிழல் உலகின் நிஜ தரிசனம்

சமீப காலங்களில் பெரும்பாலும் எழும் பேச்சு, கருப்புப் பணத்தை மீட்டெடுத்துவிட்டால் ஏழ்மை ஒழிந்து நாடு சுபிக்ஷம் அடைந்துவிடும் என்பது. 

குறிப்பாகத் தேர்தல் சமயங்களில் இக்கருத்துகள் பெரும் விவாதம் ஆகி ஏதோ ஸ்விட்சர்லாந்து வங்கிகளில் கருப்புப்பணம் பூட்டிவைக்கப்பட்டது போலும், அவற்றைத் திறந்துவிட்டால் உலகெங்கும் பாலாறும் தேனாறும் ஓடும் என்பது போன்றும் சொல்லப்படுவதைக் கேட்டு பலர் நம்பியும் இருப்பார்கள். 

உண்மையில் கருப்புப் பணம் என்பது ஒர் இடத்தில் புதைந்து கிடப்பது அல்ல, அதன் ஊற்றான கருப்புப் பொருளாதாரமே உலகப் பொருளாதாரத்தின் பெரும்பங்கு என்பதையும் பொருளியலையும் உலக அரசியலையும் ஆள்வதே கணக்கில் வராத இப்பொருளாதாரத்தின் செயல்பாடுகளே என்பதையும் மிகச் சிலரே உணர்ந்துள்ளனர். 

"ஆண்டவன் தூணிலும் இருப்பான் துரும்பிலும் இருப்பான்" என்பது போல உலகின் அனைத்து பகுதிகளிலும் வியாபித்திருக்கும் இப்பொருளாதாரத்தை அனைவருக்கும் எளிதில் புரியும் வண்ணம் படைக்கப்பட்ட எளிய விறுவிறு புதினமே, பிரபல எழுத்தாளரும் திரைப்பட மற்றும் தொலைக்காட்சித் தொடர் வசனகர்த்தாவுமான திரு பா. ராகவன் அவர்களின்  "தூணிலும் இருப்பான்". 

உலகைப் பின்னியுள்ள வலையான தீவிரவாத அமைப்புகளைக் குறித்து எழுதப்பட்ட இவரின் "மாயவலை" வரலாற்றுத் தொடரில் காட்டப்பட்ட, பணம் ஈட்டும் மாபெரும் வலையின் ஒரு கண்ணியான சென்னையின் "பர்மாபஜார்" பகுதியே கதையின் களம். 

ஆதியிலிருந்தே படிப்பும் சேர்க்கையும் சரியாக அமையாத கதையின் நாயகன் ஐயனார், வீட்டிலிருந்து வெளியேறி பர்மா பஜாரில் தேநீர் கொடுப்பதில் ஆரம்பித்து கள்ளக்கடத்தல் நுணுக்கங்களில் தேறி, நிழலுலக முதலாளிகளால் அரசியல் பதவி, புது தொழில் முதலிய பல ஆசைகளால் அலைக்கழிக்கப்பட்டு எந்த எல்லை வரை செல்கிறான் என்பதே கதையின் சுருக்கம். 

கல்விக்கூடங்களில் முதல் வரிசையில் அமரும் நன்கு படிப்பவர்கள் மாத சம்பளக்காரர்களாகவும், இரண்டாம் வரிசையான சுமார் படிப்பாளிகள் அவர்களுக்குச் சம்பளம் தரும் முதலாளிகளாகவும், மூன்றாம் வரிசையின் சரியாகப் படிக்காதவர்கள் முதலாளிகளை ஆளும் அரசியல்வாதிகளாகவும் பின்வரிசையில் உள்ள படிப்பே வராதவர்கள் அனைவரையும் ஆட்டுவிக்கும் நிழலுலக தாதாக்களாகவும் வருவார்கள் என்ற நகைச்சுவையை குறுஞ்செய்திகளில் பெற்று ஃபார்வேர்டு செய்திருப்போம். 

இதன் நிதர்சனத்தை உணர்த்துவது, தனக்கென்று வீடே இல்லாமல் மேன்ஷனில் தங்கி, கள்ளக்கடத்தலின் உலகளாவிய அமானுஷ்ய வலைப்பின்னலால் பயன்பெறும் அரசியல்வாதிகள், புரட்சியாளர்கள், தொழிலதிபர்கள், கஸ்டம்ஸ் ஊழியர்கள், போலீஸ் என அனைவரையும் சரிக்கட்டி ஆளும் பஜாரின் கடவுளாக விளங்கும் முதலாளி மீனாட்சிசுந்தரம் என்ற ஆளுமை. 

இவ்வளவு பலம் பெற்றவர், ஐய்யனாரிடம் "நாம போர்ட்டர் ஜோலி பார்க்கறோம். நமக்குக் கிடைக்கிறது சுமைகூலி மட்டும் தான்!" என்பதும், அவருக்கு மேல் உள்ள ஏஜன்டுகள், சிறியசாமிகள், பெரியசாமிகள் என வலைப்பின்னலை விளக்குவதும் கள்ளக்கடத்தலின் விஸ்வரூபத்தை நாம் உணர்ந்து வாய்பிளக்கும் தருணங்கள். 

இச்சந்தையில் வாழும் சூழ்நிலைக்கைதிகளின் அவலத்தைப் புரிந்து கொள்ள உதவுவது, ஐயனாரிடம் தனபால் கூறும், "நாத்தம் புடிச்ச வாழ்க்கையைப் பணத்தோட வாசனையாலதான் மறைக்கணும்" என்ற வைரவரி. 

இங்குள்ள அனைவரையும் ஏமாற்றுக்காரர்களாகவும் பேராசைக்காரர்களாகவும் எண்ணினால், "குடும்பத்துக்கு மூணு வேளை சோறு, பண்டிகைக்குப் புதுத்துணி, எந்திரிச்சா நிம்மதி, ஹஜ்ஜூக்கு போவணும்" என்ற எளிய ஆசைகளோடு வாழும் சஜாத்தின் வாப்பா போன்றோரும், அவரை மதித்து அவர் கடையை பதுக்கலுக்காக உபயோகிக்காத ஐயனாரின் பண்பும் நெகிழ்ச்சியின் கணங்கள். 

நகரிக்குச் செல்லும் ஐயனாரை வீழ்த்தப்போவது அவனால் கைவிடப்பட்ட பழைய காதலி மீனாட்சியா? அவனின் நம்பிக்கை துரோகத்திற்கு ஆளான முதலாளியா? அவனுடன் கூட வரும் நண்பர்களா? பின்னால் வருவேன் என்று சொன்ன தனபாலா? என பரபரப்பாக நகரும் புதினத்தின் இறுதிப் பக்கங்கள் யாரும் எதிர்பார்க்காத முடிவைக் கொடுப்பது எழுத்தாளரின் தனிமுத்திரை. 

இவர்களை மீட்கவோ நெறிப்படுத்தவோ நம்மால் முடியாது என்ற போதிலும் இவர்களையும், உலகின் பெரும்பகுதியான இச்சந்தையையும் தெளிவாகப் புரிந்து கொள்ள ஆரம்பப்புள்ளியாக விளங்கக்கூடிய இப்புத்தகத்தைக் கீழ்க்காணும் சுட்டியில் வாங்கி படிக்கலாம். 

தூணிலும் இருப்பான்

மேலும் ஒரு வாசிப்பனுபவத்துடன் உங்களைச் சந்திக்கும் வரை…

நட்புடன்,

இரா. அரவிந்த்