பாடும் நிலா பாலு – எங்கும் ஒலிக்கட்டும் அவர் குரல்…

அன்பின் நண்பர்களுக்கு, காலை வணக்கம். இன்றைய நாளை நல்லதோர் வாசகத்துடன் தொடங்கலாம் வாருங்கள். 

மரணம் என்பது வேறு உடை மாற்றுவது போலதான்! அதனால் என்ன போயிற்று? – ஸ்வாமி விவேகானந்தர். 

பாடும் நிலா பாலு – இன்று நம்முடன் இல்லை! மரணம் அவரையும் வீழ்த்தி விட்டது! ஆனால் அவரது பாடல்களை, அவரது குரலை, இந்த மரணத்தினால் வீழ்த்தி விட முடியுமா என்ன? நிச்சயம் அவரது நினைவினையும், பாடல்களையும், பல மொழிகளில் ஒலித்த அவரது குரலையும் இன்னும் பல வருடங்களுக்கு மறக்கவோ, மறைக்கவோ முடியாது என்பது நிதர்சனம். 

திறமை இருக்கும் இடத்தில் கர்வமும் இருப்பது பொதுவானது – ஆனால் இவரோ அப்படி இருந்ததில்லை – எளிமை, அனைவரிடமும் பண்பாக நடப்பது என மிகவும் சிறப்பான வாழ்க்கை – பார்த்த காணொளிகள், பார்த்த இசை நிகழ்ச்சிகள் என அனைத்திலும் அப்படி ஒரு எளிமை. பல நிகழ்வுகளில் கலந்து கொள்ளும்போது சின்னஞ்சிறு பாடகர்கள், அதிகம் பிரபலமில்லாத பாடகர்கள் என அனைவருக்கும் நல்ல விதமாக, சொல்லித்தருகின்ற ஒரு கலைஞர் இவர் மட்டுமே! சக பாடகர்களின் திறமையை மதிக்கும், பாராட்டும் கலைஞர்கள் இவ்வுலகில் மிகவும் குறைவே – பெரும்பாலும் இல்லை என்று கூட சொல்லி விடலாம்! ஆனால் பாலு இதிலும் ஒரு படி மேல்! எல்லோருடைய திறமைகளையும் பாராட்டும் இவரது குணம் யாருக்கு வரும்! அவரது நீண்ட நாள் நண்பர், ஆதி காலத்திலிருந்து ஒன்றாக பல வெற்றிப்படிகளை தொட்டவர்கள் என நீண்ட உறவு அவருக்கும் இளையராஜாவுக்கும்! அந்த இளையராஜா, இவருடன் பிணக்கு கொண்ட போது கூட புறம் பேசாத நல்ல மனிதர் பாலு! 

அவர் நம்மிடமிருந்து மறைந்தாலும், அவரது குரலில் ஒலித்த பல பாடல்கள், அவரது குரல், அவரது எளிமை, அவரது நினைவுகள் நம்மை விட்டு என்றைக்கும் மறையாது! இத்தனை காலம் நம்மை சந்தோஷம் கொள்ளச் செய்தவர் இப்போது இறைவனை அவரது குரலால் மகிழ்விக்கச் சென்று இருக்கிறார்! 

என்றைக்கும் உங்களது குரல் ஒங்கி ஒலிக்கும் பாலு! சென்று வாருங்கள்! 

நட்புடன் 

வெங்கட் நாகராஜ் 

புது தில்லி