கதம்பம் - துண்ட மாங்காயும், நெல்லிக்காய் ரசமும் - அமுதம் விளையும் (வாசிப்பனுபவம்)

அன்பின் நண்பர்களுக்கு, இனிய காலை வணக்கம். இந்த நன்நாளில் மீண்டும் ஒரு பதிவுடன் உங்கள் அனைவரையும் சந்திப்பதில் மகிழ்ச்சி.  

இதற்கு முன்னர் வெளியிட்ட The Concept of Work From Home - பொறாமை பதிவினை படித்து கருத்துகள் தெரிவித்த அனைத்து வலையுலக நண்பர்களுக்கும் மனம் நிறைந்த நன்றி.  இந்த நாளை நல்லதொரு வாசகத்துடன் தொடங்கலாம் வாருங்கள். 

*******

துண்ட மாங்காயும், நெல்லிக்காய் ரசமும் - 10 மார்ச் 2024:

இங்கு வெயில் கொளுத்த ஆரம்பித்து விட்டது! பசியும் இல்லை! சாப்பிடவே பிடிக்கலை! சரி! குக்கரில் சாதமும் பருப்பும் வைத்ததும்  சந்தையில் வாங்கிய மாங்காய் தான் இருக்கே என்று நறுக்கி உப்பு, காரம் சேர்த்து நல்லெண்ணெயில் தாளித்து இன்ஸ்டண்ட் ஊறுகாய் தயார் செய்தேன். 

எனக்கு ஊறுகாயின் மேல் அவ்வளவு ஈடுபாடு இல்லை. மோர் சாதத்துக்கு குழம்பு அல்லது இட்லி மிளகாய் பொடி தொட்டுக் கொண்டு கூட சாப்பிட்டு விடுவேன்! அதுவும் வருடக்கணக்கில் வைத்துக் கொள்ளும் நாள்பட்ட எண்ணெய் மிதக்கும் ஊறுகாயின் மேல் ஈடுபாடே கிடையாது! சட்டென்று செய்யும் துண்ட மாங்காய், நெல்லிக்காய், மாங்காய் தொக்கு, இஞ்சிப்புளி, பசுமஞ்சள் ஊறுகாய் போன்றவை இருந்தால் போட்டுக் கொள்வேன்!

இன்றைக்கு ரசம் மட்டும் போதும் என்றதும் உப்பில் ஊறிய நெல்லிக்காய் இருந்தது நினைவுக்கு வந்தது! காலையில் வெறும் வயிற்றில் கறிவேப்பிலையுடன் நெல்லிக்காயும் மென்று சாப்பிடுவேன்! நெல்லிக்காயுடன் மிளகு சீரகம், தக்காளியும் சேர்த்து அரைத்து கொதிக்க வைத்து நெய்யில் தாளித்தால் நெல்லிக்காய் ரசம் ரெடி! இதை சூப் போலவும் குடிக்கலாம்! சுவையாக இருக்கும்!

இன்றைய சமையல் இப்படி...🙂

*******

வாசிப்பனுபவம் - அமுதம் விளையும் - ரமணிசந்திரன் - 12 மார்ச் 2024:

கதையின் நாயகி மானசி 22 வயதே ஆன இளம்பெண்! எதனாலோ தன்னுடைய அடையாளத்தை மறைத்துக் கொண்டு ஆதரவற்றவர்கள் ஆசிரமம் மூலம் ஒரு இடத்தில் பணிக்குச் சேர்கிறாள்! நான்கு வயது குழந்தையான இந்துவை பார்த்துக் கொள்ளும் வேலை தான் அவளுக்கு தரப்படுகிறது!

கதையின் நாயகனான உமாகாந்தன் தான் குழந்தை இந்துவின் தகப்பன்! தொழிலதிபரான உமாகாந்தனுக்கு ரஞ்சனி என்ற தங்கை இருக்கிறாள்! இருவரும் பிசினஸில் பிஸியாக இருக்க மனைவியின் மறைவுக்குப் பிறகு உமாகாந்தனுக்கு குழந்தையை பார்த்துக் கொள்வது சிரமமாக இருக்கவே ஆசிரமத்தில் சொல்லி மானசியை பணியில் அமர்த்துகிறார்கள்!

சில நாட்களிலேயே மானசியும் இந்துவும் நெருக்கமாகி விடுகிறார்கள். குழந்தை பள்ளிக்குச் செல்லும் நேரத்தில் மானசியும் தன் படிப்பான ஃபேஷன் டிசைனிங்கை தொடர்கிறாள்! தன்னுடைய குணத்தால் அனைவரின் மனதிலும் இடம் பிடிக்கிறாள்! அந்த வீட்டில் உள்ள பிரச்சினைகள் ஒவ்வொன்றையும் சரி செய்கிறாள்!

இப்படிச் செல்லும் கதையில் மானசி எதற்காக மறைந்து வாழ்கிறாள்? அவளின் பின்னணி என்ன? உமாகாந்தனுக்கும் மானசிக்கும் இடையே எப்படிப்பட்ட சூழலில்  காதல் உண்டானது? என்பதையெல்லாம் இந்த நூலை வாசித்தால் தெரிந்து கொள்ளலாம்!

எழுத்தாளர் ரமணிசந்திரன் அவர்களின் கதைகளில் நாயகன் என்பவர் வசதியான இடத்து பிள்ளையாக ஆறடி உயரத்தில் உயர்ந்த மனிதனாக இருப்பார்! நாயகி தன்மானத்தோடும் சுயமரியாதையோடும் இருப்பவளாக இருப்பாள்! தோட்டம், சமையல், அழகுக்கலை போன்றவற்றில் ஈடுபாடு கொண்டவளாக இருப்பாள்! இவரின் எழுத்து வாசிக்க தொய்வு இல்லாத நடையுடனும், இயல்பாகவும் இருக்கும்!

சமீபத்தில் நான் கிண்டிலில் வாசித்த நூல் தான் அமுதம் விளையும்!  மென்மையாக செல்லும் கதையாக இருந்தது! காதலும் கம்பீரமும் இணைந்த கதை! குறை என்று சொல்ல வேண்டுமென்றால் மின்னூலாக வடிவமைக்கும் போது  பதிப்பகத்தில் அத்தனை மெனக்கெடுவதாக தெரிவதில்லை! ஆங்காங்கே எழுத்துப்பிழைகள்! ஒரு சில இடங்களில் குத்துமதிப்பாக சொற்றொடரை புரிந்து கொள்ள வேண்டியதாக இருக்கிறது! 

நான் ரசித்து வாசித்த இந்த நூலை வாய்ப்புக் கிடைத்தால் நீங்களும் வாசித்துப் பாருங்களேன்!

*******

இன்றைய பதிவு குறித்த தங்களது எண்ணங்களை பின்னூட்டத்தில் சொல்லுங்கள். விரைவில் வேறொரு பதிவுடன் உங்கள் அனைவரையும் சந்திக்கும் வரை…

நட்புடன்

ஆதி வெங்கட்