The Concept of Work From Home - பொறாமை

அன்பின் நண்பர்களுக்கு, இனிய காலை வணக்கம். இந்த நன்நாளில் மீண்டும் ஒரு பதிவுடன் உங்கள் அனைவரையும் சந்திப்பதில் மகிழ்ச்சி.  

இதற்கு முன்னர் வெளியிட்ட இயற்கை அன்னையின் மடியில் - பயணத்தின் முடிவு பதிவினை படித்து கருத்துகள் தெரிவித்த அனைத்து வலையுலக நண்பர்களுக்கும் மனம் நிறைந்த நன்றி.  இந்த நாளை நல்லதொரு வாசகத்துடன் தொடங்கலாம் வாருங்கள். 

*******

The Concept of Work From Home (WFH) - என்னடா ஆங்கிலத்தில் தலைப்பு வைத்திருக்கிறேனே என்று யோசிக்க வேண்டாம்.  தீநுண்மி வந்தாலும் வந்தது, இந்தியாவில் பல நிறுவனங்கள் தங்களது ஊழியர்களுக்கு இந்த மாதிரி ஒரு வசதியை - அதாவது நிறுவனத்தில் சம்பளம் வாங்கிக் கொண்டு நீங்கள் செய்ய வேண்டிய வேலைகளை அவர்களது அலுவலகத்திற்கு வந்து செய்ய வேண்டும் என்ற கட்டாயம் இல்லாமல், வீட்டிலிருந்தபடியே செய்யலாம் எனும் வசதியைக் கொண்டு வந்த பிறகு பலருக்கும் இந்த வசதி மிகவும் பிடித்திருக்கிறது.  குறிப்பாக இளைஞர்களுக்கு - திருமணம் ஆனவராக இருந்தாலும் இல்லாவிட்டாலும் இவர்களுக்கு இந்த வசதி மிகமிகப் பிடித்திருக்கிறது! வேலை நேரம் அதிகமாகிவிடுகிறது போன்ற சில சிக்கல்களும் தொல்லைகளும் இருந்தாலும், பலரும் இந்த மாதிரி வசதியை விரும்புகிறார்கள்.  எனது நட்பு வட்டத்திலும், தெரிந்தவர்கள் வீடுகளிலும் இப்படி வீட்டிலிருந்தே அவர்களது வேலைகளை முடித்துவிடும் சிலருடன் பேசியபோது அவர்கள் அனைவருமே நல்ல வசதி தான் என்றே சொல்கிறார்கள். 

வீட்டு வேலைகளையும் பார்த்துக் கொண்டு, அலுவலகத்திற்கும் சென்று வேலைகளை பார்க்க வேண்டிய பெண்களுக்கு இந்த WFH வசதி மிகவும் பிடித்திருக்கிறது.  என்னதான் இந்த வசதியில் அலுவலகத்திற்குச் சென்று வேலை செய்வதை விட அதிக நேரம் வேலைகளைச் செய்ய வேண்டியிருக்கிறது என்றாலும் அவசர அவசரமாக வேலைகளை முடித்துக் கொண்டு அலுவலகம் வரையிலான தூரத்தினை கிடைத்த வாகனத்தில் (பேருந்து, CAB, வாடகை வண்டிகள்) என பயணிப்பதும், அலுவலகத்திற்குச் செல்ல வேண்டியிருப்பதால் அதற்காக தனியாக உடைகள், ஒப்பனை என நேரம் செலவழிப்பதும் வீட்டிலிருந்து வேலை செய்யும் போது குறைந்திருக்கிறது.  பெரிதாக எதுவும் தயாராக அவசியமிருப்பதில்லை என்பதால் இது ஒரு பெரிய வசதி என்று சொல்கிறார்கள். திருமணம் ஆன ஆண்களும் வீட்டிலிருந்து வேலை செய்வதால் வீட்டு வேலைகளில் பங்கெடுத்துக் கொள்வதும் அதிகரித்திருக்கிறது என்றாலும் அவர்களுக்கும் இந்த வசதி பிடித்ததாகவே இருக்கிறது.  இதையெல்லாம் விட ஒரு சாராருக்கு இந்த வீட்டிலிருந்து வேலை செய்யும் வாய்ப்பு அதிக அளவில் பயன்படுகிறது - அவர்கள் திருமணம் ஆகா இளைஞர்கள்/இளைஞிகள் - குறிப்பாக இளைஞர்கள்!

நிறைய இளைஞர்கள் தங்கள் வீடுகளிலிருந்து புறப்பட்டு ஏதேனும் ஒரு ஊருக்குச் சென்று அங்கே தங்கி தங்களது அலுவலக வேலைகளைப் பார்ப்பதோடு ஊரும் சுற்றி விடுகிறார்கள்.  எனது நட்பு வட்டத்தில் இருக்கும் இது போன்ற இளைஞர்களைப் பார்க்கும்போதும், அவர்களது பயணங்களைக் குறித்து கேட்கும்போதும், பயண விரும்பியான எனக்கு சற்றே பொறாமை எட்டிப் பார்க்கவே செய்கிறது - என்னதான் நானும் பல பயணங்கள் செய்திருக்கிறேன் என்றாலும்! சமீபத்தில் ஒரு நண்பர் கடந்த இரண்டு வருடங்களாக இது போன்ற WFH வசதி காரணமாக அவர் செய்த பயணங்கள் குறித்து சொல்லிக் கொண்டிருந்தார்! இந்தியாவின் பல பகுதிகளுக்கும் சென்று கொண்டே இருக்கிறார். நினைத்த போது வீட்டிலிருந்து புறப்பட்டு ஊர் ஊராகச் செல்வது - பிடித்த இடத்தில் எவ்வளவு நாட்கள் தங்கமுடியுமோ அவ்வளவு நாட்கள் தங்குவது, அடுத்து எங்கே செல்லலாம் என அப்போதைக்கு அப்போது முடிவு செய்து அதனை நடத்துவது என்றெல்லாம் இருக்கிறார்கள்.  இது போன்ற இளைஞர்களை பார்க்கும்போதும், அவர்களது பயணங்களை, அனுபவங்களைக் குறித்துக் கேட்கும்போதும் நமக்கும் மகிழ்ச்சி பிறக்கிறது. 

சமீபத்தில் இப்படி ஒரு பயணத்தில் மோகன் என்றொரு நண்பர் எனது வீட்டிற்கு வந்து சில நாட்கள் தங்கியிருந்தார்.  கிட்டத்தட்ட இரண்டு மாதங்களுக்கு முன்னர் வீட்டிலிருந்து புறப்பட்டவர் இவர்! இந்த இரண்டு மாதத்தில் இவர் பயணித்த இடங்களின் பட்டியல் நீண்ட ஒன்று - தமிழகத்திலிருந்து கேரளா. கேரளத்திலிருந்து கர்நாடகா. அங்கிருந்து கோவா. கோவாவிலிருந்து மும்பை. மும்பையிலிருந்து குஜராத் (Rann of Kutch!) - குஜராத்திலிருந்து ராஜஸ்தான் வழியே ஆக்ரா. ஆக்ராவிலிருந்து தில்லி வழி ஸ்ரீநகர், காஷ்மீர்! காஷ்மீரில் 25 நாட்கள் தங்கியிருந்த பிறகு தில்லி வந்து எனது வீட்டில் நான்கு - ஐந்து நாட்கள் தங்கியிருந்த பிறகு தமிழகம் திரும்பியிருக்கிறார்.  இத்தனை பயணங்களுக்கு ஆன நாட்கள் சற்றேறக்குறைய இரண்டு மாதங்களுக்கு மேல்! ஒவ்வொரு பயணத்திலும் எத்தனை எத்தனை அனுபவங்கள் அவருக்குக் கிடைத்திருக்கும், எத்தனை வித உணவுகளை ருசித்திருப்பார் (தில்லி வந்ததும் நல்ல தோசை சாப்பிடணும் என்றார்! அவரை நைவேத்யம் எனும் உணவகத்திற்கு அழைத்துச் சென்றேன்!)  என்றெல்லாம் யோசனை எனக்கு! இப்படி என்னால் பயணிக்க முடியுமா என்ற கேள்வியும் மனதுக்குள்! சில ஆசைகள் இருந்தாலும் நிறைவேறுவது சாத்தியமல்ல என்பது தெரிந்தே இருக்கிறது. 

அவர் தில்லியில் இருந்த போது, சனி, ஞாயிறு ஆகிய இரண்டு நாட்களிலும் உலா வந்தோம்.  நான் ஏற்கனவே உலவிய இடங்கள் என்றாலும், அவருடன் உலா வந்து கொண்டிருந்தேன்.  சில படங்களை அவரது Samsung S-22 Ultra அலைபேசியில் எடுத்து என்னுடன் பகிர்ந்து கொண்டார்.  அப்படி எடுத்த சில படங்களை முடிந்த போது ஞாயிறு நிழற்பட உலாவாக பகிர்ந்து கொள்கிறேன்.  அவர் இன்றைய இளைஞர்களைப் போலவே Instagram மற்றும் Facebook போன்ற தளங்களில் இயங்குகிறார்.  முடிந்தால் அவரது அனுபவங்களை கேட்டு இங்கே வெளியிட நினைத்திருக்கிறேன். இல்லையெனில், படங்களையேனும் வெளியிட வேண்டும் எனக் கேட்டிருக்கிறேன்.  முடிந்த வரை வாழ்க்கையை அனுபவிக்க வேண்டும் என்ற எண்ணத்துடன் இன்றைய இளைஞர்கள் இருப்பதைப் பார்க்கும்போது மகிழ்ச்சியாக இருக்கிறது.  வாழ்க்கையில் பல விஷயங்கள் இளமையாக இருக்கும் வரையே சாத்தியம் என்பதால் அவற்றையெல்லாம் முடிந்தபோதே அனுபவித்து விட வேண்டும் - குறிப்பாக பயணங்கள். 60 வயதுக்கு மேல், பணி ஓய்வு பெற்ற பின்னர் பயணிக்கத் தொடங்குவேன் என்று நினைத்துக் கொண்டிருந்தால் அந்த வயதில் எல்லா இடங்களுக்கும் செல்வது சாத்தியமல்ல! வசதிகள் பல தேவையாக இருக்கும், இயலாமை வந்து சேர்ந்துவிடும், உடல் ஒத்துழைக்காது - இப்படி பல காரணங்கள் பயணிக்க முடியாமல் செய்து விடும்.  அதனால் முடிந்த வரை வாழ்க்கையை அனுபவிக்க வேண்டும்! முடிந்த போதே ஒரு Bucket List வைத்துக் கொண்டு ஒவ்வொன்றாக நிறைவேற்றிக் கொண்டே வரவேண்டும்! 

தில்லியில் அவர் இருந்த போது அவரது பல பயண அனுபவங்களை பகிர்ந்து கொண்டார். நானும் எனது அனுபவங்களை பகிர்ந்து கொண்டேன்.  பயணம் குறித்த சிந்தனைகள், மனிதர்களின் இயல்பு, உணவு, இயற்கை என பல விஷயங்களை எங்களால் பகிர்ந்து கொள்ள முடிந்தது - பயணத்தின் மீது இருக்கும் ஆர்வம் இருவருக்கும் பொது என்பதால் நிறைய விஷயங்களை எங்களால் பேசிக்கொள்ள முடிந்தது.  அதிலும் சில இரவுகள் பன்னிரெண்டு ஒரு மணி வரை பேசிக் கொண்டிருந்தோம் என்றால் பாருங்கள் - எத்தனை பேசியிருப்போம் என!  எனக்கும் WFH வசதி இருந்தால் எங்கெல்லாம் பயணம் செய்திருப்பேன் என்றும் சொல்லிக்கொண்டிருந்தேன்.  ஆசைகளுக்கு அளவேது! எல்லா ஆசைகளும் நிறைவேறாவிட்டாலும், சில ஆசைகளேனும், சில பயணங்களேனும் நிறைவேறியிருக்கிறது என்பதில் மகிழ்ச்சியே! பயணங்கள் நல்ல பல அனுபவங்களை நமக்குத் தருகின்றது! ஆதலினால் பயணம் செய்வோம்! 

*******

இன்றைய பதிவு குறித்த தங்களது எண்ணங்களை பின்னூட்டத்தில் சொல்லுங்கள். விரைவில் வேறொரு பதிவுடன் உங்கள் அனைவரையும் சந்திக்கும் வரை…

நட்புடன்

வெங்கட் நாகராஜ்

புது தில்லியிலிருந்து…