கதம்பம் – பூங்கா – தமிழ்க் கொலை – தவலை வடை – ரோஸ்மில்க் கேசரி – ராகி புட்டு

ரோஸ்மில்க் கேசரி!!!

 

இன்று தொலைக்காட்சியில் ஒரு சமையல் நிகழ்ச்சியில் குல்கந்து பால் கேசரி செய்து காண்பித்தனர். நான் தான் இனிப்புப் ப்ரியையாச்சே!! விடுவேனா!!!

குல்கந்து என்னிடம் இல்லை. இருக்கவே இருக்கு Roohafza!! அப்புறம் என்ன!! ஜமாய்!! புது வித முயற்சியாக செய்த ரோஸ்மில்க் கேசரி அசத்தல் போங்க. நிறமும் மணமும் பிரமாதம். மகளுக்கு மிகவும் பிடித்திருந்தது!

 

செய்திச் சானலில் தமிழ்க் கொலை!!!

மருத்துவமனை - அருத்துவமனை

வேலைவாய்ப்பு - வெலைவாய்ப்பு

புனரமைப்பு - புணரமைப்பு

திறன் - திறண

இப்படி அன்றாடம் பல கொலைகள்!!! இதைக் கேட்பார் யாரும் இல்லையா!!!

ரோஷ்ணி கார்னர்:

சமீபத்தில் மகள் வரைந்த ஓவியம் ஒன்று.

மகள் பள்ளியில் ஒரு செயல்திட்டத்திற்காக தயாரித்த வாழ்த்து அட்டை.

ராகி புட்டு:

காலை உணவாக ராகி புட்டு.

ஜொலிக்கப் போகும் மலைக்கோட்டை:

தவலை வடை!!!

கீதா மாமி நேற்று பகிர்ந்திருந்த தவலை வடையைப் பார்த்ததும் செய்யத் தூண்டியது. என் அம்மா செய்து இந்த வடையை சிறுவயதில் சாப்பிட்டிருக்கிறேன். அந்த சுவை இன்றும் நாவில். அளவுகளும், செய்முறையும் தான் தெரிவதில்லை. அப்போது கேட்டுத் தெரிந்து கொள்ளும் வயது இல்லை. அம்மா இன்னும் கொஞ்ச வருஷம் இருந்திருக்கலாம். நானும் பாரம்பரிய முறைகளைத் தெரிந்து கொண்டிருப்பேன்.

இருப்பது இரண்டு பேர். மகளுக்கு பிடிக்குமோ பிடிக்காதோ என்று யோசித்து, ஸ்பூனை விட சற்றே பெரிதான கரண்டியில் அரிசி, பருப்புகளை அளவில் எடுத்து ஊறவைத்து அரைத்தேன்.

மாலை மகள் பள்ளியிலிருந்து வந்ததும் செய்து தந்தேன். அபாரம் என்றாள் மகள். அப்பா வரும் போது நினைவில் வைத்து செய்து தருவோம் எனச் சொன்னேன். பாரம்பரியமான தவலை அடையைப் பகிர்ந்து கொண்ட கீதா மாமிக்கு நன்றி.

 

இந்த நாள் இனிய நாள்!!

காலை நேர பரபரப்பில் தெரியாத எண்ணிலிருந்து ஒரு அழைப்பு!!!

ஹலோ!!

புவனாவா??

ஆமாம்! நீங்க??

நான் சித்தப்பா பேசறேன் மா!!!

(ஆச்சரியம்!!! ஏனென்றால் யாரும் என்னை அழைக்கமாட்டார்கள். சொந்தங்களிடம் நானாக பேசினால் தான். என் எண் கூட பெரும்பாலும் யாரிடமும் இருக்காது.

செளக்கியமா சித்தப்பா, சித்தி செளக்கியமா??

இப்ப தான் எழுந்தியாம்மா???

இல்ல சித்தப்பா, வேலை பரபரப்பா பண்ணிட்டிருக்கேன். சொல்லுங்கோ.

போன வாரம் எலெக்ட்ரிக் ட்ரெயின்ல உன் ஓர்ப்படியோட தம்பியாம். கண்ணன் என்று சொன்னார். பார்த்து பேசினோம்.

ஓர்ப்படியா!!!!!

எனக்கு ஓர்ப்படியே இல்லையே சித்தப்பா. இவர் ஒரே பிள்ளை. இரண்டு நாத்தனார் தான் இருக்கா!!

இரு! இரு!! நீ புவனா தானே??

ஆமாம்.

எங்கிருந்து பேசறே???

ஸ்ரீரங்கம்!!

ஓ!! நீ ஸ்ரீரங்கம் புவனாவாம்மா?

நான் பெங்களூர்ல இருந்து பேசறேன். (பெயர் சொன்னார்)

மும்பை தோழியின் அப்பா.

வெங்கட் செளக்கியமா?? பொண்ணு எப்படி இருக்கா??

இப்போ சித்தப்பா மாமாவாகிப் போனார்.

சொல்லுங்கோ மாமா, மாமி செளக்கியமா?

மாமி குளிச்சிண்டிருக்கா. நான் அப்புறமா பேசறேன். என்று சிரித்துக் கொண்டே வைத்தார்.

குரலும் எப்படி அப்படியே இருந்தது??

பல்பு வாங்கியதை நினைத்து சிரித்துக் கொண்டே சமையலைத் தொடர்ந்தேன்.

விரைவில் வேறு சில கதம்பச் செய்திகளோடு மீண்டும் ச[சி]ந்திப்போம்….

 

நட்புடன்

ஆதி வெங்கட்