பல்லிமாரான் – வளையோசை கலகலகலவென - விதம் விதமாய் வளையல்

கண்ணாடி வளையல்கள்....

காஃபி வித் கிட்டு பதிவொன்றில் தலைநகரிலிருந்து என்ற தலைப்புடன் இப்படி எழுதி இருந்தேன். அது உங்களுக்கு நினைவிருக்கலாம்! இல்லாதவர்களுக்காகவும், ஒரு Continuity-க்காகவும் அதே பாரா இங்கேயும்…

பதிவு எழுத ஆரம்பித்த நாட்களில் அவ்வப்போது தலைநகரிலிருந்து என்ற தலைப்பில் பதிவுகள் எழுதி வந்தேன் – தலைநகரின் வித்தியாசமான அனுபவங்கள் சொன்ன பதிவுகள் அவை. சில பதிவுகளுக்குப் பிறகு எழுதவில்லை. இந்த வாரத்தில் அப்படி ஒரு விஷயம் – இங்கே.  தலைநகரில் நிறைய பழமையான இடங்கள் உண்டு – பழைய தில்லியில் இருக்கும் சில பகுதிகள் நூற்றாண்டுகளுக்கும் மேலானவை. சமீபத்தில் அப்படி ஒரு இடத்திற்குச் சென்றிருந்தேன். அந்த இடத்தின் பெயர் Bபல்லிமாரான் – Bபல்லி என்றால் மூங்கில்/துடுப்பு, மாரான் – துடுப்பு போடுபவர் – அந்தக் காலத்தில் துடுப்புப் போடும் படகோட்டிகளுக்கான வசிப்பிடமாக இருந்த இடம் இந்த Bபல்லிமாரான்! இப்போதைய Bபல்லிமரான் பகுதியில் இன்னமும் பல கடைகள் தலைமுறை தலைமுறைகளாக நடத்தப்பட்டு வருகிறது. இந்த Bபல்லிமாரான் ஒரு சட்டசபைத் தொகுதியும் கூட!

Bபல்லிமாரான் – பழைய தில்லியில் இருக்கும் இந்தப் பகுதி மூக்குக் கண்ணாடிக் கடைகளுக்கும் கை வளையல்களுக்கும் பெயர் பெற்றது. தலைநகரில் உள்ள பல இடங்களில் – அந்த இடங்களுக்க்கென்றே சில கடைகள் இருக்கும் – நய்சடக் என்றால் புத்தகங்கள் – அங்கே கிடைக்காத புத்தகங்களே இல்லை என்று சொல்லலாம். பராட்டே வாலி கலியில் – பராட்டா கடைகள், சாந்த்னி சௌக் பகுதியில் நிறைய புடவைக் கடைகள், chசாவ்டி பஜார் என்றால் மளிகைப் பொருட்களின் மொத்தவிலைக் கடைகள் - இப்படி சொல்லிக் கொண்டே போகலாம். இந்த Bபல்லிமாரான் பகுதியில் இருக்கும் ஒரு மூக்குக்கண்ணாடி கடைக்கு போக வேண்டியிருந்தது. அங்கே இருக்கும் Ruby and Ruby கடை தெரிந்த கடை – நண்பர் பல வருடங்களாக அங்கே தான் வாங்குவார்.

எனக்கும் அங்கே தான் வாங்கிக் கொள்வேன். படிப்பதற்கு மட்டும் தேவையாக இருக்கிறது. 0.75 இருந்தது இப்போது கொஞ்சம் அதிகரித்து இருக்கிறது. அதற்காக ஒரு ஞாயிறில் அங்கே சென்றேன் – நண்பருடன் தான். அந்தப் பகுதியில் பெரும்பாலான கடைகள் கண்ணாடிக் கடைகள் என்றாலும் உணவுக் கடைகள் – பெரும்பாலானவை அசைவம் என்பதால் அங்கிருந்து வரும் வாசனையைப் பொறுத்துக் கொள்ள வேண்டும்! பழைய தில்லியில் இருக்கும் சாலைகள்/சந்துகள் எல்லாமே குறுகலானவை – வண்டிகளில் அங்கே செல்வது ரொம்பவே கஷ்டம். அதனால் Chசாவ்டி பஜார் வரை மெட்ரோவில் சென்று அங்கிருந்து பேட்டரி ரிக்‌ஷா. கண் பரிசோதனையும் செய்து கண்ணாடிக்கு ஆர்டரும் கொடுத்தேன். தயாரானவுடன் வீட்டில்/அலுவலகத்தில் வந்து கொடுத்து விடுவார்கள்.

நண்பர்கள் கடை உரிமையாளருக்குத் தெரிந்தவர்கள் என்பதால் அப்பகுதியிலிருக்கும் கடையிலிருந்து மண்பானையில் லஸ்ஸி வந்தது. அங்கே இருக்கும் உணவுப் பொருட்கள் நன்றாகவே இருக்கும். ரம்ஜான் சமயத்தில், நோன்பு விடும் சமயத்தில் இங்கே உணவு உண்பதற்காகவே செல்லும் தில்லி வாசிகள் நிறைய பேர். அசைவம் சைவம் என இரண்டுமே நிறைய கிடைக்கும். நான் கண் பரிசோதனை செய்து கொள்ள சென்ற நேரத்தில் லஸ்ஸி வர எனக்கு வந்த லஸ்ஸியை வேறொரு பெண்மணி – முதலில் லஸ்ஸி வேண்டாம் என்று சொன்ன பெண்மணி – குடித்து விட்டார்! எனக்குத் தரமுடியவில்லையே என கடை உரிமையாளருக்கு வருத்தம் – மீண்டும் வர வழைக்கிறேன் என்றார். எங்கள் வேலை முடிந்ததால் லஸ்ஸி வரும் வரை காத்திருக்கவில்லை.

எங்களுக்குக் கண்ணாடி வாங்க வேண்டியிருந்தது போலவே, நண்பருக்கு வளையல்கள் வாங்க வேண்டியிருந்தது. நவராத்ரி வருகிறதே – வீட்டுக்கு வரும் பெண்களுக்கு வைத்துக் கொடுக்க வேண்டுமே. இந்தப் பகுதி வளையல்களுக்கும் புகழ் பெற்றது – குறிப்பாக கண்ணாடி வளையல்கள். சில வளையல் கடைகள் நூறு வருடங்களாக இருக்கும் கடைகள் – தலைமுறை தலைமுறையாக வளையல் விற்பவர்கள் – பெரும்பாலும் மொத்த விலைக் கடைகள் தான் என்றாலும் சில்லரை வியாபாரமும் சில கடைகளில் உண்டு. 100-108 வளையல்களாக வட்ட வடிவில் அழகாகக் கட்டி வைத்திருப்பார்கள். விதம் விதமான வண்ணங்களில் வளையல்கள் – பார்க்கும்போது எதை வாங்குவது எதை விடுவது என்ற குழப்பம். வெளியில் பார்க்க சிறு கடை போல இருந்தாலும் பெரிய கடை.

வளையல் என்பது பெண்களின் அலங்காரத்தில் முக்கியமான இடம்பெறுவது தானே.  இப்போது பெண்கள் பெரும்பாலும் வளையல் அணிய விரும்புவதில்லை என்றாலும் “Bபேண்ட்” என்ற பெயரில் எதையோ அணிந்து கொள்கிறார்கள். நம் தமிழ் சினிமாக்களில் தான் எத்தனை எத்தனை வளையல் பாடல்கள். எனக்கு நினைவிருக்கும் வளையல் பாடல்கள் சில மட்டுமே. உங்களுக்கு நினைவில் இருக்கும் பாடல்களை கீழே உள்ள பாடலை பார்த்தபடியே – எம்.ஜி.ஆர். – வளையல்காரர் வேஷத்துடன் இருக்கும் பாடல் பார்த்தபடியே நினைவுக்குக் கொண்டு வாருங்கள் – உங்களுக்கு நினைவுக்கு வரும் வளையல் பாடல்களை பின்னூட்டத்தில் சொல்லலாம்! எத்தனை வளையல் பாடல்கள் வருகிறது எனப்பார்க்கலாம். கமல் – அமலா “வளையோசை கலகலகலவென” பாடல் எனக்கு மிகவும் பிடித்த பாடல்களில் ஒன்று. கார்த்திக்கின் “இளம் வயசு பொண்ண வசியம் பண்ணும் வளவிக்காரன்…” பாடல் என மூன்று பாடல்களை இங்கே சொல்லி விட்டேன். மற்ற பாடல்கள் பட்டியல் வருகிறதா பார்க்கலாம்!

சரி வளையல் கடைக்கு வருகிறேன். மாதிரி வளையல்கள் பார்த்து அளவு சொன்னால் போதும் – உள்ளேயிருந்து ஏற்கனவே கட்டி வைக்கப்பட்டிருக்கும் வளையல்கள் வந்து விடும். வளையல்களை ரொம்பவே அழகாய் கட்டி வைத்திருக்கிறார்கள். அதன் பிறகு பேப்பர்கள் வைத்து நல்ல பேக்கிங் – உடையாமல் இருக்க. அதற்காக கீழே போட்டால் உடையாதா என்று கேட்கக் கூடாது! தேவையான அளவு வளையல்களை அங்கே வாங்கிக் கொண்ட பிறகு கொண்டு சென்றிருந்த அழகாக வைத்துக் கொடுத்தார் கடை சிப்பந்தி. அதையும் வாங்கிக் கொண்டு மீண்டும் ரிக்‌ஷா – CHசாவ்டி பஜார் வரை. அங்கிருந்து மெட்ரோ! மெட்ரோவிலிருந்து வீடு வரை ஆட்டோ! நண்பர் வீட்டிற்குச் சென்று ஒரு காஃபி! பிறகு தான் வீடு திரும்பினேன்.

மேலே ரொம்பவே சுலபமாக வீடு வந்தது போல எழுதி இருந்தாலும், இந்தப் பகுதிகளுக்குச் சென்று வர – குறிப்பாக பஜார் பகுதிகளில் வண்டியில் செல்வது ரொம்பவே கஷ்டம்! அத்தனை குறுகலான சந்துகள் – சந்துகளில் மனிதர்கள், பேட்டரி ரிக்‌ஷாக்கள், ரிக்‌ஷாக்கள், ஆட்டோக்கள், மாட்டு வண்டிகள் என அனைத்தும் சென்று கொண்டிருக்கும். எப்போதுமே நடமாட்டம் நிறைந்த பகுதி என்பதால் அங்கே சென்று வருவதே ஒருவித அனுபவம் தான். ஆனாலும் அங்கே அடிக்கடிச் சென்று வருவது சிலருக்கு வழக்கமாக இருக்கிறது. அப்பகுதிகளில் படம் எடுப்பதற்கென்றே செல்ல வேண்டும் என்பது எனது நெடு நாள் விருப்பம் – சரியான துணை இல்லாமல் இருப்பதால் அங்கே சென்று படம் எடுக்க முடியவில்லை.  இந்த வாரம் கூட ஒரு நண்பர் அங்கே செல்வது பற்றிச் சொன்னார். அவரும் பழைய தில்லி பகுதியில் வசிக்கும் நண்பர் கூட வந்தால் நல்லது என்று சொல்லி இருக்கிறார். அப்படிச் சென்றால் அந்த அனுபவங்களையும் எடுத்த படங்களையும் உங்களிடமும் பகிர்ந்து கொள்கிறேன்.

இப்பகிர்வில் வளையல் கடையில், அலைபேசி மூலம் எடுத்த படங்களைப் பகிர்ந்திருக்கிறேன். என்னுடைய கேமரா எடுத்துச் சென்று விரைவில் படம் எடுக்க வேண்டும். பார்க்கலாம் எப்போது முடிகிறது என! தலைநகரிலிருந்து பதிவுகள் எழுத வில்லையென்றாலும், இனி அவ்வப்போது தில்லியின் பகுதிகள் பற்றி எழுதுகிறேன். கடைசியாக ஒன்று. கண்ணாடிக் கடையில் குடிக்க முடியாத லஸ்ஸியை – கண்ணாடி வளையல் வாங்கும் போது நானே வாங்கிக் குடித்தேன் – மண்பாண்டத்தில் வைத்த லஸ்ஸி – வாவ் ருசி! இங்கே இப்படி நிறைய உணவு விஷயங்கள் உண்டு. அவை பற்றி பிறிதொரு சமயத்தில் எழுதுகிறேன்.

மீண்டும் ச[சி]ந்திப்போம்…

 

நட்புடன்

வெங்கட்

புது தில்லி.