முகநூல் இற்றைகள் - கோடு போடுவதும் வால் விடுவதும்- 22 ஜனவரி 2023

அன்பின் நண்பர்களுக்கு, இனிய காலை வணக்கம். இந்த நாளில் மீண்டும் ஒரு பதிவுடன் உங்கள் அனைவரையும் சந்திப்பதில் மகிழ்ச்சி.   

 

நேற்று வெளியிட்ட உத்தமர் கோவிலும் முத்தங்கி சேவையும் பதிவினை படித்து கருத்துகள் தெரிவித்த அனைத்து வலையுலக நண்பர்களுக்கும் மனம் நிறைந்த நன்றி.  இந்த நாளை நல்லதொரு வாசகத்துடன் தொடங்கலாம் வாருங்கள். 

 

HEART IS THE ONLY MACHINE THAT WORKS WITHOUT REST FOR MANY YEARS; KEEP IT ALWAYS HAPPY - WHETHER IT IS YOURS OR OTHERS!

 

******

 

சில நாட்கள் முன்னர் காலை, தலைக்கு மேலே வேலை…  நீண்ட நாட்களாக சிகை அலங்காரம் செய்து கொள்ளச் செல்லவில்லை! தலை முடி, தாடி என அனைத்தும் புதர் போல ஆகிவிட, இன்றைக்கு சிகை அலங்காரம் செய்யும் இடத்திற்கு ஒரு விசிட் அடித்தேன்.  ஞாயிற்று கிழமை சென்றது தவறு என அங்கே சென்ற பிறகு தான் புரிந்தது.  எனக்கு முன்னர் மூன்று பேர் -  அதில் ஒருவர் ஏற்கனவே தனது தலையை சிகை அலங்காரம் செய்து விடுபவரிடம் ஒப்படைத்துவிட்டார். சரி சீக்கிரம் முடிந்து விடும் என நினைத்தால் மொத்தமாக ஒன்றரை மணி நேரம் காத்திருக்க வேண்டியிருந்தது!

 

ஒருவர் தலையில் கோடு போட்டு, ஒவ்வொரு முடியாக இங்கே அதிகமாக இருக்கு, அங்கே நீளமா இருக்கு, என கடைக்காரரை ஒரு வழி செய்து விட்டார். அடிக்கடி வருபவர் போல! கடைக்காரர் கேட்ட கேள்வியிலிருந்து - “அண்ணே போனமாச பாக்கி இன்னும் தரல!” - தெரிந்து கொண்டது இந்த விஷயம்.  வந்தவர் தைரியசாலி போல! சிகை அலங்காரம் செய்ப்பவரிடமே பாக்கி வைத்திருக்கிறார்!  அதற்கு அடுத்த நபரோ, இளைஞர் - கல்லூரிக்கு செல்லப் போகிறாராம்.  தனது தலையைக் கொடுக்கும் முன்னர் - “அண்ணே, பார்த்துண்ணே, நாளைலேயிருந்து காலேஜ் போகணும், அதனால பார்த்து வெட்டுங்க…  வெட்டின மாதிரியும்  இருக்கணும், முடியும் குறையக் கூடாது.  பின்னாடி வால் இருக்கட்டும் (TAIL என்றார்!)  வீட்டுல என் நிலை அப்படி… கொஞ்சம் மாடல் மாதிரி ஸ்டைல் செய்யலாம்னா விட மாட்டேன் என்கிறார்கள்!  கிட்டத்தட்ட அரை மணி நேரம் பார்த்துப் பார்த்து முடி அலங்காரம் செய்த பிறகு ஏதோ திருப்தி வந்த மாதிரியே காண்பித்துக் கொள்ளவில்லை. தலையை பல முறை கோதிவிட்டுக் கொண்டே இருந்தார். பிறகு காசு கொடுத்து வெளியேறினார்.   

 

மூன்றாம் நபர் தலையில் பெரிய புதர் போல முடி! கத்திரிக்கோல் போட்டா சரி வராது, machine போட்டுடலாமா? என்று கடைக்காரர் கேட்கும் அளவிற்கு இருந்தது அந்த நபரின் முடி. தலை எண்ணெய் பார்த்து பல நாட்கள் ஆகியிருக்கும் போல! ஒரு வழியாக அவர் தலையிலும் ஒரு ஆட்டம் ஆடியபிறகு என் தலைக்கு வந்தார்.  எனக்கு அப்படி ஒன்றும் அதிக நேரம் எடுத்துக் கொள்ளவில்லை என்றாலும் எனக்கு அடுத்த நபர் பார்த்துக் கொண்டே இருந்தார் - என்னடா இது இவ்வளவு நேரம் ஆகுதே! என! ஹாஹா….  அந்த சிறுவனின் அப்பா வந்து, “ஏண்டா அன்னிக்கே படிச்சுப்படிச்சு சொன்னேன், கடைக்கு போன்னு, இன்னிக்கு ஞாயிற்றுக் கிழமை வந்து எவ்வளவு லேட் ஆகுது பாரு!” என்று சத்தம் போட்டார்! 

 

யார் சொன்னது பெண்களுக்கு தான் சிகை அலங்காரம் செய்து கொள்ள அதிக நேரம் ஆகுமென்று!  ஆண்களுக்கும் அதிக நேரம் ஆகும்! நாள் முழுக்க சிகையைக் கோதிவிடுவதற்கே பாதி நேரம் போய் விடுகிறது பலருக்கு!

 

******

 

இன்றைய பதிவு குறித்த தங்களது எண்ணங்களை பின்னூட்டத்தில் சொல்லுங்கள். விரைவில் வேறொரு பதிவுடன் உங்கள் அனைவரையும் சந்திக்கும் வரை…

 

நட்புடன்

 

வெங்கட் நாகராஜ்

திருவரங்கத்திலிருந்து…