கதம்பம் - நவராத்திரி பொம்மைகள் - மெய்யழகன் - அன்பே நிறை! அன்பே இறை!

அன்பின் நண்பர்களுக்கு, இனிய காலை வணக்கம். இந்த நாளில் மீண்டும் ஒரு பதிவுடன் உங்கள் அனைவரையும் சந்திப்பதில் மகிழ்ச்சி.   

இதற்கு முன்னர் வெளியிட்ட இட்லி சாப்பிட ஆசைப்பட்டது ஒரு தப்பா - நகர் வலம் ஐந்து பதிவினை படித்து கருத்துகள் தெரிவித்த அனைத்து வலையுலக நண்பர்களுக்கும் மனம் நிறைந்த நன்றி.  இந்த நாளை நல்லதொரு வாசகத்துடன் தொடங்கலாம் வாருங்கள். 

******

நவராத்திரி பொம்மைகள் - 26 செப்டம்பர் 2024:

இன்னும் ஒரு வாரத்தில் நவராத்திரி துவங்க இருப்பதால் திருவரங்கம் இப்போதே அதற்கான கொண்டாட்டங்களுக்குத் தயாராகிக் கொண்டிருக்கிறது! வருடந்தோறும் போடப்படும் கொலு பொம்மைக் கடைகளும் அதில் காட்சிப்படுத்தப்பட்டுள்ள கொள்ளை அழகான பொம்மைகளும்!

சாஸ்திரத்துக்கு ஒரு பொம்மையாவது வாங்கணும் என்ற வழக்கத்தை பற்றிக் கொண்டு வகுப்புகளை முடித்துக் கொண்டு இன்று நானும் தோழி ஒருவரும் கடைத்தெருவுக்கு கிளம்பிவிட்டோம்! கைக்குள் அடங்கிவிடும் அளவுள்ள சிறிய பொம்மை முதல் இரண்டடி மூன்றடி அளவுள்ள பெரிய பொம்மைகள் வரை அங்கு இருந்தன.

இந்த வருடத்து ட்ரெண்டாக எல்லாக் கடையிலுமே ‘அயோத்தி குழந்தை ராமர்’ புன்னகையுடன் காட்சி தருகிறார்! அத்திவரதர் வெளிப்பட்ட வருடம் எல்லோர் வீட்டிலுமே அத்திவரதர் இருந்தார்! அதுபோல இந்த வருடம் குழந்தை ராமரை எங்கும் பார்க்கலாம்!

நவக்கிரக செட், சத்திய நாராயண பூஜை செட், கிருஷ்ணர் கோபிகைகள், தட்சிணாமூர்த்தி செட், வாராஹி செட், கோவர்த்தன கிரி செட், கடோத்கஜன் செட், கும்பகர்ணன் செட், சீமந்த செட், அறுபதாம் கல்யாண செட் என்று ஒவ்வொன்றும் அழகான கலைநயத்துடன் உருவாக்கப்பட்ட பொம்மைகள்!

வீட்டில் கொலு வைக்க, ஷோகேஸில் வைக்க, கொலு வைக்கும் வீடுகளுக்குச் செல்லும் போது வாங்கிச் செல்ல என்று அங்கு வருவோர் ஒவ்வொருவருக்கும் ஒவ்வொரு விதமான எண்ணங்கள்! விலையை கேட்டு விட்டு கடந்து செல்வோரும் உண்டு! நின்று பேரம் பேசி வாங்குவோரும் உண்டு! கடை வைத்திருப்பவர்களும் இது தான் சீசன் என்று விலையை சற்று கூட்டி  வைப்பதும் பின்பு பொருளை கழித்து விட இறங்குவதும் என இவை எல்லாமே வருடந்தோறும் நிகழ்கிற சம்பவங்கள் தான்!

அன்றொரு நாள் கடைத்தெருவில் சுற்றுலாவாக திருவரங்கம் வந்திருந்த பெண்மணி ஒருவர் என்னிடம், ‘who is Aandal? In glass room  there are 6 idols??’ என்று கேட்டார்! புன்னகையுடன் ‘Aandal is a god! She married lord ranganathar in this srirangam! One idol ! six mirror views! என்று சொன்னதும் ஆச்சர்யப்பட்டு நன்றி சொன்னார்!  அங்கிருந்த பொம்மைகளில் இன்று என் தோழி அங்கு இருந்த ரங்கன் ஆண்டாள் செட் தான் வாங்கினார்! 

தந்தையாகிய பெரியாழ்வாருடன் ஆண்டாள் திருவரங்கம் புறப்பட்டு வந்து ரங்கனுடன் ஒன்றென கலந்து விட்டாள் அல்லவா! அதையே அங்கு அழகான பொம்மைகளாக பெரியத் திருவடியும் சின்னத் திருவடியும் இருபுறமும் இருக்க பெரியாழ்வாரும் ஆண்டாளும் நின்றிருக்க பள்ளி கொண்ட ரங்கன் மையத்தில் வீற்றிருக்கிறார்!

இரண்டடி உயரத்தில் சிவன் பார்வதியை அரவணைத்துக் கொண்டிருந்த கல்கத்தா பொம்மை கொள்ளை அழகாக இருந்தது! விற்றுவிட்டதாம்! ஆர்டர் கொடுத்தால் அடுத்த மாதம் கிடைக்கும் என்றார்! கவரை மட்டும் எடுங்களேன்! ஃபோட்டோ எடுத்துக்கறேன்! என்றேன்..🙂 அதேபோல் பிரம்மாண்ட கும்பகர்ணன் செட்! 22000 ரூபாயாம்!

அந்தக் கிருஷ்ணர் ரொம்ப அழகா இருக்காரில்ல! ரெண்டு பேரும் எடுத்துப்போம்! சரியா! அண்ணே! அத பேக் பண்ணி குடுத்துடுங்க! ட்ரெண்டுக்கு சப்போர்ட் பண்ணி குழந்தை ராமரை இருவரும் கைகளில் சுமந்து எடுத்துக் கொண்டோம்! என்னமோ எனக்கு இந்த வருஷம் தட்சிணாமூர்த்தி வாங்கணும்னு தோணறது! அண்ணே! அதையும் பேக் பண்ணிடுங்க! அந்த முறத்தில விளக்கு ரொம்ப பிடிச்சிருக்கு! ரெண்டு பேருக்கும் வாங்கிப்போம்! சரியா!

இப்படியாக இந்த வருடத்துக்கான கொலு பர்சேஸ் சென்று கொண்டிருக்கிறது!

******

மெய்யழகன் - 28 செப்டம்பர் 2024:

சினிமாவுக்கெல்லாம் நான் வரல! டிக்கெட் புக் பண்ணித் தரேன்! நீங்க ரெண்டு பேரும் போயிட்டு வாங்க!!

மகளும், நானும் மேட்னி ஷோவுக்கு மெய்யழகனைக் காண வந்திருக்கிறோம்..🙂

ஃபீல் குட் மூவியாக இருக்கும்னு தான் ரிவ்யூக்களில் கேள்விப்பட்டேன்..🙂 பார்க்கலாம்...🙂

முந்தைய ஷோ முடிந்து நிறைய பேர் வெளியே வரவும் தான் மனசுக்கு கொஞ்சம் நிம்மதியா இருக்கு...🙂

******

அன்பே நிறை! அன்பே இறை! - 28 செப்டம்பர் 2024:

மெய்யழகன்!

படத்தின் ட்ரெய்லரை மகள் எனக்கு காண்பித்த போதே பார்க்கலாம் என்று நினைத்திருந்தேன்! இதோ படம் வெளியான மறுநாளே சென்று வந்துவிட்டோம்! பொதுவாக இப்போது வருகின்ற படங்கள் எல்லாமே சரமாரியான வெட்டும் குத்தும் தான் கதையே என்பது போலாகி விட்டது! 

எப்போதாவது தான் மெல்லிய நீரோட்டம் போல் சலசலப்பு இல்லாமல் அடிதடி, ஆர்ப்பாட்டம் என்று இல்லாமல் மயிலிறகு போல் மனதை வருடிச் செல்லும் திரைப்படங்களை பார்க்க முடிகிறது! அப்படி ஒரு திரைப்படம் தான் இந்த மெய்யழகன்!

பிறந்து வளர்ந்த வீட்டையும், ஊரையும் பிரிவது என்பது எவ்வளவு கொடுமையானது என்று நான் அனுபவத்தில் உணர்ந்திருக்கிறேன். செல்லும் வழியெங்கும் பசுமையான நினைவுகளையும் பலவித உணர்வுகளையும் வெளிப்படுத்தி வேதனையை கூட்டியது எனலாம்! அப்படியொரு நிலையில் அரவிந்த்சாமி!

நம்மீது அளவு கடந்த அன்பை செலுத்தும் ஒரு ஜீவன்! யோசித்துப் பார்த்தால் நம்முடைய வாழ்வில் சந்தித்த ஏதோ ஒரு நபராக இருக்கலாம்! எங்கேயாவது அப்படியொருவர் நிச்சயம் இருப்பார்! அவர்களுக்கு இந்த உலகில் உள்ள எல்லோரின் மீதும் அளவற்ற அன்பும், உரிமையும் இருக்கும்! 

நாம் அவர்களுக்கு பெரிதாக எதுவுமே செய்திருக்க மாட்டோம்! அவர்களை நினைவில் கூட வைத்திருக்க மாட்டோம்! ஆனால் அவர்கள் தன் இயல்பிலிருந்து மாறுவதில்லை! அப்படியொரு ஊர்க்காரனாகவும், உறவினராகவும் கார்த்தி!

96 திரைப்படம் போல் இதுவும் ஓரிரவில் நிகழும் சம்பங்களின் தொகுப்பு தான் இந்தத் திரைப்படமும்! தஞ்சையின் பசுமை போர்த்திய வயல்வெளிகளும், ஊர்ப்பாசமும், வட்டார மொழியும், உறவினரிடையே இருக்கும் பாசமும், பந்தமும் என நம்மையும் சற்றே திரும்பிப் பார்க்க வைக்கிறது! 

கார்த்தியின் ஊர்ச்சாயலுடன் கூடிய இயல்பான நடிப்பும், நகரவாசியான அரவிந்த்சாமியின் பட்டும் படாத இயல்புடன் கூடிய நடிப்பும் என வித்தியாசமான கோணத்தில் பயணிக்க வைக்கிறது! ஃபீல்குட் மூவியாக பார்க்கத் துவங்கினால் நிச்சயம் ரசிக்கலாம்!

தியேட்டரை விட்டு வெளியே வந்தால் மழை பெய்து சாலை நனைந்திருப்பது தெரிந்தது! ஆட்டோவில் ஏறியதும் ‘படம் எப்படிக்கா இருக்கு? சில பேர் நல்லாருக்குன்னு சொல்றாங்க! சில பேர் நல்லா இல்லேன்னு சொல்றாங்க! என்று ஆர்வத்துடன் கேட்டார் அந்த ஆட்டோ டிரைவர்…:)

அன்பே நிறை! அன்பே இறை! இது தான் ‘மெய்யழகன்’ நமக்கு உணர்த்தும் ஒரு வரிக் கதை!

******

இன்றைய பதிவு குறித்த தங்களது எண்ணங்களை பின்னூட்டத்தில் சொல்லுங்கள். விரைவில் வேறொரு பதிவுடன் உங்கள் அனைவரையும் சந்திக்கும் வரை…

நட்புடன்

ஆதி வெங்கட்

திருவரங்கம்

24 அக்டோபர் 2024