பீஹார் டைரி – கோல் கர் – தானியக் கிடங்கு

Gகோல் Gகர், பட்னா

 

இப்போதைய பீஹார் மாநிலத் தலைநகரம் பட்னா – நாம் பார்க்கப் போவது இந்தப் பகுதியில் 1770-ஆம் ஆண்டு நடந்த சில நிகழ்வுகளை – அதாவது இன்றைக்கு 248 ஆண்டுகளுக்கு முன்பு – கடும் பஞ்சம் நிலவியது. Great Bengal Famine என அழைக்கப்பட்ட பஞ்சத்தினை சமாளிப்பது மட்டும் சரியான விஷயமாக இருக்காது – மீண்டும் இந்த மாதிரி ஒரு பஞ்சம் வந்தால் அதைச் சமாளிக்கும் விதமாக ஏதாவது ஒரு பணியைச் செய்ய வேண்டும் என்று நினைத்தார் அந்தப் பகுதியில் அப்போது ஆங்கிலேய அரசாங்கத்தின் இராணுவப் பிரதிநிதியாக இருந்த Captain John Garstin. பஞ்சக் காலங்களில் பயன்படுத்துவதற்கென்றே தானியங்களைச் சேமித்து வைக்க ஒரு கிடங்கு அமைக்கவேண்டும் என்பது தான் அவர் செய்த யோசனை.

அவரது யோசனையில் உருவானது தான் Gகோல் Gகர்! ஹிந்தியில் Gகோல் என்றால் உருண்டை வடிவம், Gகர் என்றால் இல்லம்/வீடு.  உருண்டையான வடிவத்தில் அமைக்கப்பட்ட தானியக் கிடங்கு தான் இந்த Gகோல் Gகர். 1786-ஆம் ஆண்டு தான் இந்த தானியக் கிடங்கு உருவாகியது – அதாவது பஞ்சத்திற்கு சில ஆண்டுகளுக்குப் பிறகு! ஜனவரி 20 1784 ஆரம்பித்து, ஜூலை 20 1786 அன்று தான் வேலை முடிந்தது. 105 அடி உயரம் கொண்ட பெரியதொரு கிடங்கு இது. இந்தக் கிடங்கின் சுவர் மட்டுமே 3.6 மீட்டர் அகலம் என்றால் இந்தக் கிடங்கு எத்தனை உறுதியானதாக அமைந்திருக்கும் என்பதை உங்களால் உணர முடியும். இந்த கிடங்கின் வெளிப்பகுதியில் 142 படிகள் அமைத்து – வெளிப்பகுதியில் சுற்றிச் சுற்றி வரும்படி படிகள் - அதன் வழியே கிடங்கின் மேல் பகுதிக்குச் செல்ல முடியும்.

Gகோல் Gகர் – தானியக் கிடங்கு - படிகள்...

அந்த Gகோல் Gகர் இப்போது புனரமைப்புப் பணிகள் நடந்து வருவதால் மேல் பகுதிக்குச் சென்று பார்க்க அனுமதி இல்லை. மேலே இருந்து பார்த்தால் பட்னா நகரினை கழுகுப் பார்வையில் பார்க்க முடியும் என்பது சிறப்பு. நகரம் மட்டுமன்றி பட்னா நகரில் ஓடிக்கொண்டிருக்கும் கங்காஜி என மரியாதையுடன் அழைக்கப்படும் கங்கா நதியையும் மேலிருந்து காண முடியும். ஆனால் புனரமைப்புப் பணி நடப்பதால் நாங்கள் சென்ற போது அந்த அழகினை எங்களால் ரசிக்க முடியாமல் போனது. அந்தக் காலத்தில் வெறும் தானியக் கிடங்காக அமைந்தாலும், இப்போது அந்தப் பகுதியை ஒரு அழகிய பூங்காவாகவும் அமைத்திருக்கிறார்கள். Gகோல் Gகர் பார்க்க வருபவர்கள் பூங்காவில் அமர்ந்து சிறிது நேரம் இயற்கையை ரசிக்க முடியும்.

Gகோல் Gகர் – ஃபோட்டோ டைம்....

பெரிய பெரிய மரங்கள், பூஞ்செடிகள், புல் தரை, குழந்தைகளுக்கான விளையாட்டு உபகரணங்கள் கொண்ட பூங்கா என இருப்பதால் நகர மக்கள் மட்டுமின்றி சுற்றுலாப் பயணிகளும் அங்கே அமர்ந்து Gகோல் Gகர் அழகினை ரசிக்க முடியும் என்பது சிறப்பு. நுழைவுக் கட்டணமாக ஐந்து ரூபாய் மட்டும் வசூலிக்கிறார்கள். தூரத்திலிருந்து பார்க்கும் போது தேன்கூடு போன்ற வடிவத்தில் இருக்கிறது இந்த Gகோல் Gகர். நகரின் பல பகுதிகளிலிருந்து இந்த Gகோல் Gகர் தெரிகிறது என்றாலும் நாங்கள் அந்த இடத்திற்கு ஒரு மாலை வேளையில் சென்று வந்தோம். அஷோக் ராஜ்பத், சஜ்ஜூ பாக் என்ற இடத்தில் அமைந்திருக்கும் Gகோல் Gகர் பட்னா நகர் சென்றால் பார்க்க வேண்டிய ஒரு இடம்.

Gகோல் Gகர் – மேலிருந்து பட்னா நகரமும் கங்காஜியும்...

படம் - இணையத்திலிருந்து...

படிகள் வழியே மேலே சென்று மேல் பகுதியில் இருக்கும் இரண்டு அடி விட்டம் கொண்ட துளை வழியே தானியங்களை கிடங்கினுள் சேமிக்க வேண்டும். கீழ்ப் பகுதியில் இருக்கும் கதவைத் திறந்து தானியங்களை எடுக்க முடியும்.  இத்தனை சிறப்பாகத் திட்டமிட்டு தானியக் கிடங்கினைக் கட்டினாலும் இதில் இருக்கும் ஒரு சிறு தவறினால் முழு கொள்ளவு தானியங்களை இந்தக் கிடங்கில் ஒரு போதும் சேமிக்க முடிந்ததில்லை.  அது என்ன சிறு தவறு? கிடங்கினைக் கட்டத் திட்டமிட்டவர்கள், கீழ்ப்பகுதியில் அமைத்த கதவினை உள் பக்கம் திறக்குமாறு அமைத்துவிட்டார்கள்! அதனால் முழு கொள்ளவு கொள்ளும்படி தானியங்களை நிரப்பினால் உள் பக்கமாக கதவைத் திறக்க முடியாது! அதனால் இந்தக் கிடங்கில் எப்போதுமே முழுக் கொள்ளவு தானியங்களைச் சேமித்ததில்லை. அந்தக் காலங்களில் கதவினை மாற்றி அமைக்கவும் இல்லை! இப்போதும் அதை பழமையைக் கருத்தில் கொண்டு மாற்றங்கள் ஏதும் செய்யவில்லை. அதைத் தவிர இப்போது இந்தக் கிடங்கு பயன்பாட்டிலும் இல்லை என்பதையும் சொல்ல வேண்டும்.

Archaeological Survey of India தான் இந்தக் கிடங்கினை புனரமைக்கும் பணியை மேற்கொண்டிருக்கிறது. பீஹார் அரசாங்கமும் பத்து லட்சம் ரூபாயை இந்தப் பணிக்காகத் தந்திருக்கிறது. கடந்த செப்டம்பர் மாதமே முடிந்திருக்க வேண்டிய பணி இன்னமும் முடியவில்லை!  பழையா காலத்தில் பயன்படுத்தப்பட்ட சுர்கி சூணா [Lime and powdered burnt red terracotta] கொண்டு தான் புனரமைக்கும் பணி நடைபெறுகிறது என்று சொல்லப்பட்டாலும் பல இடங்களில் சிமெண்ட் தான் பயன்படுத்தி இருக்கிறார்கள் என்று தெரிந்தது. ஏதோ சீக்கிரம் புனரமைக்கும் பணிகளை முடித்தால் நல்லது.  

என்னதான் பெரிதாகத் திட்டமிட்டாலும், ஒரு சிறிய தவறு, கட்டப்பட்ட இடத்தினை முழுதாகப் பயன்படுத்த முடியாமல் போவது என்பது ஒரு இழுக்கு தானே! ஆங்கிலேயர் காலத்திலேயே கட்டி சில வருடங்கள் பயன்பாட்டில் இருந்தாலும், தற்போது ஒரு சுற்றுலாத் தலமாக மட்டுமே இருக்கிறது இந்த Gகோல் Gகர்.  பட்னா நகரத்திற்குச் சென்றால் இந்த இடத்தினைப் பார்த்து, கூடவே அந்தச் சிறு பூங்காவில் சிறிது நேரம் அமர்ந்திருக்கலாம். ஒவ்வொரு நாளும் காலை 09.30 மணி முதல் மாலை 06.00 மணி வரை மட்டுமே இந்த Gகோல் Gகர் திறந்திருக்கும். பீஹார் தலைநகர் பட்னா சென்றால் இந்த புராதனமான இடத்திற்கும் சென்று வரலாம்.

வேறு சில செய்திகளோடு மீண்டும் ச[சி]ந்திப்போம்….

 

நட்புடன்

வெங்கட்

புது தில்லி