காஃபி வித் கிட்டு – பெண்கள் பேண்ட் அணிய தடை – லாய் எனும் இனிப்பு – டிக் டாக் - பதிவுலகம்

காஃபி வித் கிட்டு – பகுதி – 14

சாப்பிட வாங்க – லாய்: பீஹார் பயணத்தின் போது தெரிந்து கொண்ட இன்னுமொரு பீஹார் இனிப்பு லாய் என்பது. மேலே வெள்ளை வெள்ளையாய் ராம்தானா [லாய்] ஒட்டி இருக்க, உள்ளே இருப்பது கோயா! ராம் தானா என்பது கீரை விதைகள் – ராஜ்கிரா என்றும் அழைக்கப்படுவது. இந்த லாய் பீஹார் மாநிலத்தின் கயாவில் அதிகம் கிடைக்கிறது. கயாவில் சுற்றி வரும்போது, மாலை நேர உலாவில் இந்த லாய் சுவைத்தோம். நன்றாகவே இருந்தது. எப்படிச் செய்ய வேண்டும் எனக் கேட்பவர்களுக்கு, இணையத்தில் ராம்தானா லட்டு எனத் தேடிப் பார்க்கலாம் என்பதே பதில்!

வித்தியாசமான தடை: நவம்பர் 7-ஆம் தேதி பாரிஸ் – ஒரு வித்தியாசமான தடை உத்தரவு பிறப்பிக்கப்பட்டது – காவல் துறையினரின் அனுமதி இல்லாமல் பெண்கள் பேண்ட் அணிந்து கொள்ளக் கூடாது எனும் தடை உத்தரவு தான் அது! இது என்ன கொடுமை! இப்படி கூடவா தனி மனித உரிமைகளில் அரசாங்கம் தலையிடும். இது சரியல்லவே! எந்த வருடம் இந்த உத்தரவு வந்தது தெரியுமா? அந்த வருடம் அப்படி என்ன ஸ்பெஷல்? இங்கே எதற்கு அதைப் பற்றிய தகவல்… இப்படி சில கேள்விகள் இருக்கலாம். அனைத்திற்குமான விடை கடைசியில்!

ரசித்த நடனம்:

நேற்று முகநூலில் ஒரு நடனம் பார்க்கக் கிடைத்தது. மூன்று பேர் நடனமாடினார்கள். நன்றாக இருந்தது. இணையத்தில் பகிர்ந்து கொண்ட தில்லி சகோவிற்கு நன்றி. நீங்களும் பார்க்கலாமே….

படித்ததில் பிடித்தது – ஒரு கவிதை:

தனித்து மறுகும் மனம்

அவளுக்கு

திருமணத்திற்கு முன்

அனுமதி மறுக்கப் பட்டது

திருமணமானதும் திணிக்கப்பட்டது

திருமணத்திற்கு சிலகாலம் கழித்து

இல்லவே இல்லையெனப் பட்டது

வெளிநாட்டில் வேலை செய்யும் கணவன்

செய்வதற்கு ஏதுமற்ற இரவில்

இந்தத் தனிமையை

ஏற்கத் தெரியாமல்

எதிர்கொள்ளத் திராணியில்லாமல்

வெதும்புகிறாள்

பகலில் அவளைக் கண்காணித்த கண்கள் எல்லாம்

இப்போது இன்பத்தின் பிடியில்

உவகைக்குப் பின்

உறக்கத்தில் ஆழ்ந்திருப்பதை

அவள் ஊகித்து அறிகிறாள்

பாலுக்கழுத பச்சிளம் குழந்தையின் அழுகை

பட்டென்று நின்றதெப்படி என்பதை

மனக்கண்ணால் கண்டு மறுகுகிறாள்

குழந்தையுண்டானால்

குமுறும் வலிகளுக்கு

கொஞ்சமாவது ஆறுதல்

கிடைக்குமென

குறுமகள் நினைக்கிறாள்

தாயாகவும் இல்லாமல்

மனைவியாகவும் இல்லாமல்

கன்னியாகவும் இல்லாமல்

வெறும் பெண்ணாக இருப்பதன்

வேதனை உணர்வெழுச்சிகளோடு

நாளும் நலிகிறாள்

யாருமறியாமலே !!

©® ஶ்ரீ

22nd DECEMBER 2017

டிக் டாக் தொல்லைகள்:

டிக் டாக் [Tik Tok] இந்த App பற்றி நீங்கள் அறிந்திருக்கலாம். நமது அலைபேசியில் இந்த App தரவிறக்கம் செய்து கொள்ளலாம். பலரும் இந்த App மூலம் பிரபல சினிமா வசனங்களையும், பாடல்களையும் வைத்து காணொளிகளை பதிவு செய்திருக்கிறார்கள். முகநூலிலும் இந்த காணொளிகளை பகிர்ந்து கொள்கிறார்கள். சில காணொளிகள் நன்றாக இருந்தாலும், பலவற்றை பார்க்க சகிக்கவில்லை. பாடுகிறேன் என்ற பெயரில் ஸ்ம்யூலில் [Smule App] படுத்திய பலர், இப்போது இந்த டிக் டாக்-ல் ஆடிப் படுத்துகிறார்கள். பார்க்கவே கொடுமையாக இருக்கும் சில காணொளிகளை முகநூலில் பகிர்ந்து கொள்பவர்கள் உண்டு. சில விநாடிகளுக்குள் அங்கிருந்து ஓட வேண்டியிருக்கிறது! அந்த காணொளியை பார்க்க வேண்டாம் என Scroll செய்ய கை வைக்கும்போது “நிறுத்து, தள்ளாதே” என மிரட்டுபவர்களும் இருக்கிறார்கள்! நல்லவையும் தீயவையும் இரண்டுமே கலந்தது தான் இந்த இணையம் என்று தெரிந்தாலும், சொல்லாமல் இருக்க முடியவில்லை!

பதிவுலகமும் நானும்:

மேலே வித்தியாசமான தடை என்று எழுதி இருக்கிறேன். பேரிஸ் நகரில் பெண்கள் கால்சராய் அணிந்து கொள்ள தடை விதித்திருக்கிறார்கள். இது நடந்த வருடம் 1800! இந்தத் தடையை நீக்கியது மிகச் சமீபத்தில் தான்! Redundant law ஆக இருந்ததை 2013-ஆம் ஆண்டு தான் நீக்கியிருக்கிறார்கள்! 1800-ஆம் வருடம் நடந்த விஷயத்தினை இன்றைக்கு எதற்காக குறிப்பிட வேண்டும் – அதற்கு விடை – இந்தப் பதிவு இப்பக்கத்தில் 1800-ஆவது பதிவு! 2009-ஆம் ஆண்டிலிருந்து இத்தளத்தில் எழுதி வருகிறேன். 1800 பதிவுகள் தாங்கி இருக்கிறீர்கள் என நினைக்கும்போது பிரமிப்பாக இருக்கிறது! பல பிரபலங்கள் இங்கே இருக்கையில், அடியேனும் 1800 பதிவுகள் எழுதிவிட்டேன் என நினைக்கும்போது பிரமிப்பாக இருக்கிறது. தொடர்ந்து ஆதரவு தரும் அனைத்து பதிவுலக நட்புகளுக்கும் மனம் நிறைந்த நன்றி!

என்ன நண்பர்களே, இந்த வாரத்தின் காஃபி வித் கிட்டு பதிவு உங்களுக்குப் பிடித்திருக்கிறதா? உங்கள் கருத்துகளைச் சொல்லுங்களேன். விரைவில் வேறு சில செய்திகளோடு மீண்டும் ச[சி]ந்திப்போம்….

 

நட்புடன்

வெங்கட்

புது தில்லி