கதம்பம் - அப்பள பஜ்ஜி - பால்கோவா - இசையின் வலிமை - வெற்றிலைத் தாம்பூலம் - நேரம்

அன்பின் நண்பர்களுக்கு, இனிய காலை வணக்கம். இந்த நன்நாளில் மீண்டும் ஒரு பதிவுடன் உங்கள் அனைவரையும் சந்திப்பதில் மகிழ்ச்சி.  

இதற்கு முன்னர் வெளியிட்ட ஜெய் துவாரகாதீஷ் ஜெய் சோம்நாத் - பயணத் தொடர் பதிவை படித்து கருத்துகள் தெரிவித்த அனைத்து வலையுலக நண்பர்களுக்கு மனம் நிறைந்த நன்றி.  இந்த நாளை நல்லதொரு வாசகத்துடன் தொடங்கலாம் வாருங்கள். 

*******

மழையில் நனைந்து - அப்பள பஜ்ஜி - 20 மே 2024:

நீண்ட நாட்களுக்குப் பின்னர் இங்கு நல்ல மழை பெய்தது! மனதும் சூழலும் குளிர்ந்து போச்சு! மாலைநேரம் மகள் கல்லூரியிலிருந்து வந்ததும் டீ போடலாம் என்று Fm கேட்டபடியே பாத்திரங்களை தேய்த்துக் கொண்டிருந்தேன்! 

அதில் ஆர். ஜே இங்க பாருங்க! ஸ்டூடியோவோட கண்ணாடி ஜன்னல் வழியா பார்த்துட்டு இருக்கேன்! இங்க வானம் அப்படியே இருட்டிகிட்டு எப்படா மழை பெய்யலாம்னு இருக்கு! உங்க ஏரியால்லாம் எப்படி இருக்குன்னு சொல்லுங்க! அப்படியே  'நல்ல ஒரு மழைநாளில் என்ன செய்வீங்க?' என்று நேயர்களிடம் கேட்டுக் கொண்டிருக்க...

ஒரு பெண்மணி, 'அதென்னமோ தெரியலைங்க! மழைநேரத்துல சூடா வெங்காய பக்கோடா இல்லன்னா பஜ்ஜி போட்டு சாப்பிடுவேங்க!” என்று சொல்ல.. அட! நாமளும் டீயோடு சூடா பஜ்ஜி பண்ணி சாப்பிடுவோமே! என்று தோன்றவே...

சட்டுனு அப்பளத்தை இரண்டாக உடைத்து பஜ்ஜி மாவில் முக்கி எடுத்து எண்ணெயில் போட்டு எடுத்தால்... அப்பள பஜ்ஜி ரெடி!

மகளும் மழையில் நனைந்தபடியே வந்தாள்! என் பள்ளி கல்லூரி நாட்களை நினைத்துக் கொண்டேன்! எங்கேயும் நிற்கவே மாட்டேன்! தொப்பலாக நனைந்த படியே தான் வீட்டுக்கு வருவேன்...🙂 அம்மாவிடம் திட்டுகளும் வாங்கிக் கொள்வேன் .🙂

*******

பால்கோவா - 21 ஜூன் 2024:

நேற்றைய பொழுதில் வெளியே ஒரு வேலைக்காக சென்றிருந்த போது வழியில் தென்பட்ட மாம்பழ அக்கா புன்னகையுடன் ஹாய் சொன்னார்!நல்லா இருக்கீங்களா? எங்க இங்க வரதே இல்ல! என்று நாட்டு மாம்பழம் ஒன்றை கட் செய்து டேஸ்ட் பார்க்கத் தந்தார்! பெயரைக் கேட்டால் மால்கோவா என்பது போல ஒலிக்கவே மல்கோவாவா? என்றேன்!

மல்கோவா இல்லக்கா! இது பேரு  பால்கோவா! என்ன பால்கோவா கணக்கா இனிக்குதா? வீட்டுக்கு வாங்கிட்டு போலாமில்ல! என்று சிரித்துக் கொண்டே "ஒரு கிலோ போட்டுத் தரேன்!" என்று பையில் போட்டுக் கொடுத்தார்!

இசையின் வலிமை - 21 ஜூன் 2024:

நேற்றைய பொழுதில் Spotify-ல் பாடல்களைக் கேட்டுக் கொண்டே வீடு பெருக்கிக் கொண்டிருந்தேன்! மனதில் என்னமோ அடுத்தடுத்த வேலைகளைப் பற்றிய எண்ணங்கள் தான் வியாபித்திருந்தன! 

தாலாட்டு மாறிப் போனதே! என் கண்ணில்....!

குறிப்பிட்ட பாடலைக் கேட்டுக் கொண்டே வந்ததும் மனதை என்னமோ செய்து விட எங்கிருந்தோ துக்கம் கரைபுரண்டு ஓடி வர மிகுந்த சிரமப்பட்டு தான் என் எண்ணங்களை திசைதிருப்ப முயற்சி செய்தேன்! இசைக்கு இருக்கும் வலிமையை எண்ணி ஆச்சர்யமும் கொண்டேன்.

வெற்றிலைத் தாம்பூலம் - 21 ஜூன் 2024:

வெள்ளிக்கிழமை என்பதால்  காலையிலேயே வெற்றிலை பாக்கு தாம்பூலம் வாங்கிக் கொள்ள ஒரு அழைப்பு வந்ததும் ஓடிச் சென்று வாங்கி வந்தேன்! யாராவது எனக்கு நமஸ்காரம் பண்ணுகிறேன் என்று சொன்னால் ஏன் பதறுகிறேன் எனப் புரியவில்லை...🙂 அடுத்த நிலைக்கு சென்று விட்டேன்! சென்று விட்டேன்! என்று நான் சொன்னாலும் என் மனது அந்த மாற்றத்தை உணரவில்லையோ..🙂

மீள் பதிவு - 21 ஜூன் 2024:

போன வருஷம் இதே நாளில் நான்  எழுதிய பதிவு ஒன்று என் கண்ணில் பட்டது! அதில் என்னவரிடமும், மகளிடமும் நான் பொழுது போகாமல் ஏதாவது பேசுங்களேன்! என்று சொல்வதாகவும் அவர்கள் இருவருமே 'என்னம்மா பேசறதுக்கு இருக்கு! திரும்பத் திரும்ப ஒரே விஷயங்கள் தானே'! என்றும் சொல்லியதாக எழுதியிருக்கிறேன்....🙂

ஆனால் இப்போது...!

சாயங்காலம் நீ ஏன் பேசவே இல்ல??

அதுவா! நேரமே இல்ல! கிளாஸ் முடிஞ்சதும் வெளில போயிட்டு வந்தேனா! சாப்டுட்டு வேலை முடிச்சேன்! இன்னிக்கு டெஸ்ட் இருந்தது! அப்புறம் வொர்க்‌ஷீட் வேற  இருந்தது! எழுதிண்டு இருந்தேன்! அப்புறம் என்ன! ராத்திரி டிபன்! பாத்திரம் தேய்ச்சு கிச்சன க்ளீன் பண்ணி தூங்கப் போக தான் நேரம் இருந்தது...🙂

*******

இன்றைய கதம்பம் பதிவு குறித்த தங்களது எண்ணங்களை பின்னூட்டத்தில் சொல்லுங்கள். விரைவில் வேறொரு பதிவுடன் உங்கள் அனைவரையும் சந்திக்கும் வரை…

நட்புடன்

ஆதி வெங்கட்