கதம்பம் - காது குத்தும் வைபவம் - ரேடியோவில் ஆத்திச்சூடி

அன்பின் நண்பர்களுக்கு, இனிய காலை வணக்கம். இந்த நன்நாளில் மீண்டும் ஒரு பதிவுடன் உங்கள் அனைவரையும் சந்திப்பதில் மகிழ்ச்சி.  

நேற்றைய தினம் வெளியிட்ட காசி விஸ்வநாதர் கோயில் பதிவையும் வாழ்த்துப்பா பதிவையும் படித்து கருத்துகள் தெரிவித்த அனைத்து வலையுலக நண்பர்களுக்கு மனம் நிறைந்த நன்றி.  இந்த நாளை நல்லதொரு வாசகத்துடன் தொடங்கலாம் வாருங்கள். 

*******

காது குத்தும் வைபவம் - 7 ஜூலை 2024:

குழந்தை அழும் போது பெற்றோரும் உற்றாரும் மகிழ்வுடன் இருக்கும் தருணங்களில் ஒன்று காதணி விழா! அழும் குழந்தையை எல்லோரும் மாற்றி மாற்றி சமாதானம் செய்ய முயற்சித்தாலும் அந்த தருணத்தை எண்ணி எல்லோருமே சந்தோஷத்துடன் காணப்படுவர்!

அப்படியொரு காதணி விழாவில் தான் இன்று மகளும் நானும் பங்கேற்று வந்தோம்! விழா வெகு சிறப்பாக நடைபெற்றது! அங்கு அமர்ந்திருந்த போது மகளிடம் அவளுக்கு காது குத்தும் வைபவம் நிகழ்ந்ததை பற்றியும் இப்படியொரு காதணி விழாவில் என்னுடைய பதினைந்தாவது வயதில் எனக்கு இரண்டாம் முறையாக மூக்கு குத்தியதையும் சொல்லிக் கொண்டிருந்தேன்..🙂

மகளும் ஐந்தாம் வகுப்பிலிருந்தே தன் தோழிகள் மூக்குத்தி போட்டுக் கொள்வதை பார்த்து ஆசைப்பட்டாள்! பின்பு பயத்தின் காரணமாக ஒவ்வொரு முறையும்  தள்ளிப் போட்டுக் கொண்டே வருகிறாள்! நேற்றைக்கு கூட குத்திக் கொள்கிறேன் என்றாள்! ஆனால் இன்று அந்தக் குழந்தையின் அழுகையை பார்த்ததும் மாட்டேன் என்கிறாள்....🙂

மகளின் ஆயுஷ்ஹோமம் டெல்லியில் எங்கள் வீட்டிலேயே எளிமையாக நடைபெற்றது! அப்போது எங்கள் பகுதியில் இருந்த கேரளத்தைச் சேர்ந்த ஒருவரின் நகைக்கடைக்குச் சென்றே மகளுக்கு காது குத்தினோம்! மகளின் அழுகையை பார்க்க முடியாது என்று என்னவர் அங்கு வர மறுத்து விட என்னுடன் அப்பாவும், கணவரின் பெரியம்மாவும் உடன் வந்தனர்!

பொதுவாக தாய்மாமாவின் மடியில் அமர்த்தி தானே காது குத்துவது வழக்கம்! அப்போது என் தம்பியாலும் டெல்லிக்கு வர இயலவில்லை! நகைக்கடைக்கு எங்களுடன் வந்திருந்த கணவரின் நெருங்கிய நண்பரின் மடியில் குழந்தையை அமரவைத்து தான் காது குத்தி வந்தோம்! 

காது குத்திய இடத்தில் புண்கள் வந்துவிடக்கூடாதென்றும் விரைவில் ஆறி விடவும் காதணியை முதலில் சின்ன வெங்காயத்தில் நன்கு அழுத்தி விட்டு பின்பு தான் காது குத்தினார்! சின்ன வெங்காயத்தின் மருத்துவ பயன் அப்படிபட்டதாம்!

ஒவ்வொரு நிகழ்வும் எத்தனை இனிமையானது! இன்னமும் அப்பா செய்து தந்த சின்ன சின்ன விஷயங்களும், அப்பா உடன் இருந்த நிகழ்வுகளும் தான் மனது முழுவதும்  நிறைந்திருக்கிறது! அப்பாவின் தொப்பையை பிடித்துக் கொண்டு சைக்கிளில் பள்ளிக்குச் சென்றது முதல் அப்பா என்னுடன் உடன் இருந்த நேரங்கள், சொன்ன அறிவுரைகள், வாழ்க்கை நெறிகள் எவ்வளவோ இருக்கிறது!

காலம் வேகமாக ஓடினாலும் மனதில் பதிந்து விட்ட நினைவுகளில் எந்த மாற்றமும் இல்லையே! இன்னும் பசுமையாகவே இருக்கிறதே! அன்றைய நாளுக்கான சாட்சியாக இன்று  என்னால் இருக்க முடிந்ததையும் அதை மகளிடம் பகிர்ந்து கொள்ள முடிந்ததையும்  எண்ணி மிகவும் மகிழ்கிறேன்! மீண்டும் இப்படியொரு தருணம் என்பது அடுத்த தலைமுறையினரை பார்க்கும் வாய்ப்பு கிடைத்தால் மட்டுமே சாத்தியம்!

*******

ரேடியோவில் ஆத்திச்சூடி - 9 ஜூலை 2024:

காலைநேர பரபரப்பில்  fm கேட்பது என் பழக்கம்! இன்றைய சமையலாக  புதினாத் துவையலும், பீர்க்கங்காய் கூட்டும் என முடிவு செய்து கொண்டு துவையல் அரைப்பதற்காக புதினாவை ஆய்ந்து கொண்டே fm கேட்டுக் கொண்டிருந்தேன்!

Hello fm 106.4ல் காலைநேரத்தில் ஆத்திச்சூடி என்ற நிகழ்ச்சி நன்றாக இருக்கும்! ஆன்மீகம், தமிழ், நம் கலாச்சாரம், பண்பாடு, ஊர் திருவிழாக்கள் என்று பலதரப்பட்ட தகவல்களையும் அதில் தெரிந்து கொள்ளலாம்! ஜெயராம் என்பவர் இந்த நிகழ்ச்சியை சிறப்பாக தொகுத்து வழங்குகிறார்! 

சமையல் வேலைகளுடன் இந்த நிகழ்ச்சியையும் ஆர்வத்துடன் கேட்பேன்! அதில் இன்று ஐவகை நிலங்கள் என்றதும்…

ஐவகை நிலங்கள்.... குறிஞ்சி, முல்லை, மருதம், நெய்தல், பாலை என்று நானும் உடன் சொல்லிக் கொண்டிருந்தேன். 

அடுத்து நான்கு வகை நவராத்திரிகள் கொண்டாடப்படுவதாக சொன்னதும் அதில் எனக்கு தெரிந்த இரண்டு நவராத்திரிகளை சொல்லிக் கொண்டிருந்தேன்! 

இப்போது ஆனி மாதம் அல்லவா! இந்த மாதத்தில் கொண்டாடப்படுவது ஆஷாட நவராத்திரி , புரட்டாசியில் கொண்டாடப்படுவது சாரதா நவராத்திரி, தை மாதத்தில் ஷியாமளா நவராத்திரியும், பங்குனி மாதத்தில் வசந்த நவராத்திரியும் தேசமெங்கும் கொண்டாடப்படுகிறது! டெல்லியில் இருந்த போது வசந்த பஞ்சமி என்று அன்றைய தினம் பள்ளியில் மஞ்சள் நிற உடை, மஞ்சள் நிற உணவு என பின்பற்றுவார்கள்!

வாரம் ஒரு தமிழறிஞர் பற்றிய தகவல்களும் இந்த ஆத்திச்சூடி நிகழ்ச்சியில் பகிரப்படுகிறது!  ஒரு வாரம் காளமேகப் புலவர் பற்றிய தகவல்களும் அவர் எழுதிய பாடல்களும், அடுத்து முத்தமிழ் காவலர் கி.ஆ.பெ விஸ்வநாதன் அவர்களைப் பற்றிய தகவல்கள், அடுத்து அந்த வரிசையில் இந்த வாரம் திரிகூட ராசப்ப கவிராயர் என்றதும்…

என் பள்ளிநாட்களில் என் தமிழாசிரியர் புலவர் இலட்சுமணன் ஐயா அவர்களும், திருஞானசம்பந்தன் சாரும் சொல்லித் தந்த பாடங்கள் நினைவுக்கு வந்தன! கற்பனையில் பாக்குமரங்கள், பலாமரங்கள் என  பசுமை போர்த்திய குற்றால மலையை வலம் வந்த நாட்கள் அவை!

கல்லூரிக்கு தயாராகிக் கொண்டிருந்த மகளிடம் திரிகூட ராசப்ப கவிராயர் என்றதும்...குற்றால குறவஞ்சியை எழுதினவர்! ஒவ்வொரு பாட்டும் குற்றால மலை எங்கள் மலையேன்னு முடியும் என்றாள்! அவளின் தமிழார்வத்தை எண்ணி மகிழ்ந்தேன்!

எந்தத் துறையை தேர்ந்தெடுத்து படித்தாலும் நம் தாய்மொழியை விடாமல் பற்றிக் கொள்ள வேண்டும்! எனக்கு டமில் தெரியாது என்று சொல்வது ஒன்றும் அழகல்ல! பிழையின்றி எழுதவும், உச்சரிப்பு சுத்தமாக பேசவும் தெரிந்து வைத்திருப்பதே அழகு!

இன்றைய நாள் இப்படியாக  இனிதானது!

*******

இன்றைய கதம்பம் பதிவு குறித்த தங்களது எண்ணங்களை பின்னூட்டத்தில் சொல்லுங்கள். விரைவில் வேறொரு பதிவுடன் உங்கள் அனைவரையும் சந்திக்கும் வரை…

நட்புடன்

ஆதி வெங்கட்